HAKING-HAKING 13:5 - KITTA' MATANGKASA'

⁵ Punna lassu'mo ana'nu, tea sikaliko polongi uu'na. Nasaba' lalang nitianangang iji nale'ba' nipattantumo untu' a'jari tau attinja'. Iami labarjuang untu' allappassangi bansa Israel battu ri kakoasanna tu Filistin.”

HAKING-HAKING 13:5 Referans Kwoze

PAMMILANGNGANG 6:5

Lalang attinja'na takkulleai napolong uu'na yareka takkulleai accukkuru'. Lalang anjo wattua, anjo uu'na siagang janggo'na musti naboliki a'jari la'bu. Tassikkoki mae ri tinja'na sa'genna le'ba' anjo tinja'na ansa'laki kalenna untu' Batara.

1 SAMUEL 1:11

Nampa a'janji Hana angkana, “O Batara Kaminang Koasaya, Kiparhatikangi anne atanTa! Kiciniki kapa'risanna atanTa. Kiu'rangi siagang teaKi' kaluppai atanTa! Punna Kisare atanTa sitau ana' bura'ne, a'janji atanTa lanapassareang anjo anaka mae ri Katte lalang sikontu tallasa'na. A'janji tongi atanTa angkanaya talanipolongai uu'na.”

1 PATTOTTORANG 18:1

Siapa are sallona ribokoanganna, nabundukimi Daud tu Filistin sa'genna nabetamo ke'nanga siagang narampasa'mi kota Gad kammayatompa desa-desa niaka ri tammulilina.

1 SAMUEL 7:13

Kammaminjo nanibetamo tu Filistin. TaNapa'biangai Batara antama poleang ke'nanga ri daerana Israel, lalang attallasa'na ija Samuel.

2 SAMUEL 8:1

Siapa are sallona ribokoanganna Karaeng Daud nabundukimi pole tu Filistin. Nabetami ke'nanga siagang naallemi buttana ke'nanga.

LUKAS 1:15

La'jari tu nipakalompoi ri dallekanNa Allata'ala. Talangnginungai anggoro' siagang inungang terasa'. Pakkaramula battu ri nilassukanna lanirurungangi ri RohNa Allata'ala.

HAKING-HAKING 16:17

Kala'busanna nasungkemi rahasiana Simson. Nakanamo Simson, “Tena le'bakapi nipolong uukku. Le'ba'ma' nipassareang ri Allata'ala a'jari tau nipileNa. Appakkaramula ri lassukku a'jari tuattinja' memamma'. Punna nipolong uukku, tappela'mi kagassingangku, la'jari lammama' sangkamma tau biasaya.”

AMOS 2:11

Le'ba'mi Kupilei siapa are battu ri ana'-ana'nu untu' a'jari na'bi, siagang siapa are turungka untu' a'jari tu Pangawasa'. Sai anjo kammaya annabai, he tu Israel? INakke, Batara, anne akkana.