HOSEA 8:1 - KITTA' MATANGKASA'

¹ Nakana Batara, “Pasa'rai tanra bahayaya! Niaki musua ambunduki pa'rasangangKu rapang balangkoa' antamberoai apa lanakanrea! UmmakKu nadakkai parjanjiangKu siagang ke'nanga, siagang nabaliangi ajarang-ajarangKu.

HOSEA 8:1 Referans Kwoze

HOSEA 6:7

Mingka sangkamma Adam, nudakkai janjinnu mae ri Nakke.

PAOLE 28:49

Nia' se'reang bansa tenaya nuassengi bicaranna laNapabattu Batara battu ri cappa'na buttaya anne untu' angngewako. Rapang jangang-jangang rajawali labattui antamberoko.

HOSEA 5:8

Tuiki tarompeka ri Gibea! Pasa'rai tanra pakkioka untu' mange a'bundu' ri Rama! Ammarrangko sa'ra pa'bundukang ri Betel. Umba, tu Benyamin, majuko a'bundu'!

YEREMIA 4:13

Ciniki, ammumbami musua sanrapang rammang. Kareta-kareta pa'bundu'na rapangi anging barubu, jarang-jaranna gassingangngangi larina najangang-jangang rajawali. Cilaka maki'! Panra' maki'!

HABAKUK 1:8

Jaranna la'bi gassingi lari na macanga, siagang la'bi sekkeki na serigala cipuruka. Pasukang a'jaranna battui ri pa'rasangang-pa'rasangang bellaya; battui ke'nanga rapang balangkoa' antamberoi apa najakkalaka.

1 KORINTUS 15:52

Tanisanna-sannayai nalakajariang silalonna, ri wattunna kala'busang assa'ra tarompeka. Nasaba' ri wattunna assa'ra anjo tarompeka, lanipattallasa' poleammi ammotere' tau matea a'jari tubu mannannungang, siagang lanipinra ngasengki'.

MATIUS 24:28

Kemae nia' maya', anjoreng tommi nia' jangang-jangang pakanre mayaka.”

ZAKHARIA 11:1

He Libanon, sungke ngasengi sikontu pakke'bu'nu, sollanna nakanre pepe' poko'-poko' arasa'nu!

ZAKHARIA 9:14

LaNapappicinikangi KalenNa Batara mae ri umma'Na, sanrapangi kila' nipabuccu' ana'-ana' panaNa. Batara Kaminang Tinggia lappasa'ra' tarompe' pammatei maju a'bundu', nampa a'jappa maju lalang anging barubu battu timboro'.

ZEFANYA 1:16

Tuntunna anjo alloa assa'rai tarompeka siagang pakkio' bunduka battu ri pejuang-pejuang ambundukiai kota-kota niaka pattahanganna siagang menara-menara tinggina.

AMOS 9:1

Kuciniki Batara ammenteng ri ampi'na tampa' pakkoro'bangnganga. Napassareangi anne parenta kammaya, “Tunrung sarringi sikamma ulu bentenga ri BallakKu sollanna ta'goccang kabusu' pattiro-tiroanga. Rumbang kabusuki anjo sikamma benteng mae ri tuju ulunna taua. Tenaya namate laKubunoi lalang ri pa'bundukanga. Tena manna sitau lakkulle lari yareka ta'lappasa'.

AMOS 8:3

Ri anjo alloa sikamma kelong-kelonga ri balla' karaenga la'jari karruki. Kemae-kemae attambung mayaka, le'baka nipela' cokko-cokko.”

AMOS 3:6

Maka latena nannekkere' tau ri kotaya punna nalangngere' sa'ra tarompe' tanra pa'bundukanga? Maka akkullei natuju bala se'rea kota, punna tena Napabattui Batara?

YO"EL 2:1

Tuiki tarompeka, pasa'rai tanra bahayaya ri Bulu' Sion matangkasaka, ri pammantangnganNa Allata'ala. Annekkere' mako, he pandudu'na Yehuda! Nasaba' a'reppese'mi AllonNa Batara siagang tasalloami nabattu.

