IBRANI 1:7 - KITTA' MATANGKASA'

⁷ Ri sesena sikontu malaekaka, akkana kammai anne Allata'ala, “Napa'jari kammai anging malaeka'-malaeka'Na Allata'ala, siagang Napa'jari kammai pepe' palayang-palayanNa.”

IBRANI 1:7 Referans Kwoze

PAMMUJI 104:4

Anging Kipa'jari suroTa, na kila' a'jari palayanTa.

IBRANI 1:14

Jari punna kamma, apai sikontutojenna anjo malaeka'-malaekaka? Anjo ke'nanga, iamintu roh-roh allayaniai Allata'ala, siagang nisuroa ri Allata'ala antulungi sikontu tau lannarimaya kasalamakkang.

2 KARAENG-KARAENG 6:17

Nampa appala' doang Elisa angkana, “O Batara, dasi-dasi natassungke matanna palayangku sollanna akkulle accini'!” Niturukiammi pappala'na Elisa, sa'genna ri wattunna assaile palayanna, nacini'mi anjo monconga rassi siagang jarang na kareta a'rinra angkulilingi Elisa.

2 KARAENG-KARAENG 2:11

Lalang a'jappana ke'nanga, tuli sipa'bicarana. Ti'ring nia'mo se're kareta a'rinra nibeso' ri ruang kayu jarang a'rinra battu ampasisa'laki ke'nanga sipa'rua, nampa niangka' Elia nai' ri suruga ri anging barubu.

ZAKHARIA 6:5

Appialimi angkana, “A'lampai ke'nanga mae ri appaka oloang ri wattu le'ba'na ke'nanga andallekang mae ri Batarana sikontu linoa.

DANIEL 7:10

kammayatompa nia' pepe' a'lo'loro' battu ri anjo empoang kakaraenganga. Assa'bui tau allayani, siagang a'juta-jutai tau ammenteng ri dallekanNa. Nampa nipakaramulamo sidang pangadelanga, siagang nisungkemi kitta'-kittaka.

YESAYA 6:2

Ri tammuliliNa nia' malaeka' ammenteng kamma pepe' a'rinraya, massing ta'annang ka'nyi'na. Rua ka'nyi'na antongkoki rupanna, rua antongkoki kalenna, na rua ka'nyi'na maraenga untu' anri'ba'.

PA'JARIANG 3:24

Nampa irayanganna anjo kokoa, ri dallekanna pakke'bu antamaya, nia'mo sipa'rappungang malaeka' pajaga, siagang nia'mo se're pa'dang a'rinraya pepe'na, amminroa ri kere-keremae, anjagai agang mangea ri anjo poko' assarea katallassang. Jari tenamo manna sitau akkulle antama' siagang a'reppese' anjoreng ri anjo pokoka.

1 KARAENG-KARAENG 22:19

Nakanamo pole Mikha, “Kamma-kamma anne pilangngeri apa Napaua Batara! Kuciniki Batara ammempo ri empoang kala'biranNa ri suruga, siagang sikontu malaekaka ammentengi ri ampi'Na.