FILIPI 4:9 - KITTA' MATANGKASA'

⁹ Gaukammi anjo apa-apa le'baka nupappilajari siagang nutarima battu ri nakke; baji' nakana-kanangku, yareka apa-apa kugaukanga. Naporo Allata'ala, kabattuanna salewanganga, anrurungang ngasengko ri katallassannu.

FILIPI 4:9 Referans Kwoze

YAKOBUS 1:22

Parallui nugaukang apa-apa Napaua Allata'ala; teako poro nullangngere'naja bawang, sa'genna sangkammami nuballe-ballei kalennu.

FILIPI 3:17

Sikamma sari'battangku! Turukimi conto niaka ri kalengku. Le'ba' mako nasare ikambe conto annabaya; lanri kammana, parhatikangi baji'-baji' katallassanna sikamma tau anturukiai anjo conto napassareanga ikambe.

2 PETRUS 1:10

Lanri kammana, sikamma sari'battangku, paralluko pila' nuterassi usahanu sollanna pila' a'jari majarre' anjo pakkio'Na siagang pammileNa Allata'ala mae ri kalennu. Punna nugaukang anjo kammaya, tena nulanipassala.

YOHANES 13:17

Nuasseng ngaseng minne; jari mate'ne mako punna nugaukangi.

FILIPI 4:7

Na Iaminjo Allata'ala takkullea napahang akkala'na rupataua, lassareko katallassang salewangang; siagang langkatutui nyawanu siagang pikkirannu le'bakamo asse're siagang Isa Almasi.

ROMA 16:20

Allata'ala assarei salewangang rupataua; tasalloami naancuru' Billisika nampa naboli' irawangang kakoasannu. Poro tuli nibarakkaki ngasengko ri Batarata Isa Almasi!

2 KORINTUS 13:11

Kala'busang kana, sari'battangku ngaseng, paralluko a'rannu-rannu, siagang usahakangi nu'jari sukku'. Tarima ngasemmi pappakaingakku. Paralluko a'julu ati siagang assiama' lalang tallasa'nu. Allata'ala Kaminang Mangngarimangngia siagang mappasiamaka lanrurungangko.

LUKAS 6:46

“Angngapa nukkio', ‘Batara, Batara’ ri Nakke, mingka taerokako anggaukangi apa Kupaua ri kau?

MATIUS 28:20

Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”

MATIUS 7:21

“Tayangasenga tau akkioka ri Nakke angkana, ‘O, Batara, o, Batara,’ la'jari umma'Na Allata'ala; mingka iaji bawang tau anggaukangai ero'Na ManggeKu ri suruga.

2 TESALONIKA 3:4

Siagang ma'nassa tappa' tojeng-tojengi ikambe mae ri Batara ri passala'nu, angkanaya kamma-kamma anne nugaukangi siagang latuli nugaukangi apa napassuroanga ikambe mae ri kau ngaseng.

1 TESALONIKA 1:6

Nucontoimi katallassanna ikambe siagang Batara. Manna teai sipato' pa'risi'na katallassannu, mingka nutarima tonji siagang rannu pa'mai'nu anjo kabara' napabattua ikambe mae ri kau ngaseng. Anjo karannuanga RohNa Allata'ala assareko.

1 TESALONIKA 5:23

Poro KalenNa Allata'ala, assareaki' kasalewangang, ampa'jariko tau attojeng-tojenga attallasa' untu' Allata'ala bawang. Poro Allata'ala anjagai sikontu batangkalennu, baji' roh, nyawa, yareka tubunu; sa'genna tena callannu sallang ri wattunna battu poleang Batarata Isa Almasi.

ROMA 15:33

Poro Allata'ala, akkullea assarei salewangang rupataua, anrurungang ngasengko lalang ri katallassannu. Aming!

YOHANES 2:5

Mingka nakanamo amma'Na Isa ri pala'-palayanga, “Gaukang mami apa Napassuroanga ri kau ngaseng.”

LUKAS 8:21

Mingka Nakanamo Isa ri ke'nanga, “Inai-nai ampilangngeri siagang anggaukangi kananNa Allata'ala, iami a'jari ammakKu siagang a'jari sari'battangKu.”

1 TESALONIKA 2:14

Sikamma sari'battangku, apa nukasiaka ri tallasa'nu, le'ba' tommi nakasia' sikamma jama'aNa Allata'ala ri butta Yudea, a'jaria taunNa Isa Almasi. Nukasiaki passessaya battu ri julu bansanu tonji, sangkamma nakasiaka sikamma Jama'aNa Allata'ala ri butta Yudea battu ri tu Yahudia.

1 KORINTUS 10:31

Apa-apa mamo nugaukang – angnganreko yareka angnginungko – gaukammi anjo untu' ampakala'biriki Allata'ala.

PAOLE 5:1

Napasse'rei Musa sikontu bansa Israel, nampa nakana mae ri ke'nanga, “Sikamma sari'battangku ngaseng, pilangngerimi anne hukkung-hukkung kupassareanga mae ri kau ngaseng anne alloa. Pilajari baji'-baji' anjo hukkung-hukkunga, siagang tuli majarrekko anturuki.

LAMPA-LAMPANA 9:6

Mingka kamma-kamma anne ambangung mako nai', na nuantama' ri kotaya. Anjorempi nampa nipauangko apa musti lanugaukang.”

YESAYA 41:10

Teako mallakki, saba' iNakke anrurungangko, teako lussakki, saba' iNakke Allata'alanu. LaKupakajarrekko siagang laKutulungko, Kurenrengko lalang lima makassakKu.

2 TIMOTIUS 4:22

Poro nirurungangko ri Batara. Poro nibarakkaki ngasengko ri Batara! Sallangku, Paulus

1 KORINTUS 14:33

Anjo Allata'ala Nangai apa-apa niatoro' bajika; taNangaiyai apa-apa tenaya nabaji' atoro'na. Kamma nigaukanga ri sikontu jama'aNa Allata'ala,

YOHANES 15:14

Ikau ngasemmi antu passari'battangangKu, punna nugaukangi apa Kuparentakanga ri kau.

1 YOHANES 3:22

Siagang apa-apa mamo nipala' battu ri Ia, tena tanigappana, lanri mappilangngeriki' mae ri sikamma parentaNa, siagang nigaukangi apa Nangaia ri atinNa.

MATIUS 1:23

“Nia' sallang se're tulolo latianang siagang allassukang sitau ana' bura'ne. Anjo anaka lanigallaraki Imanuel.” (Imanuel iamintu bicara tu Ibrani, battuanna “Niaki Allata'ala anrurungangki'”.)

YESAYA 8:10

Apparekko rancana, mingka tena nia' anjari. Angngalle mako kaputusang, mingka tena matu-matunna, saba' ikambe Narurungangki' Allata'alana ikambe.

1 KORINTUS 4:16

Lanri kammanami anjo nasanna' kupala'na ri kau ngaseng, sollannu angngalle conto mae ri nakke.