IBRANI 13:15 - KITTA' MATANGKASA'

¹⁵ Lanri kammana, tete ri Isa, paralluki' tuli mammuji-muji ri Allata'ala; iaminjo a'jari koro'bang sukkurutta mae ri Ia, nipassareanga lalang kana-kana nipaua untu' ampakala'biriki arenNa.

IBRANI 13:15 Referans Kwoze

PAMMUJI 50:14

Assare mako koro'bang sukkuru' mae ri Allata'ala, rupai janjinnu mae ri Kaminang Tinggia.

ROMA 12:1

Sikamma sari'battangku! Sanna' baji'Na Allata'ala mae ri katte. Iaminjo saba'na nakupala' dudu ri kau ngaseng sollanna nupassareang sikontu batangkalennu a'jari koro'bang attallasa', siagang matangkasaka, kammayatompa nikarannuanga ri atinNa Allata'ala. Mustina kammaminjo caranu anynyomba mae ri Allata'ala.

1 PETRUS 2:5

Ikau sanrapang ngasengko batu-batu mattallasaka. Lanri kammana paralluko ampassareangi kalennu untu' nipake ambangung Balla' rohaniNa Allata'ala. Lalang kammana anjo a'jari mako imang-imang mae ri Allata'ala lalang ri katallassannu; siagang tete ri Isa Almasi angngerang mako koro'bang rohani mae ri Allata'ala, iamintu koro'bang nitarima bajika ri atinNa Allata'ala.

HOSEA 14:2

He bansa Israel, ammotere' mako mae ri Karaeng Allata'alanu! Passabakkang dosanu nutappeccoro' siagang tu'guru'.

YESAYA 57:19

LaKusarei kasannangngang sikontu taua, baji' tau ambania kammayatompa tau bellaya. LaKupakabajiki ummakKu.

2 PATTOTTORANG 33:16

Nampa napakabaji' tampa' pakkoro'bangngang panynyombanga mae ri Batara, nampa assare anjoreng koro'bang pappasiama' siagang koro'bang sukkuru'. Sikontu tu Yehuda nasuro kabusuki anynyomba mae ri Karaeng Allata'alana Israel.

PAMMUJI 50:23

Tau assarea koro'bang sukkuru' salaku koro'banna, iami ampakalompoA', siagang mae ri tau appasadiaya oloang laKupicinikiangi kasalamakkang battua ri Nakke.”

KAIMANGNGANG 7:12

Punna nipassareang anjo koro'banga untu' appala' sukkuru', anjo olo'-oloka musti nikoro'bangkangi siagang roti tenaya nammake pa'gambang. Anjo rotia akkullei kapala', nipareka battu labu' nipasileoka minynya' zaitun, akkulle tongi roti kalotoro' nipisika siagang nisapua siagang minynya', yareka kanrejawa labu' nipasileoka siagang minynya' zaitun.

MATIUS 11:25

Anjo wattua appala' doammi Isa Nakana, “O ManggeKu, Batara Makoasaya ri langika siagang ri linoa! Appala' sukkurukKa' ri Katte, lanri Kirahasiakanna ngaseng anne mae ri tau cara'deka siagang tau niaka pangngassenganna; mingka Kipappiassengangi mae ri tu tenaya sikolana.

2 PATTOTTORANG 7:6

Sikamma imanga ammentengi ri tampa' le'baka nipattantu untu' pammantanganna ke'nanga; assidallekangi ke'nanga siagang tu Lewi ammujia ri Batara siagang musi' le'baka napare' Daud, nampa akkelong iamintu kelongang, “Mannannungangi PangamaseanNa!” situru' napassuroanga Daud. Sikamma imanga appasa'rai tarompe' nampa sikontu ra'yaka ammenteng kabusuki.

1 PETRUS 4:11

Inai-nai appabattu biritta, musti napabattui biritta battua ri Allata'ala; inai allayani ri paranna tau, musti allayani situru' kagassingang battua ri Allata'ala; sollanna ilalang yangaseng-ngasenna, akkullemi nipakala'biri' Allata'ala tete ri Isa Almasi. Iami Makoasa siagang siratanga nipakala'biri' sa'genna satunggu-tungguna. Aming.

EFESUS 2:18

Tete ri Almasi, siagang lanri RohNa Allata'ala se'rea, akkulle maki' a'reppese' mae ri Manggea, baji' na tu Yahudi yareka bansa maraenga.

PAMMUJI 118:19

Sungkeanga' pakke'bu' lompona Balla'Na Batara, sollangku antama' siagang appala' sukkuru' ri Ia.

