DANIEL 7:4 - KITTA' MATANGKASA'

⁴ Makase'rea sangkammai tanja'na singa, mingka nia' ka'nyi'na iamintu ka'nyi' jangang-jangang garuda. Ri wattunna kuciniki, ti'ring ta'bi'bu'mi ka'nyi'na nampa ta'lappasa'; ta'angkaki battu ri buttaya nampa nipaenteng lambusu' ri ruaya bangkeng sangkamma tau, nampa nisare akkala' rupatau.

DANIEL 7:4 Referans Kwoze

YEREMIA 4:7

Rapang singa assuluka battu ri paccokkoanna kamma tomminjo a'lampami pammanrakia ri bansa-bansa battua ero' ampanraki Yehuda. Laruntungi Yehuda a'jari kamma loro tampa' tenaya napammantangngi tau.

MATIUS 24:28

Kemae nia' maya', anjoreng tommi nia' jangang-jangang pakanre mayaka.”

DANIEL 4:36

Ri wattunna ammotere'mo pangngu'rangia ri nakke, nipoterang kabusu'mi mae ri nakke iamintu kalompoangku, kala'birangku siagang masahoro'na kakaraengangku. Niruppaima' ri sikamma pagaweku siagang sikamma tumalompoku, kammayatompa nipoteramma' mae ri kakaraengangku, ba'lalo kala'birangku a'jari lompoangammi narioloa.

YEHEZKIEL 28:9

Jari, punna narapi'mo anjo wattua, maka akkulle ijako angkana angkanaya ikau Allata'alako? Ri dallekanna ngaseng sikamma tau ambunoako a'nassami angkanaya ikau tau biasa jako.

YEHEZKIEL 28:2

“He tau, pabattui mae ri karaeng Tirus apa Kupaua, iNakke, Batara Kaminang Tinggia, mae ri ia, angkana, ‘Tampoko ampaui kalennu angkana rewatako ammarentaya ri tangnga-tangngana tamparanga. Akkulleko nukana kalennu rewata, mingka u'rangi, angkanaya ikau poro tau biasajako bawang.

PIRAUNG 4:19

Sanna' gassinna lari tau angngondanga ri kambe la'bi gassing larina na jangang-jangang rajawalia. Iratei ri moncong ke'nanga angngondangi ikambe, na naruppai ikambe ri parang lompoa.

YEREMIA 48:40

Nakana Batara, “Rapang jangang-jangang rajawali attamberoa siagang ka'nyi'na takka'ranga, kammami anjo nia' se're bansa lantamberoi Moab.

YEREMIA 25:38

Rapang singa assuluka battu ri leanna, kamma tomminjo Batara assuluki untu' anghukkungi umma'Na. Palla'na pa'bundukanga siagang kalarroanNa Batara ampinrai anne pa'rasanganga a'jari parang lompo.

YEREMIA 4:13

Ciniki, ammumbami musua sanrapang rammang. Kareta-kareta pa'bundu'na rapangi anging barubu, jarang-jaranna gassingangngangi larina najangang-jangang rajawali. Cilaka maki'! Panra' maki'!

PAMMUJI 9:20

Ammenteng maKi', o, Batara, adelimi bansa-bansaya, teaKi' lappassangi taua ampakaborroi kalenna.

AYUB 25:6

La'biangampa rupataua, lapung gallang-gallang, lapung kaluara! Tena tojeng anggaranna ri paccini'Na Allata'ala.”

2 SAMUEL 1:23

Saul siagang Yonatan, kamma sombere'na siagang nikamaseangi; tuli akkana se're lalang tallasa'na siagang lalang matena; la'bi lintaki na jangang-jangang garuda, la'bi gassingi na singa rungkaya.

PAOLE 28:49

Nia' se'reang bansa tenaya nuassengi bicaranna laNapabattu Batara battu ri cappa'na buttaya anne untu' angngewako. Rapang jangang-jangang rajawali labattui antamberoko.

PAPPICINI' 13:2

Anjo olo'-oloka sangkammai kucini' macang burika, na bangkenna sangkammai bangkeng beruang, kammayatompa muncenna sangkammai munceng singa. Nampa napassareang anjo nagaya kagassingang kalenna mae ri anjo olo'-oloka; kammayatompa empoang kala'biranna siagang kakoasang lompona nasareang tommi.

DANIEL 7:5

Olo'-olo' makaruaya sangkammai tanja'na beruang. Ammentengi siagang bangkeng ri bokoa, siagang angngerangi tallumpolong buku rusu' ri gigi-giginna. Nia' sa'ra kulangngere' angkana ri ia, “Angnganre mako dageng siapa-siapa jaina nungaia!”

YEREMIA 49:19

Rapang singa ammumbaya battu lalang ri romang lompoa ri ampi'na Binanga Yordan nampa battu mange ri parang tampa'na gimbalaka a'ruku', kammatommi anjo bateKu labattu siagang lampalari tu Edom silalonna battu ri pa'rasanganna ke'nanga. Nampa langngangkaKa' sitau pamimping untu' amparentai anjo bansaya. Inai akkulle nipasangkamma siagang iNakke? Inai barani appare' parkara siagang iNakke? Apaka nia' pamimping akkulle angngewA'?

DANIEL 2:38

Nipa'jariki' karaeng tukoasa mae ri lino niaka pandudu'na kammayatompa jangang-janganga siagang olo'-olo' maraengannaya. Kalentami karaeng natabaya pangngebarranna anjo ulu bulaenna anjo patunga.

DANIEL 7:12

Olo'-olo' maraengannaya le'ba'mi nialle koasana, mingka nipa'biangi ke'nanga attallasa' sa'genna wattu le'baka nipattantu.