DANIEL 12:10 - KITTA' MATANGKASA'

¹⁰ Jai tau laniso'ri siagang lanitangkasi. Ke'nanga ja'dalaka tena nalanapahangi siagang tulusu' la'gau' ja'dala'na; iaji bawang cara'deka lampahangi.

DANIEL 12:10 Referans Kwoze

PAPPICINI' 22:11

Ia tau ja'dalaka, lappassammi a'gau' ja'dala' turus; ia tau ra'masaka lappassammi tuli nara'massi kalenna; ia mannurukia ri ero'Na Allata'ala lappassammi tuli mannuruki ri ero'Na Allata'ala, siagang ia napassareangamo katallassanna untu' Allata'ala bawang, lappassammi attallasa' turus untu' Allata'ala bawang.”

DANIEL 11:35

Sipa'gang battu ri anjo pamimping-pamimping cara'deka lanibunoi, mingka anjo kammaya a'jari paccobai mae ri umma'Na Allata'ala sollanna a'jari matangkasa' ke'nanga. Anjo kammaya lakajariangi sa'genna narapi' kala'busang jammanga, iamintu jammang le'baka Napattantu Allata'ala.

HOSEA 14:9

Lanapelaki tu Israel patung-patung barhalana; laKuparakai ke'nanga naKupilangngeri pappala' doanna. Rapang poko' kayu tuli jaina leko'na, iNakke lalla'langngi ke'nanga. INakkemi kabattuanna sikontu barakkaka mae ri ke'nanga. INakke, Batara, anne akkana.”

YOHANES 8:47

Inai-nai battu ri Allata'ala, tantu napilangngeri kananNa Allata'ala. Mingka ikau ngaseng, teaiko tau battu ri Allata'ala. Iaminjo saba'na nanutea appilangngeri.”

1 YOHANES 5:20

Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga.

YOHANES 7:17

Inai-nai ero' anturuki ero'Na Allata'ala, lanaassengi angkanaya pangngajarang battu kemae anjo Kupangngajaranga. Apaka pangngajarang battu ri Allata'ala yareka pangngajarang battu ri KalengKu.

LUKAS 24:25

Nakanamo Isa ri ke'nanga, “Dongo' ngaseng memang tongko! Sallo sikali nampa akkulle nupatappa' sikamma apa le'baka napau na'bi-na'bia!

ZAKHARIA 13:9

Bage talluna mami lasalama'. Siagang anjo ke'nanga laKupakatangkasaki rapang pera' nipakati'noka siagang pepe'. LaKuuji ke'nanga rapang tau angngujia bulaeng. Nampa lappala' doang ke'nanga mae ri Nakke, siagang laKupiali pappala'na ke'nanga. LaKupauangi ke'nanga angkanaya iami ke'nanga ummakKu, nampa ke'nanga lamangaku tongi angkanaya iNakkemi Karaeng Allata'alana ke'nanga.”

PAPPICINI' 3:18

Lanri kammanami anjo naKupakaingakko sollannu ammalli ngaseng battu ri Nakke bulaeng, iamintu bulaeng ti'no', sollannu a'jari kalumanynyang. Ammalli todong mako battu ri Nakke pakeang kebo' sollannu akkulle ammakeang siagang nutongko' kalennu natena nussolara' siagang natena nuppakasiri'. Siagang ammalli todong mako pa'balle untu' nupasapu mae ri matannu, sollannu akkulle accini'.

PANGNGEBARANG 1:5

Lanri anne sikamma pappakaingaka namanna tau cara'deka lanatambai tongi pangngassenganna, kammayatompa tau niaka sikolana lanipimping tongi.

1 PETRUS 1:7

Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi.

DANIEL 11:33

Sikamma tau cara'de' ampimpingai ra'yaka lajai tau napa'jari pahang. Mingka untu' siapa are sallona, nia' siapa are ri ke'nanga lanibuno lanri pa'bundukang yareka lanri pepe', siagang siapa are maraengannaya laniellaki siagang lanitahangi.

YEHEZKIEL 47:11

Mingka je'neka ri empanga siagang balanga ri birinna anjo tamparanga tena nala'jari la'ba, passangalinna tuli la'jari pacce'lang.

PAPPICINI' 19:14

Amminawang ngasemmi ri Ia tantara surugaya, a'dongko' jarang kebo' ngaseng, siagang ammakeang kaeng lenang kebo' sannaka ngaseng kebo'na.

PAPPICINI' 19:8

Nipassareammi mae ri Ia kaeng lenang accillaka untu' Napake.” (Anjo pakeang lenanga iamintu panggaukang-panggaukang baji' nagaukang Umma'Na Allata'ala.)

