2 TIMOTIUS 2:19 - KITTA' MATANGKASA'

¹⁹ Mingka anjo pammentengang makassa' le'baka Napare' Allata'ala takkulleai nipata'ge'goso'. Irateanganna nia' tattulisi' angkanaya, “Naassengi Batara sikamma taunNa,” siagang “Inai-nai nakana kalenna taunNa Batara, musti ammarimi anggaukangi gau' salaya”.

2 TIMOTIUS 2:19 Referans Kwoze

YOHANES 10:14

INakkemi pakalawaki bajika. Sangkamma NaassengKu Manggea na Kuasseng todong Manggea, sangkamma tomminjo Kuassenna gimbalakKu ngaseng, na naasseng tongA' ke'nanga. Kupassareangi nyawaKu sollanna attallasa' ke'nanga.

1 KORINTUS 8:3

Mingka inai-nai attojeng-tojeng mangngamaseang mae ri Allata'ala, iami niasseng baji' ri Allata'ala.

NAHUM 1:7

Anjo Batara bajiki, Najagai umma'Na ri wattu susa, Najagai tau a'la'langa mae ri Ia.

PAMMILANGNGANG 16:5

Nampa nakana mae ri Korah siagang sikamma tumminawanna, “Ammuko bari'basa' laNappicinikangi Batara mae ri katte angkana inai umma'Na, siagang inai nisa'la' untu' mae ri KalenNa. Tau Napilea lanipa'biangi a'reppese' mae ri Ia.

LUKAS 13:27

Mingka lanakanamo pole anjo karaenga, ‘Takuassengako angkana tau battu kemaeko. Bellako anrinni, ikau tau a'gau' ja'dalaka!’

GALATIA 4:9

Mingka kamma-kamma anne nuassemmi Allata'ala; yareka bajikangangi punna nikana, Naasseng mako Allata'ala. Angngapa nanuero' ammotere' poleang mae ri roh-roh niaka lalang lino, lammaya siagang kasi-asia? Angngapa nuero' poleang nipare' ata ri roh-roh kammaya anjo?

PAPPICINI' 3:8

Kuassengi apa nugaukanga ngaseng. Kuassengi angkanaya tena nasiapa kagassingannu; nuturukimi pangngajarangKu siagang tamamminrayako mae ri Nakke. Kusungkeang mako se're pakke'bu' untu' ikau ngaseng, tenaya nakkulle natongko' manna pole inai.

PAPPICINI' 22:4

siagang lanacini'mi ke'nanga rupanNa Allata'ala. Latattulisi'mi arenNa Allata'ala ri tompo' kanynyinna ke'nanga.

EFESUS 4:30

Teako pa'jari si'nai atinNa RohNa Allata'ala. Le'ba' mako nisare pammatei mattantu ri RohNa Allata'ala, ma'nassanu a'jarimo taunNa Allata'ala. Ia tommi anjo RohNa Allata'ala a'jari pammatei janji majarre' angkanaya labattui mae ri kau Allo Kalappassanga.

YESAYA 28:16

Lanri kammana anjo, kammaminne kananNa Batara Kaminang Tinggia, “LappadongkoKa' batu pa'dongkokang majarre' siagang makassa' ri Sion; se're batu pundasi ia ka'jalaka ballinna, niaka tulisanna angkana: ‘Inai-inai jarre' tappa'na, tena nalanibeta.’

2 PETRUS 3:14

Lanri kammana, sikamma sari'battangku sannaka kukarimangnginna; ilalang nutayanna anjo Allo labattua, attojeng-tojengko usaha untu' a'jari tangkasa' siagang tena callannu lalang ri katallassannu ri dallekanNa Allata'ala. Siagang katutui bajiki passisambungannu siagang Allata'ala.

