HABAKUK 3:16 - KITTA' MATANGKASA'

¹⁶ Kulangngere'na anjo kammaya, annekkere'mi atingku siagang amme'bere'mi muncengku. A'jari lammama' tena kagassingangku, kemae-kemae jappaku tatto'roi bangkengku. Sannanga' lattayang kabattuanna hukkunganNa Allata'ala mae ri tau battua a'bakka.

HABAKUK 3:16 Referans Kwoze

YEREMIA 23:9

Iaminne pasangku ri sesena na'bi-na'bia: Ancuruki atingku siagang annekkerekka'. Batara siagang kana matangkasa'Na ampa'jaria' rapang tau nasa'ring lanri jai duduna anggoro' kuinung.

HABAKUK 3:2

O Batara, kulangngereki passala' panggaukanTa, na napirassi pa'maikku eroka mappakalompo. Poro Kipaollei anjo panggaukang malompoTa na Kipa'nyata ri anne jammanna ikambe. Poro Kikamaseangi ikambe manna pole nabambang nyawaTa.

DANIEL 10:8

Nabokoia' anjoreng kale-kalengku, amparhatikangi anjo paccini' appata'bangkaya. Tenamo kusa'ring kagassingangku siagang pi'lasa' sikalimi rupangku.

PAMMUJI 119:120

Annekkerekka' lanri malla' ri Katte, annekkereki pa'maikku ri kaputusanTa.

PAMMUJI 91:15

Punna akkio' mae ri Nakke, laKupiali. Ri wattu kasukkarang, laKutulungi; laKulappassangi na Kusare kalompoang.

DANIEL 8:27

Nampa a'jari lammamo kusa'ring pakkasiakku, sa'gengku tu'guru' garring pirangallo are. Le'baki anjo ambangumma' nampa kugaukang ammotere' sikamma tugasakku untu' karaenga. Mingka lussakka' annawa-nawai anjo sikamma apa kucinika na tena nakkulle kupahang battuanna.

YEHEZKIEL 3:14

KakoasanNa Batara battu mae ri nakke sanna' heba'na, siagang ri wattungku Niangka' siagang Nierang ri RohNa, atingku sanna' pai'na siagang bambanna kusa'ring.

LUKAS 21:19

Punna sa'barakko siagang attahangko, lanipasalamakko.”

AYUB 30:17

Ri wattu bangngi tilu ngaseng buku-bukungku; tenammarina anno'do' pa'risi'na.

AYUB 30:30

A'jari le'lemmi bukkulengku; rapang nitunumi kalengku ri rammusu'.

PANGNGEBARANG 12:4

Tubaine bajika iami kalompoang pa'mai' siagang kate'neang mae ri bura'nenna, baine ampakasirikai bura'nenna sanrapangi garring lalang ri buku, ammanrakia.

PANGNGEBARANG 14:30

Pa'mai' sannanga napakabajiki tubua; angngiri mataya sanrapangi garring kamateanga.

YEREMIA 4:19

Tamaka sessana atingku, takutahangngami pa'risika. Takukulleami ampakasanannangi kalengku annenrengi nyawaku ri barambangku, lanri kulangngere'na sa'ra tarompeka, siagang gora assa'raya ero' a'bundu'.

YEREMIA 5:15

He umma' Israel, Napabattui Batara bansa battua ri pa'rasangang bella untu' ambundukiko. Anjo bansaya nia' memammi battu riolo dudu, tanuassengai nupahang bicaranna. Teai sipato' kassa'na ke'nanga,

PIRAUNG 1:13

Napaturungi pepeka battu ri langi' akkanrea sa'genna antama' ri atingku. Attannangi sikko' ri dallekangku untu' antu'guranga'. Nampa Nalappassanga' kale-kalengku ballasa' sila'busu' allo.

YESAYA 21:3

Linguma' kugappana anjo paccinika, sa'genna takkulleama' accini' siagang allangngere'. Malla'ma' siagang pa'risi'mi kusa'ring, rapang baine lamanaka.

YEREMIA 30:7

Battumi allo sannaka heba'na, allo tenaya sangkammanna. Untu' ummakKu, anjo alloa appakalussaki; mingka laKupasalamaki ke'nanga.”

PIRAUNG 1:20

O Batara, Kiparhatikanga', lussaki na puccala' atingku, ancuruki lanri dorakaku le'ba' laloa. Ri sikamma aganga nia' pammunoang, lalang balla' nia' kamateang.

DANIEL 10:9

Ri wattunna kulangngere' sa'ranna, tenamo kungngu'rangi sa'gengku tu'guru' tattinompang ri buttaya.