GALATIA 5:11 - KITTA' MATANGKASA'

¹¹ Na inakke, sari'battangku ngaseng, apa saba'na nakutuli nimusu punna kubirittakang angkanaya parallui anjo paratoranna sunnaka? Punna kamma memang anjo kubirittakanga, tenamo na'jari passala' punna kubirittakang anjo Salli'Na Almasi.

GALATIA 5:11 Referans Kwoze

1 KORINTUS 1:23

Mingka ikatte anne iaji bawang nibirittakang iamintu biritta ri passala'na Isa Almasi le'baka mate ri kayu sallika. Anjo birittaya napakanassui pa'mai'na tu Yahudia, siagang nicini' a'balle-ballei ri bansa-bansa maraenga. Na bansa maraenga nakanai kadongokang anjo kammaya.

GALATIA 6:12

Inai-nai ampalecei kalenna ri apa-apa lahereka, iaminjo ke'nanga ero' ampassako anturuki paratorang sunnaka. Mingka lanri malla'naji nisessa ri tu Yahudia na'gau' kamma ke'nanga, passabakkang salli'Na Almasi.

GALATIA 4:29

Anjo wattua, anjo ana' nilassukanga lanri ero'Na RohNa Allata'ala lanisessai ri ana' nilassukanga lanri ero'na rupataua. Kamma tomminjo ri kamma-kammaya anne.

GALATIA 2:3

Anjo Titus, kuaganga sipa'lampang, tu Yunani. Mingka tena nanipassai anturuki paratoranna sunnaka;

1 KORINTUS 15:30

Siagang apa tommi matu-matunna ikambe tuli ero' andallekangi bahayaya?

LAMPA-LAMPANA 21:21

Na kamma-kamma anne nalangngere'mi ke'nanga angkanaya le'ba'mi nuajara' sikamma tu Yahudi niaka ammantang ri tangnga-tangngana bansa maraenga, sollanna nabokoimo ke'nanga anjo sikamma parentaNa Allata'ala napabattua Musa. Nupakainga'mi ke'nanga sollanna tenamo nanasunnaki ana'-ana'na ke'nanga, yareka tenamo nanaturuki ke'nanga ada'-ada'na tu Yahudia.

GALATIA 6:17

Kammayatompa pole, poro tena lalomo manna sitau ansusaia' pole; nasaba' nia'mi butti-buttina ri kalengku, angkanaya ma'nassa ana' gurunNa' Isa.

1 KORINTUS 1:18

Nasaba' anjo kabara' kamateanNa Isa Almasi a'jari kabara' balle-ballei mae ri tau lamangea ri kapanrakanga. Mingka untu' ikatte tu nipasalamaka ri Allata'ala, anjo kabaraka iami a'jari pammatei ri Napa'nyatana kakoasanNa Allata'ala.

LAMPA-LAMPANA 21:28

Nakkio' ke'nanga angkana, “He, tu Israelka, bantu saiki'! Iaminne tau le'baka a'lampa mange-mange angngajaraki sikontu taua pangngajarang angngewai bansa Israelka, siagang andakkai sikamma parentaNa Allata'ala, le'baka napabattu Musa; kammayatompa nahina tongi anne Balla'Na Batara. Na kamma-kamma anne ba'lalo naerammi bansa-bansa maraenga antama' ri Balla'Na Batara, anra'ma'-ra'massi anne tampa' matangkasaka!” (

LAMPA-LAMPANA 16:3

Ero'mi Paulus sollanna amminawang Timotius ri ia; jari nasunna'mi Timotius. Nasunna'mi Timotius, lanri naasseng ngasengi tu Yahudi niaka ammantang anjoreng ri daeraya, angkanaya tu Yunani manggena anjo Timotius.

YESAYA 8:14

Lanri sanna'na tangkasakKu, iNakke la'jari batu natatto'roi ra'ya' Yehuda siagang Israel, siagang sikko' angngalleai pandudu'na Yerusalem.

GALATIA 3:1

Sikamma sari'battangku niaka ri Galatia! Teai sipato' dongo'nu. Maka inai le'ba' angngajara' salako? Le'ba'mi kupakasingara' baji'-baji' mae ri kau battuanna anjo kamateanNa Almasi ri kayu sallika!