HAKING-HAKING 15:11 - KITTA' MATANGKASA'

¹¹ Nalangngere'na anjo a'lampami tu Yehudaya nia' 3.000 tau mange ri kali'bong batu niaka irate bulu' batu, ri Etam. Nakanamo ke'nanga anjoreng, “Simson, tenaka nanuassengi angkanaya nakoasaiki' tu Filistin? Apa anne nugaukang mae ri kambe?” Appialimi Simson angkana, “Musti kubalasaki apa le'baka nagaukang ke'nanga mae ri nakke.”

HAKING-HAKING 15:11 Referans Kwoze

HAKING-HAKING 14:4

Tanaassengai tau toana Simson angkana Batara ampagioki Simson na nagaukang anjo kammaya. Nasaba', a'boyai kasampatang Batara untu' ambunduki tu Filistin. Anjo wattua, nikoasai tu Israelka ri tu Filistin.

HAKING-HAKING 13:1

Dorakami pole umma' Israel ri Batara jari nibalang parekangi ri Batara, na nikoasai ke'nanga ri tu Filistin, patampulo taung sallona.

PAOLE 28:13

LaNapa'jariko Karaeng Allata'alanu pamimping ri alla'na bansa-bansaya, siagang teaiko tau ammina'-minawang. Punna tamamminrayako mannuruki mae ri sikontu parentaNa Batara kupassareanga mae ri kau anne alloa, pila' lasalewangangko siagang tena nule'ba' lammono'boko.

KAIMANGNGANG 26:25

Lappa'niakKa' pa'bundukang ri tangnga-tangnganu lanri nudakkaina parjanjiangKu siagang ikau. Siagang punna asse'reko ri kotanu untu' a'boya pa'la'langngang, lappabattuA' garring tenaya nakkulle niballei, sa'gennu tarpassa manyara mae ri musunnu.

PAOLE 28:43

Bansa maraeng niaka ammantang ri pa'rasangannu lapila' makoasai, nampa ikau pila' lakurangi koasanu.

HAKING-HAKING 15:10

Akkuta'nammi tu Yehuda mae ri tu Filistin angkana, “Apa saba'na na nubunduki ikambe?” Appialimi ke'nanga angkana, “Battuki' anne ero' anjakkalaki Simson, sollanna akkulle nigau' kamma batena appanggaukang mae ri kambe.”

HAKING-HAKING 15:12

Nakanamo ke'nanga, “Battui anne ikambe untu' ansikkokko nampa nipassareangko mae ri tu Filistin.” Nakanamo Simson, “A'janji mako rolong, angkanaya ikau talanubunoaja'.”

1 PATTOTTORANG 4:3

Ana' bura'ne kaminang toana Kaleb battu ri bainenna niarenga Efrat iamintu niarenga Hur. Turungang battua ri Hur iami ambangungi kota Betlehem. Ana'-ana'na Hur iamintu Etam, Pnuel, siagang Ezer. Etam nia' tallu ana'na bura'ne, iamintu niarenga: Yizreel, Isma, siagang Idbas, na sitau ana' baine, iamintu niarenga Hazelelponi. Pnuel ambangungi kota Gedor siagang Ezer ambangungi kota Husa.