LAMPA-LAMPANA 3:6 - KITTA' MATANGKASA'

⁶ Mingka nakanamo Petrus ri anjo tau pesoka, “Tena sikali doekku. Mingka apa niaka ri nakke, iaminjo lakusareangko: Lanri koasaNa Isa Almasi, battua ri Nazaret, kukana ri kau a'jappa mako!”

LAMPA-LAMPANA 3:6 Referans Kwoze

LAMPA-LAMPANA 3:16

Nucini'mi siagang nusa'bimi apa kajarianga ri kalenna anne tau pesoka. A'jari baji'mi siagang gassimmi ammotere' lanri tappaki mae ri Isa siagang kakoasanNa. Lanri tappa'na mae Isa, a'jari baji'mi ammotere' anne taua ri dallekannu ngaseng.

LAMPA-LAMPANA 10:38

Nuassemmi angkanaya le'ba'mi Napile Allata'ala anjo Isa tu Nazaretka, naNapassareang RohNa Allata'ala siagang koasaNa mae ri Ia. Nuasseng tommi angkanaya le'ba'mi a'lampa mange-mange Isa anggaukangi kabajikanga; Naballeimi sa'genna a'jari baji' sikamma tau nasosoka setang, lanri niaki Allata'ala anrurungangi.

LAMPA-LAMPANA 4:10

Jari, ikatte ngaseng, kammayatompa sikontu bansa Israel, musti kiasseng ngasengi angkanaya lanri kagassinganNa siagang kakoasanNa Isa Almasi anjo battua ri Nazaret, nakkullemo nia' ammenteng ri dallekannu ngaseng anne taua. Kamma-kamma anne gassimmi siagang salewangammi tubuna anne tau le'baka peso', lanri anjo Isa Almasi. Ikatte ngasemmi le'ba' ansalliki anjo Isa Almasi. Mingka nipattallasa' poleammi ammotere' ri Allata'ala.

LAMPA-LAMPANA 9:34

Nakanamo Petrus ri Eneas, “O Eneas, kamma-kamma anne Naballeiko Isa Almasi. Ambangung mako nai' nanupakabaji' katinroannu.” Ambangung memammi Eneas anjo wattua.

2 KORINTUS 8:9

Nasaba' baji' ngaseng nuassenna angkanaya teai sipato' nikarimangnginta ri Isa Almasi Batarata: Kalumanynyangi, mingka Napa'jari kasi-asimi KalenNa untu' kaparalluannu ngaseng; sollanna battu ri kakasi-asianNa nukkulle a'jari kalumanynyang.

LAMPA-LAMPANA 16:18

Niaki pirangallo are sallona tuli amminawang anjo bainea akkiok-kio' kamma anjo. Sa'genna takkulleami sa'bara' Paulus napakamma; jari assailemi Paulus, nampa nakana ri anjo rohna setanga, “Lanri arenNa Isa Almasi, kusuroko assulu' battu ri anne bainea!” Anjo wattua, assulu' memammi anjo rohna setanga battu lalang ri kalenna anjo bainea.

MARKUS 16:17

Na la'jari buttia angkanaya tappaki ke'nanga, lanabongkami setanga lalang arengKu; la'bicarai ke'nanga lalang a'rupa-rupa bicara tenaya napahangi ke'nanga.

YAKOBUS 2:5

U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.

1 PETRUS 4:10

Massing annarima ngaseng mako passare pakkulle battu ri Allata'ala; anjo passarea tena nasangkamma-kamma. Lanri kammana, urusu' bajiki anjo passareNa Allata'ala; parallui massing nupake anjo pakkullea untu' kaparalluang nupa'juluia ngaseng.

LAMPA-LAMPANA 4:7

Nierammi Petrus siagang Yohanes mae ri dallekanna ke'nanga. Nikuta'nammi ri ke'nanga angkana, “Antekamma batenu amballei anjo tau pesoka? Kagassingang apa yareka koasa battu kemae nupake anggaukangi anjo kammaya?”

LAMPA-LAMPANA 2:22

Sikamma sari'battangku tu Israelka! Pilangngeri anne apa kupaua: Anjo Isa, battua ri Nazaret, nisarei tugasa' ri Allata'ala untu' ikau ngaseng. A'nassa sikalimi anjo lalang ri gau'-gau' appakalannasa' siagang apa-apa tenaya narapiki akkala'nu, le'baka Nagaukang Allata'ala ri tangnga-tangnganu lalang ri KalenNa anjo Isa. Yangasenna anjo massing nuassemmi.

LAMPA-LAMPANA 2:36

Iaminjo saba'na namusti naasseng tojeng-tojeng sikontu bansa Israel angkanaya anjo Isa, le'baka nusalli', Iatommi anjo Isa le'baka Naangka' Allata'ala a'jari Batara siagang Karaeng Tumappasalamaka!”

MATIUS 10:9

Teako angngerangi doe' lanubokong ri lampanu, baji' na doe' bulaeng, doe' pera', yareka doe' tambaga.

MATIUS 7:22

Punna narapi' sallang allonna niadeli taua, jai tau lakkiok-kio' ri Nakke angkana, ‘O, Batara, o, Batara, sai lalang arenTa tonji le'ba' kupabattu pappasanNa Allata'ala? Sai lalang arenTa tommi le'ba' kubongka setanga, anggaukangi gau' appakalannasaka?’

2 KORINTUS 6:10

Manna nanipakasi'na pa'maitta, mingka tuli rannujaki'. Kasi-asi maki' nicini', mingka jaimi tau nipa'jari kalumanynyang. Tena nicini' apa-apanta, mingka sikontutojenna nia' ngasemmi ri katte sikontu apa-apaya.

YOHANES 19:19

Ri kayu salli'Na Isa nia' nasuro tannang Pilatus tulisang angkanaya: “Isa battu ri Nazaret, Karaenna Tu Yahudia”.

2 KORINTUS 8:12

Punna rellako assare, ma'nassa laNatarimai Allata'ala anjo passarenu. Lanatarimai situru' pakkullenu, tena nasituru' apa tenaya ri kau.

MARKUS 14:8

Anne bainea le'ba'mi nagaukang apa akkullea nagaukang. Lanri naminynya'-minynyakingKu, napasadiaMa' lanitarawang genteng tenanapa narapiki wattunna.

1 KORINTUS 4:11

Sa'genna kamma-kamma anne nakasia'mi ikambe nikanaya cipuru' siagang atturere; care-carena ikambe ia mami ammantang niaka ri kalenna ikambe; nisessa maki' ri taua; tenamo tampa' pammantanganna ikambe;

LAMPA-LAMPANA 3:5

Nicinikimi ke'nanga ri anjo tau pesoka, na'minasa anjo tau pesoka lanisare apa-apa ri ke'nanga.

LAMPA-LAMPANA 3:7

Nampa nata'gala' Petrus lima kananna anjo tau pesoka, na nabantu ammenteng. Ajari kassa' memammi silalonna bangkenna anjo tau pesoka.