2 KORINTUS 7:1

Sikamma sari'battangku kukarimangngia! Sikontu anjo janjia untu' ikatte ngaseng. Lanri kammana, parallui nitangkasi kalenta battu ri sikamma apa-apa akkullea anra'massi tubuta siagang nyawata. Paralluki' malla' mae ri Allata'ala. Sollanta akkulle attallasa' baji' siagang matangkasa' untu' Allata'ala.

PAPPICINI' 2:13

Kuassengi angkana kemaeko ammantang. Lalangko ammantang ri tampa' kakoasanna Billisika. Tamamminrayako mae ri Nakke. Ba'lalo, ri wattunna nibuno Antipas ri Billisika ri dallekannu, iamintu sa'biKu tamamminraya, tena todong nanussassala' angkanaya tappakko mae ri Nakke.

PAMMUJI 1:6

Saba' tu mannurukia niului siagang nijagai ri Batara, mingka tu ja'dalaka mangngolo mange ri possoka.

MATIUS 7:23

Mingka laKukana sallang appiali, ‘Tena le'bakako Kuasseng! A'lampa ngasengko anrinni ikau le'baka a'gau' ja'dala'!’ ”

EFESUS 3:15

Battu ri Iami sikontu kaluargaya ri suruga siagang ri lino anggappai massing sipa'Na.

PANGNGEBARANG 3:7

Teako nanukana kalennu la'bi cara'dekangangko na sitojennaya; turuki Batara siagang pakabellai kalennu battu ri ja'dalaka.

PAMMUJI 37:18

Najagai Batara katallassanna tu bajika, barang pisakana ke'nanga sa'genna satunggu-tungguna.

PAMMUJI 34:14

Teako appasuluki kana-kana ja'dala', siagang teako nungai akkala' annipua.

ROMA 15:20

Ia pa'minasangku iamintu poro akkullea' ambirittakangi Kabara' Baji' battua ri Allata'ala ri tampa'-tampa' tenayapa nale'ba' nalangngere' taua passala'na Isa Almasi. Nasaba' tena nakuero' sanrapang tau ambangung irate ri pondasi le'bakamo napadongko' tau maraenga.

LAMPA-LAMPANA 15:17

sollanna sikamma anjo tau niaka tassesa naboyai Batara, assama-samai bansa maraenga, Kukioka a'jari ummakKu.’ Kammaminjo kananNa Batara,

MATIUS 7:25

Ri wattunna battu bosia siagang a'baya kammayatompa anging barubua antujui anjo ballaka takkulleai anra'ba, lanri kassaki pammentenganna irate ri batua.

1 YOHANES 2:19

Ia musu-musunNa Almasi, iamintu sikamma tau a'lampayamo ambokoiki', nasaba' anjo ke'nanga teai memangi taunta. Punna taunta anjo ke'nanga, tantu tuli ammantangi assiagang ikatte. Mingka assulu'mi ke'nanga battu ri katte, sollanna a'jari singara'mo angkanaya tena manna sitau battu ri ke'nanga antama' tojeng-tojenga ri golonganta.

ROMA 12:9

Angngamaseangko siagang ci'nong pa'mai'. Musti nukabirisi gau' ja'dalaka, siagang anna'gala' jarrekko mae ri apa-apa bajika.

MARKUS 13:22

Nasaba' lania' sallang battu tumappasalama' balle-ballea siagang na'bi-na'bi balle-ballea. Lanapappicinikangi ke'nanga gau'-gau' appakalanna'-lannasaka sollanna akkulle annipu, na punna akkulle manna umma'Na Allata'ala lanatipu todong.

PANGNGEBARANG 10:25

Punna battu anging lompoa antujui, lanynya'mi tau ja'dalaka; mingka tau lambusuka tuli jarreki satunggu-tungguna.