PAPPICINI' 16:11

Nampa natunraimo ke'nanga Allata'ala ri suruga lanri pa'risi'na siagang lanri anjo lattanna ngaseng ke'nanga. Mingka tena tompa naero' toba' ke'nanga battu ri panggaukang ja'dala'na.

1 PETRUS 1:22

Lanri mappilangngerinnu mae ri pangngajaranNa Allata'ala, parallui nutangkasi kalennu siagang nukamaseang julu tappa'nu situlusu'na pa'mai'nu. Lanri kammana, paralluko massing sikamaseang lalang sikalepu pa'mai'nu,

IBRANI 12:10

Punna naajarakki' tau toata ri anne linoa nia' batasa'na, situru' apa nakanaya baji' ke'nanga. Mingka punna Naajarakki' Allata'ala, anjo untu' kabajikang kalenta tonji, sollanta akkulle turu' siagang Ia a'jari matangkasa'.

TITUS 2:14

Le'ba'mi Nakoro'bangkang KalenNa untu' kasalamakkanta battu ri sikontu kaja'dallanga, na Napa'jariki' umma'Na matangkasaka, siagang rajenga a'gau' baji'.

2 KORINTUS 7:1

Sikamma sari'battangku kukarimangngia! Sikontu anjo janjia untu' ikatte ngaseng. Lanri kammana, parallui nitangkasi kalenta battu ri sikamma apa-apa akkullea anra'massi tubuta siagang nyawata. Paralluki' malla' mae ri Allata'ala. Sollanta akkulle attallasa' baji' siagang matangkasa' untu' Allata'ala.

1 KORINTUS 6:11

Nia' siapa are jainu appanggaukang kamma anjo riolo. Mingka kamma-kamma anne le'ba' mako nitangkasi battu ri dosa-dosaya, sollannu a'jari umma' matangkasa'Na Allata'ala. Le'ba' mako assibajiki ammotere' siagang Allata'ala lanri tappa'nu mae ri Batara Isa Almasi siagang lanri koasa Roh battu ri Allata'alata.

YOHANES 18:37

Akkuta'nammi Pilatus nakana, “Jari punna kamma, KaraengKo padeng?” Appialimi Isa Nakana, “Nupaumi angkanaya iNakke anne karaengA'. Se'reji pattujunna naKunilassukang siagang naKubattu ri anne linoa, iamintu ampabattui katojenganga. Inai-nai battu ri anjo katojenganga iami lampilangngeriA'.”

MARKUS 4:11

Nakanamo Isa ri ke'nanga, “Le'ba' mako nisare pangngassengang sollanna nuasseng rahasiana angkanaya antekamma batena ammarenta Allata'ala. Mingka tau maraenga ammakepi pangngebarang punna niajara' ke'nanga,

DANIEL 12:3

Sikamma pamimping cara'deka laccayai sangkamma cayana langika. Siagang sikamma tau le'baka angngajara' tau jai untu' anggaukangi apa bajika siagang adeleka, laccayai sangkamma bintoenga untu' satunggu-tungguna.”

YEHEZKIEL 36:25

Le'baki anjo Kupiracciki mako je'ne' ci'nong, sollannu a'jari tangkasa' battu ri sikontu barhalanu siagang battu ri sikontu anra'massiako.

YESAYA 1:18

Nakana Batara, “Umba nanipa'le'ba' anne parkaraya. Manna pole nule'leng kamma uring napakamma dosa-dosanu, laKubissaiko sa'gennu a'jari kebo' sangkamma kapasa'. Manna pole najai siagang battala' dosa-dosanu, mingka laKupammopporang ngasengi.

PAMMUJI 107:43

Poro tau bajika nawa-nawana napikkiriki sikamma anjo passalaka siagang namangakui angkanaya tulusu' mangngamaseanNa Batara.

PAMMUJI 51:7

Sitojenna, ja'dala' memanga' baku' nilassukangku, nataba memamma' dosa baku' lalangku ri battang.

1 SAMUEL 24:13

Kiassengi anne paruntu' kana salloa angkanaya, ‘Ia kaja'dallanga tau ja'dalakaji bawang anggaukangi.’ Lanri kammana anjo, taerokai atanta ampa'risiki'.

MALEAKHI 3:3

Battu untu' angngadeli, sanrapang tau antangkasiai siagang ampakati'noki peraka. Sanrapangi pade'de' bulaeng ti'no' siagang pade'de' pera' ti'no', kamma tomminjo tunisuroNa Batara laNatangkasi sikamma imanga sollanna akkulle Napassareang koro'bang-koro'banga situru' cara Nakaerokia Batara.