ESTER 9:18 - KITTA' MATANGKASA'

¹⁸ Mingka tu Yahudi niaka ri kota Susan, tanggala' sampulo allima napakalompo a'jari allo lompo, nasaba' nabunoi musua ri tanggala' sampulo antallu siagang tanggala' sampulo angngappa, nampa ammari ri tanggala' sampulo allima.

ESTER 9:18 Referans Kwoze

ESTER 9:21

Bonena anjo suraka iamintu parenta, sollanna napakalompoi ke'nanga tanggala' sampulo angngappa' siagang tanggala' sampulo allima bulang Adar ri taung-taunna.

ESTER 9:15

Jari ri tanggala' sampulo angngappa' bulang Adar, asse'remi pole tu Yahudia ri kota Susan, nampa nabuno nia' 300 pole tau ri anjo kotaya. Na anjo wattua tena tommo nagaukangi ke'nanga angngellaka.

ESTER 9:13

Appialimi Ester angkana, “Punna kikaerokangi karaeng, poro kisare laloi ising tu Yahudia ammantanga anrinni ri Susan untu' anggaukang poleangi apa le'baka nagaukang anne alloa. Nampa pole poro anjo maya'na ngaseng ana'na Haman, nigentungi ri anjo tampa' pa'gentunganga.”

ESTER 9:1

Kale'bakkanna narapi'mi tanggala' sampulo antallu bulang Adar, iamintu allo le'baka nipattantu untu' anggaukangi parentana karaenga mae ri tu Yahudia. Anjo alloa sallomi natayang-tayang sikamma musu-musunna tu Yahudia untu' angkoasai anjo bansaya. Mingka kajarianna ba'lalo tu Yahudia ambetai ke'nanga.

ESTER 9:11

Anjo memang alloa nalaporo'mi taua ri karaenga siapa jaina tunibunoa ri Susan.

ESTER 8:11

Bonena anjo suraka iamintu angkanaya nisarei ising tu Yahudia ri sikontu kotaya untu' ampasse'rei kalenna siagang najagai kalenna. Punna nibunduki ke'nanga ri tau niaka sanjatana, manna pole battu ri bansa kemae yareka manna pole battu ri propinsi kemae. Akkullei ke'nanga angngewa siagang ambunoi anjo tau battua ambunduki. Manna ana'na siagang bainenna ke'nanga akkullei nabuno. Akkullei nabuno ke'nanga anjo sikontu musunna sa'genna la'busu' siagang akkullei narampasa' pa'barang-baranganna.

ESTER 9:2

Ri sikamma kotaya, asse're ngasemmi tu Yahudia untu' ambunduki sikamma tau eroka a'gau' ja'dala' mae ri ke'nanga. Kemae-kemae sikontu bansaya a'jari malla' ngasemmi ri ke'nanga, sa'genna manna sitau tania' barani andallekangi ke'nanga.