AYUB 28:28

Nakana Allata'ala ri rupataua, ‘Punna ero' nugappa kacara'dekanga, musti nupakalompoi Allata'ala. Punna erokko ammahang, musti nupakabellai kaja'dallanga.’ ”

ROMA 9:11

Ri wattu tenanapa nanilassukangi anjo ana' ruaya, le'ba' memammi Napattantu Allata'ala ana' lanipilea sallang. Anjo pammileNa Allata'ala tena nabattu ri panggaukanna rupataua, passangalinna battu ri ero' pakkio'Na bawang Allata'ala. Nasaba' ri wattunna tenapa nangngasseng a'gau' baji' yareka a'gau' kodi anjo ruaya ana'na Ribka,

PAMMUJI 97:10

He, ikau ngaseng mangngaia ri Batara, kabirisi laloi kaja'dallanga! Saba' Najagai Batara tallasa'na umma'Na, Napakabebasaki ke'nanga battu ri koasana tu dorakaya.

PAMMILANGNGANG 6:27

Siagang Nakana Batara, “Punna nasa'bu' ke'nanga arengKu salaku barakka' mae ri bansa Israel, iNakke lambarakkaki ke'nanga.”

1 TIMOTIUS 6:19

Lalang kammana anjo, napasse'remi ke'nanga pa'barang-barangang akkullea a'jari modala' baji' untu' jammang labattua sallang. Siagang lanri kammanami anjo nalanagappamo ke'nanga katallassang mannannunganga, iamintu katallassang sitojennaya.

ROMA 8:28

Niassengi angkanaya Allata'ala ngaseng angngatoroki sikontu apa-apaya, sa'genna a'jari baji' mae ri sikamma tau angkamaseangai, iamintu sikamma tau Nakioka situru' ero' panggaukanNa.

LAMPA-LAMPANA 9:14

Na kamma-kamma anne nia'mi battu anrinni, angngerang sura' koasa battu ri imang-imang kapalaya, sollanna akkulle najakkala' sikamma tau tappaka mae ri Katte.”

YOHANES 13:18

Tena nanataba ngasengko anne apa Kupabattua. Kuassemmi angkanaya inai-nai le'ba' Kupilei. Mingka musti a'rupai apa niaka tattulisi' lalang ri Kittaka, iamintu, ‘Tau Kuaganga sipangnganreang, la'jari musui ri Nakke.’

MATIUS 24:24

Nasaba' lania' sallang battu siapa are tumappasalama' patipu, siagang na'bi-na'bi patipu. Lanappicinikangi ke'nanga gau'-gau' teai sipatoka lompona siagang appakalanna'-lannasaka, sollanna akkulle, manna umma'Na Allata'ala lanatipu todong.

PAMMUJI 112:6

Tau bajika tena nalanipassalasa; tuli laniu'rangi satunggu-tungguna.

EFESUS 2:20

Nibangung tommako irate ri batu le'baka napadongko' sikamma tunisuroNa Allata'ala siagang na'bi-na'biNa; nampa Isa Almasi a'jari sanrapang batu malompona anjo bangunanga.

ROMA 11:2

Tena! Tena naNapelaki umma'Na Allata'ala, le'baka Napile battu ri uru-uruna. Nuasseng ngasenji apa tattulisika lalang ri Kittaka, ri passala'na Na'bi Elia, ri wattunna natuntu' bansa Israelka mae ri Allata'ala. Nakana Na'bi Elia,

LUKAS 6:48

Iami sanrapang tau ambangunga balla', nakekei lantang-lantang buttaya, nampa batu napare' pondasi. Ri wattunna battu a'baya siagang battu je'ne' binangaya antujui anjo ballaka, takkulleai ta'ge'goso', nasaba' bajiki pondasina.

HAGAI 2:23

Ri anjo alloa, ikau Zerubabel, atangKu, laKuangkakko untu' ammarenta lalang arengKu. Nasaba' ikaumi le'ba' Kupile.” Batara Kaminang Koasaya anne akkana.

ROMA 15:9

Napa'jari tommi Isa bansa-bansa maraenga appakala'biri' mae ri Allata'ala, lanri baji' pa'mai'Na Allata'ala mae ri ke'nanga. Nia' tattulisi' lalang ri Kittaka, angkanaya, “Lanri kammanami anjo nakulamammuji-muji mae ri Katte ri tangnga-tangngana bansa-bansaya, lamakkelonga' mammuji-muji mae ri arenTa.”