PAMMUJI 18:49

napasalamakka' battu ri sikamma balingku. Batara, Kisarea' pammetang mae ri musungku, Kikatutuia' battu ri sikamma tu sekkeka.

NEHEMIA 12:43

Anjo alloa jai koro'bang nipassareang ri Batara. A'rannu-rannui ra'yaka lanri nipakasunggui ri Allata'ala. Sikamma bai'-bainea siagang ana'-anaka amminawang tongi assua'-suara', siagang kalangngerammi sa'genna bella sa'ra karannuanna ke'nanga.

IBRANI 7:25

Lanri kammanami anjo nakkulle Isa sa'genna satunggu-tungguna ampasalamaki sikontu tau battua mae ri Allata'ala tete ri KalenNa; nasaba' attallasaki satunggu-tungguna sollanna akkulle Napappala'-palakkang sikamma anjo taua mae ri Allata'ala.

KOLOSE 1:12

kammayatompa appala' sukkuru' mae ri Manggea. Nasaba' iaminjo Manggea ampa'jari siratangko antarimai apa le'baka Napasadia Allata'ala untu' umma'Na lalang ri kakaraengang singaraka.

ROMA 6:19

Nasaba' sukkara' sikali nupahang, ammakema' pangngebarang mae ri nikanaya a'jari ata sollanna gampang nupahang. Riolo nupassareangi sikontu batangkalennu a'jari ata mae ri apa-apa ra'masaka siagang panggaukang ja'dalaka untu' kaja'dallanga. Kamma tomminjo ri kamma-kammaya anne, musti nupassareangi sikontu batangkalennu a'jari ata mae ri ero'Na Allata'ala, untu' anggaukangi ero'Na bawang Allata'ala.

YOHANES 10:9

INakkemi timungang. Inai-nai ammalo battu ri Nakke antama', iami lanipasalama'; assulu' antamai nanggappa kanre.

NEHEMIA 12:40

Jari battumi anjo ruaya kalompo' pakelong ri ampi'na Balla'Na Batara ri Yerusalem. Pantaranganna sikamma pamimpinga lalang ri kalompokku,

EZRA 3:11

Akkelongi ra'yaka kelong-kelong pammuji mae ri Batara, na napa'mole-mole nakelongang bageang kelong kala'busanga angkana, “Anjo Batara mabajiki; satunggu-tungguna pangngamaseanna mae ri Israel.” Sikontu ra'yaka amminawangi akkiok-kio' ma'rannu-rannu siagang mammuji ri Batara, lanri nipadongko'mi batu pundasina Balla'Na Batara ri Yerusalem.

2 PATTOTTORANG 29:31

Le'baki anjo nakanamo Hizkia, “Lanri kamma-kamma anne le'ba' kabusu' mako nitangkasi untu' Batara, jari salaku tanra sukkuru'nu, musti angngerangko koro'bang mae ri Balla'Na Batara.” Nampa sikontu tau hadereka anjoreng massing naerammi anjo passarea, ba'lalo nia' todong battu ri ero' kalenna tonji nangngerang olo'-olo' untu' nipassareang salaku koro'bang nitunu.

YOHANES 14:6

Appialimi Isa Nakana, “INakkemi oloanga untu' angngassengi Allata'ala, siagang untu' anggappai katallassanga. Tenanniakka tau akkulle battu mae ri Manggea punna tena nangngolo ri Nakke.

LUKAS 10:21

Anjo wattua rannumi nyawaNa Isa lanri nipantamakki ri RohNa Allata'ala. Nakanamo Isa ri ManggeNa, “O ManggeKu, Batarana langika siagang buttaya! Appala' sukkurukKa' ri Katte, lanri Kicokkoangi anne rahasiaya mae ri tau cara'deka siagang tau niaka pangngissenganna. Mingka Kipappiassengangi mae ri tau tenaya sikolana. Iaminjo Kikarannuanga ri atinTa.

PAMMUJI 119:108

Kitarimai pappala' doang sukkurukku, o, Batara, siagang Kiajarakka' hukkung-hukkunTa.

YEREMIA 33:11

Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

YEREMIA 33:18

tuli lania' imang-imang battu ri suku Lewi allayaniA' siagang assare ri Nakke koro'bang olo'-olo', gandung, siagang passare nitunua.”

IBRANI 12:28

Lanri kammana, paralluki' appala' sukkuru' mae ri Allata'ala, lanri nitarimana battu ri Allata'ala, kakaraengang tenaya nakkulle ta'goccang. Paralluki' appala' sukkuru' siagang mappakala'biri' anynyomba mae ri Ia siagang malla', situru' cara Nakaerokia KalenNa Allata'ala.