KALAPPASSANG 14:21 - KITTA' MATANGKASA'

²¹ Nampa napajonjomo limanna Musa ri tompo'na tamparanga, nampa appabattumo Batara anging battu raya ammiri' sanna' kancanna, sa'genna ammunduru'mo je'ne' tamparanga. La'busu' bangngi ammiri' anjo anginga, siagang napinrami anjo tamparanga a'jari butta kalotoro'.

KALAPPASSANG 14:21 Referans Kwoze

YESAYA 63:12

Kemae Batara le'baka anrurungangi Musa siagang limanNa makassaka, ambage ruayai je'neka ri dallekanna ke'nanga sollanna masahoro' arenNa satunggu-tungguna?

KALAPPASSANG 15:8

Kituiki tamparanga, ta'gulung tinggi je'neka, ammenteng kassa' rapang tembo', sa'genna akkulle niolo dapara'na tamparanga.

PAMMUJI 66:6

Napinrai tamparanga a'jari butta kalotoro', nalimbangngi boe-boena ikambe a'jappa bangkeng. Na marannumo ikambe lanri panggaukanNa.

YESAYA 51:10

IKatte todong ampakalotoroki tamparanga, je'ne' tamparang lantanga. IKatte appare' oloang lalang ri anjo je'neka, sollanna akkulle a'limbang sikamma tau Kipasalamaka.

PAMMUJI 78:13

Nabage ruai tamparanga, nampa napalimbang ke'nanga; napaentengi je'neka sangkamma tembo' pammantangngang je'ne'.

PAMMUJI 74:13

Lalang kagassingang lompo naKipata'bage tamparanga, na Kireppe' ulunna sikamma naga tamparanga.

NEHEMIA 9:11

Untu' Kiparekang oloang ummatTa, kipuei tamparanga; Kipalimbangi ke'nanga ri butta kalotoro'na tamparanga. Tallang ngaseng lalang je'ne' sikamma tau angngondanga, sanrapang batu tallang ri tamparang karrasaka.

YOSUA 4:23

Caritakangi ke'nanga angkanaya Karaeng Allata'alanu ampa'jari kalotoroki je'ne'na anjo Binanga Yordan untu' ikau ngaseng sa'gennu akkulle a'limbang ngaseng anta'leang, sangkamma Napa'jari kalotoro'na Tamparang Alara' untu' ikambe,

PAMMUJI 136:13

Tamparang Alara' Nabage ruai; pangngamaseanNa sa'genna satunggu-tungguna;

KALAPPASSANG 14:16

Angkaki takkannu nanupajonjo ri tompo'na tamparanga. Na lata'bage rua anjo je'neka sa'genna akkulle a'limbang tu Israel, a'jappa irawa ri dapara'na tamparanga, ia kalotoroka.

YESAYA 51:15

Saba' iNakkemi Karaeng Allata'alanu, ampa'jalloki tamparanga siagang ampamarrungi bombanna. Kaminang Makoasaya, iaminjo arengKu.

AYUB 26:12

Napadundui tamparang lompoa lanri koasaNa siagang Naballassi Rahab lanri kaporeanNa.

LAMPA-LAMPANA 7:36

Iaminjo Musa ampimpingi bansa Israel assulu' battu ri Mesir; iami anggaukangi anjo gau'-gau' appakalannasaka ri Mesir, ri Tamparang Ejaya, kammayatompa ri parang lompoa patampulo taung sallona.

PA'JARIANG 8:1

Tena nikaluppai Nuh ri Allata'ala siagang sikamma olo'-olo' niaka naagang lalang ri anjo kappalaka. Napa'nia'mi Allata'ala anging mammirika, sa'genna appakkaramulamo naung anjo je'neka.

KALAPPASSANG 7:19

Nakana Batara ri Musa, “Suroi Harun angngallei takkanna nampa nupajonjo mae ri tompo'na sikontu binangaya, sikamma solonganga siagang sikamma kollanga ri Mesir. La'jari ceraki je'ne'na, siagang lania' cera' ri sikontu pa'rasanganga, ba'lalo manna lalang ri sikamma dorong kayua siagang sikamma katoang batua.”

KALAPPASSANG 14:20

sa'genna nia' ri alla'na pasukang Mesir siagang pasukang Israel. Angngerammi sassang anjo rammanga, sa'genna sikabusu'na bangngia takkulleai sireppesi anjo ruaya pasukang.

YOSUA 2:10

Nalangngere'mi ikambe kabara'na, angkana antekamma bateNa Batara ampa'jari kalotoroki Tamparang Alara' ri dallekannu ngaseng, ri wattunna nubokoi Mesir. Nalangngere' tommi ikambe kabara'na angkana antekamma batena nubuno Sihon siagang Og, iamintu rua karaeng bansa Amori ri rayanganna Binanga Yordan.

2 KARAENG-KARAENG 2:8

Nala'gasimi jubana Elia, nampa nagulung siagang napatunrung ri tompo'na je'neka ri anjo binangaya. Nata'bage ruamo anjo je'neka, sa'genna akkullemo Elia siagang Elisa a'jappa ri dapara'na kalotoroka anjo binangaya.

YESAYA 23:11

Naangka'mi Batara limanNa irateanna tamparanga siagang Nagulummi sikamma kakaraenganga. Assaremi parenta sollanna niancuru' sikamma benteng pattahanganna Funisia.

YESAYA 43:16

Le'baki appare' Batara se're oloang a'limbang tamparang, allalo ri je'ne' a'gamarrunga.

YESAYA 50:2

Angngapa namanna sitau ummakKu tania' appiali, wattungKu battu angkioki ke'nanga? Maka a'mereki ke'nanga lanri nakapangi angkana takkulleA' allappassangi siagang ampasalamaki ke'nanga? Sikontutojenna, lanri parentaKu na'jari kalotoro' tamparanga, sikamma binangaya Kupa'jari parang lompo, sa'genna mate ngaseng jukuka na'rasa parru.

YESAYA 63:13

Kemae Batara anrenrengai ke'nanga a'jappa ilalang ri je'ne' lantanga? Rapang jarang allalo ri parang lompoa, tena le'bakai tatto'ro ke'nanga.”

HABAKUK 3:8

O Batara, maka lanri tamparang kutadeng na nai' larroTa? Maka binanga-binangaya ampakanassuKi'? Kibaei rammanga a'jari jarang siagang kareta bundu', ri wattu Kisarena pammetang ummatTa.

AYUB 38:24

Maka nuassengi tampa' pammantanganna mataalloa? Yareka battu kemae assala'na anging battu rayaya?

PAMMUJI 148:8

he kila' siagang bosi eska siagang rammanga, anging kancang mannurukia ri parentaNa Batara!

YESAYA 44:27

INakke angkana mae ri tamparanga: esakko! INakke ampa'jari kalotoroki sikamma binanganu.