YESAYA 14:32

Apa lanipappialiang mae ri sikamma tunisuroa battu ri bansa Filistin? Lanikana ri ke'nanga angkana le'ba'mi Nabangung Batara kota Sion, siagang umma'Na sessaya lanijagai anjoreng.

PAPPICINI' 21:14

Iratei ri sampuloa anrua batu pundasi nibangung anjo temboka. Ri anjo batu-batu pundasia massing niaki tattulisi' arenna sampuloa anrua tunisuroNa anjo Ana' Gimbalaka.

IBRANI 11:10

Nasaba' natayangi Abraham kota eroka Nabangung Allata'ala irate ri pammentengang majarreka.

MATIUS 28:19

Jari a'lampamako mange ri sikontu bansaya ri lino, pa'jarimi ke'nanga ana'-ana' gurungKu. Je'neki ke'nanga lalang arenNa Manggea, siagang Anaka, kammayatompa RohNa Allata'ala.

ZAKHARIA 3:9

Kupadongkoki ri dallekanna Yosua se're batu assulapa' tujua laKusarea ukirang siagang tulisang-tulisang. LaKupelaki dosaya battu ri anne pa'rasanganga lalang siallo.

PAPPICINI' 17:8

Anjo olo'-oloka le'baki attallasa' pirangalloang, mingka kamma-kamma anne tenamo nattallasa'. Sinampe' mami nassulu'mo battu ri tubiri'na kamateanga nampa mange ri kapanrakanga. Sikamma tau attallasaka ri lino, natena tattulisi' arenna lalang Kitta' Tau Attallasaka ri wattu tenanapa nanipa'jari linoa, lalannasaki ri wattunna nacini' anjo olo'-oloka. Nasaba' le'baki attallasa' anjo olo'-oloka pirangalloang. Kamma-kamma anne tenamo nattallasa', mingka lammumba poleangi ammotere'.

LAMPA-LAMPANA 11:26

Ri wattunna sibuntulu'mo Saulus, naerang tommi Saulus mange ri Antiokhia. Niaki sitaung ke'nanga ammantang a'rappungang siagang jama'aka anjoreng, najai tau naajara' ke'nanga. Anjoremmi ri Antiokhia uru-uru nigallara' tu Karisteng sikamma tau tappaka ri Isa.

YESAYA 65:15

Sikamma tau nipileKu lanapakei arennu a'jari pattunra: “Dasi-dasi naNabuno ngasengko Batara Kaminang Tinggia sangkamma ke'nanga!” Mingka tau mannurukia ri Nakke laKusarei areng beru.

YESAYA 63:19

IKatte ampa'jari ikambe rapang tena le'bakaKi' makoasa mae ri kambe; rapang tena le'bakai ikambe a'jari ummatTa.

YEHEZKIEL 9:4

“A'lampako mange ri sikontu kotaya siagang sarei pammatei abanna sikamma tau si'naya siagang susaya pa'mai'na lanri anjo panggaukang appakaringika ri anjo kotaya.”

YOHANES 3:33

Inai-nai ampatappaki kasa'bianNa, iami ammangakui angkanaya ma'nassa tojengi Allata'ala.

1 TIMOTIUS 3:15

sollanna punna tenapa nakulinta' battu, nuasseng memammi angkana antekamma bateta musti attallasa' salaku ana'-ana'Na Allata'ala, iamintu jama'aNa Allata'ala mattallasaka. Iaminne jama'aka a'jari sanrapang benteng panjarrekinna siagang pattumpa'na katojengang battua ri Allata'ala.

MARKUS 12:16

Nasaremi ke'nanga Isa se're doe' pera'. Nampa akkuta'nammi Isa Nakana, “Inai pata gambara' siagang areng anne?” Appialimi ke'nanga angkana, “Karaenga.”