HOSEA 9:15

Nakana Batara, “Sikontu kaja'dallanna ke'nanga appakkaramulai ri Gilgal. AnjoremMa' appakkaramula birisi' mae ri ke'nanga. Lanri panggaukanna ke'nanga ja'dalaka, laKubongkai ke'nanga battu ri anne pa'rasangangKu. Tenamo nalaKukamaseangi ke'nanga; sikontu pamimpinna ke'nanga angngewa ngasemmi ri Nakke.

HOSEA 4:6

Ikau ngaseng, sikamma imanga, tena nujampangiA', jari ummakKu tena tommo najampangiA' sa'genna natuju bala ke'nanga. Nutollaki ajarang-ajarangKu. Jari, iNakke laKutolla' tongko, siagang ana'-ana'nu tena nalaKuani salaku imang-imangKu.

YEHEZKIEL 16:59

Nakana Batara Kaminang Tinggia, “LaKugaukangi mae ri kau situru' panggaukannu, lanri nudakkai sumpanu siagang parjanjiannu siagang iNakke.

YEHEZKIEL 7:14

Assa'rai tarompeka siagang sadia-sadia ngasemmi taua. Mingka tena manna sitau la'lampa mange ri tampa' pa'bundukanga, lanri sikontu taua nituju kabusuki ri pangngalarroinNa Allata'ala.

YEREMIA 51:27

“He karaeng niaka battu wara'! Assare mako pammatei untu' maju! Pasa'rai tarompeka sollanna allangngere' bansa-bansaya! Pagioki sikontu bansa-bansaya untu' mange a'bundu' angngewai Babel! Suroi kakaraengang Ararat, Mini, siagang Askenas untu' maju. Angkaki sitau panglima untu' ampimpingi anjo pa'bundukanga. Pagioki jaranga sanrapanga katimbanga jaina.

YEREMIA 48:40

Nakana Batara, “Rapang jangang-jangang rajawali attamberoa siagang ka'nyi'na takka'ranga, kammami anjo nia' se're bansa lantamberoi Moab.

YEREMIA 31:32

Mingka anjo parjanjianga tena nasangkamma parjanjiang Kupareka siagang boe-boena ke'nanga ri wattunna Kururungang assulu' ke'nanga battu ri Mesir. Manna pole Kurapang bura'nenna ke'nanga, mingka nadakkai ke'nanga parjanjiangKu siagang ke'nanga.

YEREMIA 6:1

A'lampako alliliangi kalennu, he sikamma tu Benyamin! Bokoi Yerusalem! Pasa'rai tarompeka ri Tekoa, siagang apparinrako pepe' ri Bet-Kerem salaku pammatei! Niaki battu wara' balaya siagang bahaya lompoa lantujuko.

YEREMIA 4:5

Tuiki tarompe'nu ri sikontu pa'rasangang! Bajiki batenu akkio' siagang lompoi. Suroi lari pandudu' Yehuda siagang Yerusalem mange ri kota-kota niaka tembo' pattahanganna.

YESAYA 58:1

Nakana Batara, “Gassingi ammarrang! Pauangi sikamma dosana ummakKu.

YESAYA 24:5

A'jari rantasaki buttaya lanri pandudu'na nadakkai sikamma parentaNa Allata'ala, napinrai sikamma apa le'baka Napattantu Allata'ala, siagang tanarupaiyai ke'nanga parjanjiang le'baka Napare' siagang ke'nanga untu' satunggu-tungguna.

YESAYA 18:3

He, ikau ngaseng niaka empo ri lino! Parhatikangi punna nipanai'mo sikamma banderaya ri coppo'na sikamma monconga!

2 KARAENG-KARAENG 18:27

Appialimi anjo perwiraya angkana, “Apaka nukana untu' ikauji bawang siagang karaennu nakunisuro ampabattui yangasenna anne? Tena! Nisuro tonga' a'bicara mae ri ra'ya' niaka ammempo irate ri anjo temboka lanuaganga angkanrei tai kalenna siagang angnginungi mea kalenna.”

YO"EL 2:15

Tuiki tarompeka ri Sion, bulu'Na Allata'ala, pa'la'bangi pappiassengang allo puasaya, apparekko passibuntulang lompo.

YEREMIA 49:22

Rapang jangang-jangang rajawali attambero siagang ka'nyi'na takka'ranga, kammami anjo musua labattu siagang antamberoi Bozra. Anjo alloa tantara Edom lamallaki rapang baine eroka ammana'.”