GALATIA 2:8 - KITTA' MATANGKASA'

⁸ Nasaba' Allata'ala assarei pakkulle Petrus a'jari tunisuroNa mange ri bansa Yahudia. Iatommi assarea' pakkulle a'jari tunisuro mange ri bansa-bansa maraenga.

GALATIA 2:8 Referans Kwoze

LAMPA-LAMPANA 9:15

Mingka Nakanamo Batara ri Ananias, “A'lampamako! Nasaba' le'ba'mi Kupile anjo taua a'jari palayangKu; sollanna akkulle napabattu arengKu mae ri bansa-bansa maraenga, tenaya nantama' agama Yahudi, siagang ri sikamma karaenga, kammayatompa ri umma' Israel.

LAMPA-LAMPANA 22:21

Mingka Nakanamo pole Batara mae ri nakke, ‘A'lampamako, nasaba' laKusuroko a'lampa mange ri tampa'-tampa' bellaya, mange ri bansa-bansa maraenga.’ ”

LAMPA-LAMPANA 21:19

Le'bakki' massing sijamakki, nacaritami Paulus mae ri ke'nanga sikontu apa le'baka Nagaukang Allata'ala lalang ri kalenna ri tangnga-tangngana bansa-bansa maraenga.

LAMPA-LAMPANA 15:12

Tenamo nania' akkana sikontu anjo tuniaka assirapakkang. Nampa napilangngerimo ke'nanga Barnabas siagang Paulus ancarita poleangi sikamma anjo gau'-gau' appakalannasa' le'baka Nagaukang Allata'ala lalang ri kalenna ke'nanga ri tangnga-tangngana bansa maraenga.

1 KORINTUS 15:10

Mingka lanri pangngamaseanNa Allata'ala, nakunipa'jarimo sangkamma anne ri kamma-kammaya anne. Siagang tena nasia-sia pammopporanNa Allata'ala mae ri nakke. Ba'lalo inakkemi kaminang anjama terasa' ri sikamma tunisuroa. Mingka sikontutojenna anjo sikammaya teai usahaku; anjo usahaNa Allata'ala, mangngamaseanga mae ri nakke, siagang niaka angngaganga' sipanjamang.

1 KORINTUS 9:2

Punna padeng taeroka taua angngakuia' salaku tunisuroNa Allata'ala, kaminang sike'de'na ikau numangakui! Nasaba' a'jarinumo tu Karisteng, iami anjo a'jari butti angkanaya tunisuroNa memang tonga' Allata'ala.

LAMPA-LAMPANA 8:17

Naangka'mi limanna Petrus siagang Yohanes, irateanganna sikamma anjo tu Samariaya; jari natarimami ke'nanga RohNa Allata'ala.

LAMPA-LAMPANA 4:4

Mingka jaimi tau le'bakamo allangngereki anjo napangngajarrang tunisuroa, a'jari tappa'. Katambammi jaina ke'nanga a'jari kira-kira limassa'bu tau.

LAMPA-LAMPANA 1:8

Mingka punna battumo RohNa Allata'ala mange ri kau, langgappa mako koasa. Na la'jari mako sa'bingKu ri Yerusalem, ri sikontu Yudea, ri Samaria, sa'genna ri cappa'na linoa.”

KOLOSE 1:29

Untu' yangasennami anjo passalaka nakuanjama terasa'mo. Usaha tojeng-tojemma' siagang sikontu pakkulle Napassareanga Almasi mae ri nakke; na anjo anjamaya lalang ri kalengku sanna' makoasana.

GALATIA 3:5

Allata'ala assareko RohNa, naNapappicinikang gau'-gau' makoasaNa ri tangnga-tangnganu. Maka lanri nugaukanna hukkung-hukkung agamaya, naNagaukang Allata'ala anjo kammaya? Yareka lanri nulangngere'namo anjo Kabara' Bajika siagang lanri tappa'numo mae ri Almasi?

LAMPA-LAMPANA 19:26

Na kamma-kamma anne massing nucini'mi siagang massing nulangngere'mi, apa nagaukanga anjo Paulus. Napaui angkana anjo rewata-rewata napareka rupataua tena sikali nakkulle nikana rewata. Najaimo tau akkulle a'jari tappa' ri anjo pangngajaranna; tena na ri Efesus bawang mingka a'birimmi a'la'bang todong ri sikontu daera Asia.

1 TESALONIKA 2:13

Nia' pole maraengannaya a'jari saba' natuli appala' sukkuru' ikambe mae ri Allata'ala. Iamintu, angkanaya ri wattunna napabattu ikambe anjo biritta battua ri Allata'ala, nupilangngeri siagang nutarimai anjo birittaya, teai salaku biritta battu ri rupataua, passangalinna salaku biritta battu ri Allata'ala. KalenNa Allata'ala anggaukangi anjo jama-jamanga lalang ri kalennu, ia matappaka mae ri Almasi.