GALATIA 3:16 - KITTA' MATANGKASA'

¹⁶ Anjo janji-janjinNa Allata'ala, KalenNa ampareki untu' Abraham siagang untu' sossoranna Abraham. Tena nanakana lalang ri Kittaka, “siagang untu' sikamma tau sossoranna Abraham,” battuanna jai tau. Ia niaka tattulisi' iamintu, “siagang untu' sossorannu,” battuanna sitauji bawang, iamintu Almasi.

GALATIA 3:16 Referans Kwoze

ROMA 4:13

A'janjimi Allata'ala mae ri Abraham siagang sossoranna, angkanaya anne linoa la'jari warisi'nai Abraham. Na'janji kamma anjo Allata'ala teai lanri naturukinna Abraham hukkung-hukkung agama Yahudia, passangalinna lanri tappa'na mae ri Allata'ala sa'genna nitarimamo a'jari tau nikarannuang ri atinNa Allata'ala.

LUKAS 1:55

Batara tamakkaluppa ri janjinNa baji' ati ri Abraham na sossorang satungguna.”

ROMA 4:16

Jari lanri tappa'naji taua mae ri Allata'ala nania' anjo janjinNa Allata'ala. Iaminjo a'jari pammatei mattantua mae ri sossoranna Abraham, angkanaya nisareang bawang-bawanji ke'nanga anjo janjia battu ri Allata'ala; teai untu' tau mannurukiaji bawang ri hukkung agama Yahudia, passangalinna untu' tau tappaka pole ri Allata'ala, sangkamma tappa'na Abraham mae ri Allata'ala. Nasaba' iaminjo Abraham bapa' rohanita ngaseng.

PA'JARIANG 12:7

Napappicinikammi KalenNa Batara mae ri Abram na Nakana ri ia, “Iaminne pa'rasangang laKupassareanga mae ri sossorannu.” Nampa ambangummo Abram se're tampa' pakkoro'bangngang anjoreng untu' Batara, ia le'baka ampappicinikangi KalenNa mae ri ia.

GALATIA 3:8

Le'ba' memammi nipau lalang ri Kittaka angkanaya akkullei assibajiki ammotere' bansa maraenga siagang Allata'ala punna tappa' ke'nanga mae ri Ia. Le'ba'mi nipauang la'bi riolo Abraham anjo Kabara' Bajika ilalang ri janji angkanaya, “Battu ri kaumi nalaNabarakkaki Allata'ala sikontu rupataua ri lino.”

PA'JARIANG 12:3

LaKubarakkaki sikamma tau ambarakkakiako siagang laKutunrai sikamma tau antunrayako. Siagang lanri ri kau nalaKubarakkaki sikontu bansaya ri lino.”

LAMPA-LAMPANA 3:25

Sikontu anjo apa-apa Napa'janjianga Allata'ala lalang ri na'bi-na'biNa, untu' ikau ngaseng. Lalang ri anjo parjanjiang Napareka Allata'ala mae ri boe-boenu, kammai anne kananNa Allata'ala mae ri Abraham, ‘Battu lalangi ri sossorannu nalaKubarakkaki sikontu bansaya ri anne linoa.’ Jari anjo parjanjianga untu' ikau ngaseng todong.

PA'JARIANG 21:12

Mingka Nakanamo Allata'ala ri Abraham, “Teako ranggaselai ri passala'na anjo atannu Hagar siagang ana'na. Turukimi ero'na Sara, nasaba' battu ri Ishak sallang nalanugappa anjo turungang le'baka Kupa'janjiang.

KOLOSE 3:11

Kale'bakkanna allanynya'mi sikontu passimmaraenganna tu Yahudia siagang bansa-bansa maraenga, yareka tu nisunnaka siagang tu tenaya nisunnaki; tenamo passimmaraengang ri bansa battu-battua siagang tau bambalaka; tenamo passimmaraengang ri tu a'jari ataya siagang tu bebasaka; nasaba' Almasimi a'jari yangaseng-ngasenna. Asse're ngasemmi ke'nanga lalang ri Almasi!

PA'JARIANG 15:5

Nierammi Abram ri Batara assulukang, nampa Nakana Batara ri ia, “Ciniki langika, siagang coba sai nubilang sikamma bintoenga; lasangkammai anjo bintoenga jaina turungannu.”

1 KORINTUS 12:27

Ikau ngasemmi antu sanrapang tubuNa Almasi siagang ikau ngaseng tommi antu sanrapang anggota-anggotana anjo tubua.

1 KORINTUS 12:12

Almasi sanrapang tubuna taua; anjo tubua se'reji, mingka jai anggotana. Sikontu anjo anggota tubua, manna najai, mingka a'jari se'rei ilalang ri tubua.

ROMA 12:5

Kammatommi anjo ri katte ngaseng. Manna nakijai, mingka a'jari se're maki' batangkale lanri assileo' maki' lalang ri Isa Almasi. Siagang nipasisambung ngaseng maki' a'jari anggota-anggota lalang ri se'rea batangkale.

PA'JARIANG 49:10

Yehuda lanna'gala' takkang kakaraengang. Turunganna lammarenta satunggu-tungguna. Bansa-bansaya langngerangi passare, nasu'ju' tundu' ri dallekanna.

KOLOSE 2:19

sa'genna tenamo natanjeng ke'nanga mae ri Almasi, a'jaria kapala mae ri ke'nanga. Irawangang pimpinanNa Almasi, sikontu tubua niparakai siagang nipa'jari se're ri passisambung-sambunganna, kammayatompa a'bakka' situru' ero'Na Allata'ala.

EFESUS 5:32

Anjo ayaka lantang sikali battuanna. Kupasinrapangi anjo antekamma passisambunganNa Almasi siagang jama'aka.

MATIUS 1:1

Iaminne pattottorang boe-boeNa Isa Almasi, sossorang battua ri Daud, siagang sossorang battua ri Abraham. Punna nisusungi battu ri Abraham sa'genna Daud, iaminne areng-arenna ke'nanga:

ROMA 9:4

Ike'nammi umma' nipilea siagang nipa'jaria ana'-ana' KalenNa ri Allata'ala, kammayatompa le'baka angkasiaki kakoasanNa Allata'ala. A'janjimi Allata'ala mae ri ke'nanga, siagang nisaremi ke'nanga hukkung-hukkung agama. Nipauammi ri Allata'ala ke'nanga angkanaya antekamma batena ke'nanga musti anynyomba ri Allata'ala; kammayatompa natarimami ke'nanga janji-janjinNa Allata'ala.

2 KORINTUS 11:22

Maka tu Ibrani anjo ke'nanga? Inakke tu Ibrani tonja'. Tu Israel ke'nanga? Inakke tu Israel tonja'. Turungannai Abraham ke'nanga? Inakke pole kamma tonja'!

GALATIA 3:19

Jari punna kamma, untu' apa padeng nanipassareang anjo hukkung agamaya? Pialinna iamintu angkanaya, anjo hukkunga nipappitambangi sollanna nipa'nassa gau' dosana rupataua. Wattu tappakena anjo hukkung agamaya sa'gennaji kabattuanna sitau sossoranna Abraham le'baka nipau lalang ri janjinNa Allata'ala mae ri Abraham. Anjo hukkung agamaya, malaeka'-malaeka' ampabattui tete ri rupataua.