FILIPI 1:25 - KITTA' MATANGKASA'

²⁵ Tappaka' ri anne passalaka. Iaminjo saba'na nakuasseng angkanaya lammantanga' anrinni. Lammantanga' siagang ikau ngaseng, sollangku akkulle antulungko a'jari pila' majarre' siagang pila' sannang lalang ri katappakkannu mae ri Almasi.

FILIPI 1:25 Referans Kwoze

FILIPI 2:24

Matappaka' angkanaya lanri pannulunNa Batara, tena tommo nasallo nakubattu todong angkunjungiko.

2 KORINTUS 1:24

Tena nakuero' ampassako ri passala' apa siratanga nupatappa', lanri jarre'namo tappa'nu mae ri Isa. Erokkuji bawang angngagangko sipanjamang, sollannu pila' mate'ne ri tallasa'nu.

ROMA 15:13

Allata'alami tampa' panrannuannu. Poro Nabonei pa'mai'nu sikontu karannuang siagang salewangang, lanri tappa'nu mae ri Ia, sollanna lanri koasa RohNa Allata'ala nanupila' manrannuang mae ri Allata'ala.

ROMA 5:2

Nasaba' tappa' maki' mae ri Isa Almasi, nisare maki' pakkulle ampahang bajiki pangngamaseanNa Allata'ala, siagang lanri iaminjo pangngamaseanga nakiattallasa' kamma-kamma anne. Lanri kammaminjo narannumo pa'maitta, nasaba' nia'mo panrannuanta angkanaya akkullei nikasia' mate'nea, laNapassareanga Allata'ala!

LAMPA-LAMPANA 20:25

Le'ba' ngaseng mako massing kukunjungi, siagang le'ba' ngaseng tommi kupabattu mae ri kau ri passala'na Allata'ala siagang PamarentahanNa. Kamma-kamma anne nia'mi ri pakkasiakku angkanaya iaminne kala'busangku assicini' siagang ikau ngaseng.

1 PETRUS 1:8

Mangngamaseangko ri Ia, manna pole tanucinika riolo. Siagang tappakko ri Ia manna pole tanucinika kamma-kamma anne. Iaminjo saba'na nanurannu, siagang nanukasia' karannuang mala'birika siagang sukkaraka nicarita.

ROMA 15:29

Punna battua' sallang mae ri kau ngaseng, mattantu jai barakka' battu ri Isa Almasi lakupabattuangko.

ROMA 15:18

Iaji nakubarani akkana kamma lanri inakkena Napake Isa Almasi ampappicinikangi apa Nagaukanga Isa, iamintu Napa'jari mannurukimi bansa-bansa maraenga mae ri Allata'ala. Kugaukammi anjo lalang kana-kana siagang panggaukang;

LAMPA-LAMPANA 14:22

Napakajarre'mi atinna sikamma tau tappaka ri Isa ri anjo kota-kotaya. Napakainga'mi ke'nanga, sollanna tuli jarre' tappa'na mae ri Isa. “Musti jai rolong pa'risi' nikasia', nampa akkulle nikasia' mate'nea lalang ri Lino BeruNa Allata'ala,” kammami anjo napangngajarrang tunisuroNa Allata'ala mae ri sikamma tau tappakamo mae ri Isa, ri anjo kota-kotaya.

LAMPA-LAMPANA 11:23

Na ri wattunna battu Barnabas mange anjoreng, nacini'mi antekamma bateNa Allata'ala ambarakkaki ngasengi anjo taua. Sanna'mi rannuna Barnabas. Na napakainga'mo ke'nanga sollanna jarre' tojeng-tojeng tappa'na ke'nanga ri Batara.

LUKAS 22:32

Mingka le'ba' mako Kupappala' doangang Simon, sollanna jarre' tappa'nu. Na punna ammotere' mako pole mae ri Nakke, musti nupakajarreki tappa'na sikamma sari'battannu.”

PAMMUJI 60:6

Kipakaingaki tau mappilangngeria, sollanna ta'lappasa' ke'nanga battu ri hukkunganga.

FILIPI 1:24

Mingka lanri untu' kaparalluannu ngaseng, bajikangangi punna ammantanga' ri lino.

FILEMON 1:22

Pantaranganna anjo, pappasadianga' tampa' ri balla'nu; nasaba' kuminasai ri Allata'ala naNasareangko pappala'nu ngaseng, iamintu nanaeranga' ammotere' mae ri tangnga-tangnganu.