GALATIA 1:8 - KITTA' MATANGKASA'

⁸ Lappassammi nihukkung ri Allata'ala anjo tau ambirittakangai “kabara' baji'” simmaraenga siagang Kabara' Baji' nabirittakanga ikambe. Manna pole na ikambe anjo taua, yareka malaeka' battu ri suruga!

GALATIA 1:8 Referans Kwoze

GALATIA 1:9

Le'ba'mi kupau pirangalloang, nakamma-kamma anne sikalipi pole kupau angkanaya: Anjo tau ambirittakangai mae ri kau “kabara' baji'” simmaraenga siagang Kabara' Baji' le'baka nutarima battu ri kambe, anjo tau kammaya musti nihukkungi ri Allata'ala!

1 KORINTUS 16:22

Inai-nai tena namangngamaseang mae ri Batara, lappassammi anggappa pangngalarroi! Maranatha – O, Batara, battu maKi' linta'!

ROMA 9:3

passabakkang julu bansaku. Nasaba' untu' ike'nammi nakurella todong anggappa pangngalarroi battu ri Allata'ala siagang nisa'la' battu ri Isa Almasi.

MATIUS 25:41

Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na!

2 PETRUS 2:14

Nasaba' tenamo lanrena ke'nanga a'gau' dosa, sa'genna ia mami pangngainna ke'nanga iamintu ancinikia tojengi baine pagau' bawanga. Na nanyonyo'mo tau beru tappaka siagang tau tenaya najarre' tappa'na. Le'ba' a'jari biasami atinna ke'nanga ri kangoanga. Anjo ke'nanga sangnging tau langgappa pangngalarroi!

LAMPA-LAMPANA 23:14

A'lampami ke'nanga mae ri imang-imang kapalaya siagang pamimping-pamimpinna tu Yahudia, nampa nakana ke'nanga, “Le'ba'mi assumpa ikambe, angkanaya talangnganreai siagang talangnginungai ikambe, punna tenapa nale'ba' nibuno Paulus ri kambe.

TITUS 3:10

Punna nia' tau appasisala-sala lalang ri jama'aka, parallui nupakainga' sikali yareka pinruang; le'baki anjo punna taeroka mappilangngeri tea' mako agangi pole sipa'rappungang.

GALATIA 3:13

Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.”

1 KORINTUS 12:3

Musti nuassengi angkanaya tau nipimpinga ri RohNa Allata'ala takkulleai angkana, “Poro nitunra laloi Isa!” Kammayatompa tenanniakka tau akkulle angkana, “Iami anjo Isa Batara!” punna tanipimpinga ri RohNa Allata'ala anjo taua.

MARKUS 14:71

Appakkaramulami Petrus assumpa-sumpa nakana, “Matea' naung, ma'nassa tena nakuassengi antu tau nupakkanaya!”

GALATIA 3:10

Sikamma tau tanjenga mae ri hukkung-hukkung agamaya, laniparawa ngasengi ri pangngalarroiNa Allata'ala. Nasaba' nia' tattulisi' lalang ri Kittaka angkanaya, “Inai-nai tena najarre' anggaukangi apa-apa tattulisika lalang ri Kitta' Hukkung Agamaya, langgappai pangngalarroi battu ri Allata'ala!”

NEHEMIA 13:25

Kupakaingaki ke'nanga siagang kutunrai ke'nanga. Nia' todong kuba'ji siagang kuparuntang uu'na. Nampa kusuro ke'nanga assumpa lalang arenNa Allata'ala angkana ke'nanga siagang ana'-ana'na ke'nanga tenamo nalasicampuru' a'bunting pole.

1 SAMUEL 26:19

O, karaeng, kipilangngeri sai sombanna anne atanta. Ebara' angkana Batara assuroi karaengku angngewai atanta, akkullei passare koro'banga ampanaungi pangngalarroinNa mae ri atanta. Mingka ebara' angkana rupatau ansuroi karaengku, tapporo nihukkung laloi ke'nanga ri Batara! Nasaba' lanri panggaukanna anjo ke'nanga nanibongkamo atanta battu ri buttaNa Batara, siagang tarpassa musti a'lampai mange ri pa'rasangang maraeng namusti anynyomba anjoreng atanta mae ri rewata-rewata tenaya niassengi.

YOSUA 9:23

Lanri kammana anjo panggaukannu, lanihukkungko ri Allata'ala. Latuli a'jari atai bansanu, a'jari pabisa' kayu siagang papisang je'ne' untu' Balla'Na Allata'alaku.”

PA'JARIANG 9:25

nakanamo, “Cilaka laloi Kanaan! La'jari ata kaminang tunai mae ri sikamma sari'battanna.

1 KARAENG-KARAENG 13:18

Jari a'balle-ballemi anjo na'bi toa battua ri Betel angkana ri ia, “Inakke na'bi tonja' sangkamma ikatte. Lanri parentaNa todong Batara na Nasuro malaeka'Na ampauanga' sollanna kubuntuliki' siagang kutoanaki' ri ballakku.”

YEREMIA 23:16

Mae ri pandudu'na Yerusalem, Nakana Batara Kaminang Koasaya, “Teako pilangngeri kana-kananna sikamma na'bia, tuli ampabattuangko panrannuang kosong bawang. Pikkirang napare' kalenna bawang ke'nanga anjo napabattua, teai pasangKu.

YEREMIA 23:36

Takkulleami ke'nanga ammake kana-kana ‘pisangnganNa Batara’. Punna nia' ija ampakei anjo kana-kana kammaya, laKupa'jari anjo pasangKu a'jari pisangngang tojeng mae ri kalenna. Tau angkanaya ‘pisangnganNa Batara’ poro natunggennaja bicarangKu, Allata'alana ke'nanga, Allata'ala mattallasa', Batara Kaminang Koasaya.

ROMA 16:17

Sikamma sari'battangku ngaseng! Sanna' kupala'na mae ri kau ngaseng: tutuko mae ri tau eroka appasisala-sala siagang tau eroka angkacoi tappa'na taua mae ri Batara. Assisalai anjo kammaya siagang apa le'baka nipangngajarrang mae ri kau. Pakabellai kalennu battu ri tau kammaya anjo.