DANIEL 11:16 - KITTA' MATANGKASA'

¹⁶ Anjo karaeng pa'rasangang waraka lappaero'-eroki appanggaukang, nampa tena naniewai manna sike'de'. Lanaempoi tongi pa'rasangang ga'gaya nampa nakoasai kabusu'.

DANIEL 11:16 Referans Kwoze

DANIEL 8:9

Battu ri kalase'renna anjo tanruka nia'mo attimbo tanru' ca'di, a'jari sannaka lompona siagang a'la'baka kakoasanna a'lampa timboro', anrai', siagang mae ri butta ga'gaya.

DANIEL 11:41

Ba'lalo butta ga'gaya nabunduki ngaseng, siagang appulo sa'bui tau nabuno. Mingka kakaraengang Edom, Moab, siagang bageang parallua ri kakaraengang Amon lasalamaki.

DANIEL 11:36

Karaeng pa'rasangang waraka lappaero'-eroki appanggaukang. Tampoi ke'nanga nangkana angkanaya la'bi lompoangngangi kalenna namanna pole rewata battu kemae, ba'lalo la'bi lompoangngangi na Allata'ala Kaminang Tinggia. Lakkullei appanggaukang kamma anjo sa'genna kala'busang pangngalarroinNa Allata'ala. Nasaba' anjo apa le'baka Napattantu Allata'ala musti a'rupai la'bi riolo.

DANIEL 11:3

Nampa lania' ammumba sitau karaeng pore. Lammarentai se're kakaraengang lompo siagang lappaero'-eroki appanggaukang.

DANIEL 8:7

Kuparhatikangi nabakkai anjo gimbala' lakia. Antekamma sekke'na sa'genna nalappo anjo gimbala' lakia siagang natepo' rua-rua tanru'na. Tena sikali kagassinganna anjo gimbala' lakia untu' angngewa. Tassambilai naung ri buttaya nampa nionjo'-onjokang, na manna sitau tania' akkulle antulungi.

DANIEL 8:4

Kuciniki anjo gimbala' lakia angngula' kalau', wara' siagang timboro'. Tena manna sikayu olo'-olo' akkulle attahang andallekangi yareka ta'lappasa' battu ri kakoasanna. Appaero'-eroki appanggaukang siagang sanna' tampona.

DANIEL 11:45

Ba'lalo lanatannangi kema kakaraenganNa ri alla'na tamparanga siagang bulu' tampa' pammantanganna Balla'Na Batara. Mingka kale'bakkanna lamatei siagang tena manna sitau lantulungi.”

YEREMIA 3:19

Nakana Batara, “He Israel, erokKa' antarimako a'jari anakKu, siagang assareko pa'rasangang appakasannanga pa'mai', pa'rasangang kaminang bajika ri sikontu linoa. ErokKa' nukio' mangge, siagang tenamo nanula'lampa pole ampilariA'.

YESAYA 8:8

Lanatujui ke'nanga Yehuda rapang a'ba narapika sa'genna kallong tinggina nammantang je'neka ri kere-keremae.” Narurungangki' Allata'ala! Takka'rangi ka'nyi'Na alla'langi pa'rasanganta.

YOSUA 1:5

Manna sitau tania' lakkulle ambetako, Yosua, lalang tallasa'nu. Nasaba' iNakke latuli anrurungangko ri sa'rinnu sangkamma riolo iNakke anrurungangi Musa ri sa'rinna. Tena nalaKubokoiko.

DANIEL 5:19

Antekamma malompona, sa'genna sikamma tau battua ri sikontu bansaya, suku bansaya siagang bahasaya, annekkereki siagang mallaki ri ia. Punna eroki ammuno tau, nabuno mami anjo taua. Punna eroki napasalama' se'rea tau, napasalamaki anjo taua. Napakatinggi siagang napakatunai taua situru' ero'na.