EZRA 5:12 - KITTA' MATANGKASA'

¹² Mingka lanri anggappana pangngalarroi boe-boena ikambe battu ri Allata'ala makoasaya ri suruga, jari napassareammi ke'nanga mae ri kakoasanna Nebukadnezar, karaeng Babel battu ri turungang tu Kasdim. Naancuru'mi anjo Balla' Sambayanga nampa naerang bansana ikambe mange ri Babel.

EZRA 5:12 Referans Kwoze

DANIEL 9:5

Dorakami ikambe, a'gau' ja'dala'mi ikambe, siagang nagaukammi ikambe kasalanga. Pabali-balimi ikambe siagang nadakkai ikambe parentaTa, kammayatompa ammengkai ikambe battu ri paratorang-paratoranTa.

2 KARAENG-KARAENG 24:2

Appabattui Batara garombolang-garombolang angngeranga sanjata battu ri Babel, Siria, Moab siagang Amon untu' angngewai Yoyakim siagang angngancuruki Yehuda, situru' apa le'baka Nakanang tete ri sikamma na'bi-na'bia atanNa.

YEREMIA 5:29

Mingka iNakke, Batara, langhukkungi ke'nanga lanri yangasenna anjo sikammaya; laKubalasaki sikamma panggaukanna anne bansaya.

PAMMUJI 106:40

Nampa a'rinramo larroNa Batara mae ri ke'nanga, ero'mi ta'langnge Nasa'ring lanri umma'Na tonji.

2 KARAENG-KARAENG 25:1

Nampa angngewa Zedekia mae ri Nebukadnezar karaeng Babel. Lanri kammana anjo battumi Nebukadnezar siagang sikontu tantarana nampa nabunduki Yerusalem ri tanggala' 10 bulang 10 ri taung makasalapang ammarentana Zedekia. Appaentengi ke'nanga pa'ballakang ri pantaranganna kotaya, siagang ambangungi tembo' pakkurung,

HAKING-HAKING 6:1

Sikalipi pole, dorakamiseng umma' Israel mae ri Batara. Sa'genna nibalang parekang ke'nanga nikoasai ri bansa Midian tuju taung sallona.

HAKING-HAKING 4:2

Jari nibalang parekkammi ke'nanga ri Batara, na nibeta ri Yabin, iamintu karaeng Kanaan, ammantanga ri kota Hazor. Ia panglimana ke'nanga niarengi Sisera, ammantanga ri Haroset-Hagoyim.

PAOLE 32:30

Kemae lakkulle sitau langngondang tau sisa'bu, siagang rua tau langngondang sampulo sa'bu tau? Batara, Allata'alana ke'nanga, le'ba' ambalukangi ke'nanga, nibokoimi ke'nanga ri Allata'ala malompoa.

PAOLE 31:17

Punna kajariang anjo kammaya, la'bettese'mi larroKu mae ri ke'nanga. LaKubokoi ke'nanga siagang laKupanraki. Jai bala lompo lantujui ke'nanga; nampami sadara' ke'nanga angkanaya nakajariang ngaseng anjo kammaya lanri iNakke, Allata'alana ke'nanga, tenamo naKururungangi ke'nanga.

YEREMIA 52:12

Ri tanggala' sampulo bulang lima lalang ri taung makasampulo assalapang pamarentahanna Nebukadnezar karaeng Babel, nia'mo sitau battu mange ri Yerusalem niarenga Nebuzaradan. Iami tumailalang siagang kapala pa'lapa' barambanna Nebukadnezar.

2 PATTOTTORANG 36:20

Ra'ya' ta'lappasaka nalalingi mange ri Babel. Anjorengi ke'nanga nipa'jari atanna karaenga siagang atanna jari-jarina karaenga sa'genna ri jammang kakoasanna kakaraengang Persia.

YESAYA 47:6

Riolo larroA' mae ri ummakKu, tenamo naKukana iNakke ampatangi. Nampa Kupassareang ke'nanga mae ri kau, nampa tena nukamaseangi ke'nanga, ba'lalo manna tau toa-toaya nujallakkang nukapallaki todong.

YEREMIA 51:59

Pa'lapa' barambanna Karaeng Zedekia iamintu Seraya ana'na Neria cucunna Mahseya. Ri taung makaappa' pamarentahanna Zedekia karaeng Yehuda, Seraya amminawangi ri Zedekia mange ri Babel. Jari kusaremi se're tugasa'.