HAKING-HAKING 8:27 - KITTA' MATANGKASA'

²⁷ Iaminjo bulaenga napare' Gideon se're patung barhala. Nampa naboli' ri kamponna iamintu Ofra. Sikontu tu Israelka mange ngasemmi anjoreng anynyomba ri anjo patung barhalaya. Sa'genna tenamo najampangi Allata'ala, Batarana ke'nanga. Na iaminjo a'jari sanrapang sikko' mange ri Gideon siagang sikontu bija-bijanna.

HAKING-HAKING 8:27 Referans Kwoze

PAMMUJI 106:39

Lanri anjo sikamma panggaukanna a'jari ra'masa'mi ke'nanga, siagang tajarreka ke'nanga mae ri Allata'ala.

HAKING-HAKING 18:14

Anjo limaya mata-mata le'baka nikiring riolo angkanami mae ri agang-aganna, “Nuassengi angkanaya ri kalase'renna anne ballaka nia' patung nilapisi' pera'? Nia' todong patung-patung maraeng siagang Efod. Pikkiri' sai, apa musti nigaukang.”

HAKING-HAKING 17:5

Nakalenna untu' Mikha nia'mo se're tampa' panynyombanna. Appare'mi siapa are patung barhala siagang silawara' kaeng pannongko' barambang bajunna Imang lompoa. Nampa naangka' sitau ana'na a'jari Imang.

HAKING-HAKING 18:17

Tulusu'mi antama ri balla' anjo limaya mata-mata, nampa naalle anjo patung nilapisika pera' siagang patung-patung maraenganga, kammayatompa Efodka. Anjo turungka tu Lewia niaki ammenteng siagang anjo 600 tantara ri dallekanna pakke'bu' lompoa.

PAOLE 7:16

Sikamma bansa Napassareanga Karaeng Allata'alanu ri kakoasannu musti nuancuruki; teako kamaseangngi ke'nanga. Teako anynyombai ri rewata-rewatana ke'nanga, lanri anjo panggaukang kammaya napangngerangangko bala.

HAKING-HAKING 6:24

Appare'mi Gideon se're tampa' pakkoro'bangngang anjoreng, nampa naareng “Batara Kabattuanna Kasalamakkanga.” Anjo tampa' pakkoro'bangnganga nia' iji ri Ofra, iamintu ri kotana tu Abiezer.

KALAPPASSANG 23:33

Teako lappassangi ammantang anjo taua ri pa'rasangannu, sollanna tena nunynyomba ri rewata-rewatana ke'nanga na nudoraka mae ri Nakke. Punna anynyombako mae ri rewata-rewatana ke'nanga, tu'guru' mako antama' ri sikko'na kamateanga.”

HOSEA 2:2

Nakana Batara, “He ana'-anakKu, anjo amma'nu teaimi bainengKu, siagang iNakke teaiMa' bura'nenna. Lanri kammana anjo akkara-kara mako siagang ia, sollanna tenamo na'gau' bawang siagang assundala' pole.

YESAYA 8:20

Appiali mako kamma anne, “Pilangngeri ajaranNa Batara! Tau tenaya na'bicara situru' anjo pangngajaranga, tena panrannuanna.”

PAMMUJI 73:27

Lacilakai tau ambokoiaKi' Kiballassi tau tenaya majarre' mae ri Katte.

HAKING-HAKING 6:11

Ri se'reang allo battumi malaeka'Na Batara ri kota Ofra. Nampa ammempo ri rawanganna poko' kayu terpentin, iamintu poko' kayuna Yoas, tu battu ri golonganna Abiezer. Nia' ana'na niareng Gideon, sitabang anjama ase gandung ri pammaccokang je'ne' anggoroka. Nagaukang cokko-cokkoi anjo jama-jamanna sollanna tena naniciniki ri anjo tu Midian.

PAOLE 12:5

Ri sikontu daerana suku-suku Israel, ammilei Karaeng Allata'alanu se're tampa' sollanna akkulle bansata battu mange ri dallekanNa siagang anynyomba ri Ia.

PAOLE 7:25

Tunui sikamma patung-patung barhala nasombaya ke'nanga. Teako cinnai ri pera' yareka bulaeng niaka ri kalenna siagang teako allei untu' kalennu. Punna nudakkai anjo parentaya tena tamatenu, nasaba' Nakabirisi Karaeng Allata'alanu anynyombaya ri patung barhalaya.

HAKING-HAKING 8:26

Yangasenna anjo anting-antinga napassareang ke'nanga, nia' ruampulo kilo battala'na, tanirekengapi belo-belo maraenganga, kammaya rantea, kaeng ga'ga biasaya napake karaenna tu Midian, siagang rante niaka ri kallong untana ke'nanga.

HAKING-HAKING 8:28

Takkuleami ampanggaukang tu Midian. Nibetami ke'nanga ri tu Israelka. Jari amammi anjo pa'rasanganga sa'genna patampulo taung sallona, lalang tallasa'na ija Gideon.

KALAPPASSANG 32:4

Naallemi Harun anjo sikamma anting-antinga, nampa napasolong nampa napatiri' antama' ri katarang nappare' se're patung sapi. Nakanamo anjo bansaya, “He, Israel iaminne rewatanta, ia angngantarakki' assulu' battu ri Mesir!”

KALAPPASSANG 34:16

Punna a'bunting ana'-ana'nu siagang bai'-baine bansa maraeng, laninyonyoki ke'nanga ri anjo bai'-bainea untu' ambokoiA' nampa anynyomba ri rewata-rewatana ke'nanga.

HAKING-HAKING 2:2

Jari takkulleako appare' passikko' passijanjiang siagang tau niaka ammantang anrinni ri pa'rasanganga. Sikamma tampa' pakkoro'bangnganna ke'nanga musti nurumbangi'.’ Mingka tena nugaukangi anjo apa Kupassuroanga. Ba'lalo ta'bale'na nugaukanga!

HAKING-HAKING 2:3

Jari kamma-kamma anne pilangngeri! Tena nalaKubongka tu niaka ri anne pa'rasanganga punna tena nu'bundu' siagang ke'nanga. La'jari bali ke'nanga mae ri kau. Na lanaalleko sikko' sa'gennu amminawang turu' ansombai rewata-rewatana ke'nanga.”

PAMMUJI 106:35

Ba'lalo sibengkoro'mi ke'nanga siagang anjo bansa-bansaya, na naturuki cara tallasa'na tau tenaya naassengi Allata'ala.

YEHEZKIEL 7:20

Riolo nakalompoang pa'maiki paramata ga'gana ke'nanga, mingka lanri napakena ke'nanga untu' appare' barhala-barhala appakaringi'-ringi', Napa'jarimi Batara anjo barang-barang kammaya appakamalla'-malla'.

HOSEA 3:4

Kammami anjo passala'na bansa Israel; teai sipato' sallona tena karaenna yareka pamimpinna, tena koro'bang yareka tampa'-tampa' karama', tena barhala-barhala yareka jima'-jima' akkullea assungkeangi ke'nanga rahasiana allo labattua.