2 TIMOTIUS 2:12 - KITTA' MATANGKASA'

¹² Punna tuli sa'barakki' lammarenta tommaki' siagang Ia. Punna tanitarimayai, talaNatarimaya tommaki'.

2 TIMOTIUS 2:12 Referans Kwoze

ROMA 8:17

Jari punna a'jari maki' ana'-ana'Na, ma'nassa a'jari tommaki' warisi'Na, lantarimayai sikamma barakka' le'baka Napasadia Allata'ala untu' ana'-ana'Na. Lannarimaki' siagang Isa apa le'baka Napasadia Allata'ala untu' Isa; nasaba' punna sikapa'risangki' siagang Almasi, lasiagang tommaki' Almasi nipakala'biri'.

MATIUS 10:33

Mingka inai-nai ansassaliA' ri dallekanna tau jaia angkanaya amminawangi ri Nakke, laKusassali tongi sallang ri dallekanNa ManggeKu ri suruga.”

PAPPICINI' 20:4

Nampa kucini' sikamma anjo empoang kala'biranga siagang sikamma tau niaka ammempo irate nisarei koasa untu' annappuki hukkungang. Kucini' tommi nyawana sikamma tau le'baka nisamballe passabakkang a'jari sa'bina ke'nanga ri passala'na Isa, siagang napa'la'bang pappasang battua ri Allata'ala. Yangasenna anjo taua tanasombayai olo'-oloka, yareka patunna. Tena todong nale'ba' ke'nanga anggappa pammatei battu ri anjo olo'-oloka, iamintu pammatei irateanganna kanynyinna yareka ri limanna ke'nanga. Jari attallasa' poleammi ke'nanga siagang ammarentami a'jari karaeng ke'nanga sisa'bu taung sallona siagang Almasi.

PAPPICINI' 20:6

Maupaki sikamma tau nipattallasa' poleanga todong ri anjo wattu bungasaka. Iami ke'nanga siratang a'jari taunNa Allata'ala. Tenamo nakoasa kamateang makaruaya mae ri ke'nanga. La'jarimi ke'nanga imang-imanNa Allata'ala siagang imang-imanNa Almasi; na lammarentamo ke'nanga siagang Ia sa'genna sisa'bu taung sallona.

LUKAS 12:9

Mingka inai-nai assassala' ri dallekanna tau jaia angkanaya amminawangi ri Nakke, lanisassali tongi sallang ri Ana' Ma'rupataua ri dallekanna malaeka'-malaeka'Na Allata'ala.

PAPPICINI' 5:10

Kipa'jarimi ke'nanga se're bansa nisa'laka iamintu bansa imang-imang sollanna nalayani ke'nanga Allata'alata, nammarenta irateanganna linoa.”

LUKAS 9:26

Inai-nai siri'-siri' angngakuiA' siagang antarimai pangngajarangKu, lasiri'-siri' tongi Ana' Ma'rupataua angngakui sallang punna battu siagang koasaNa, kammayatompa koasaNa ManggeNa siagang koasana malaeka'-malaeka' matangkasaka!

PAPPICINI' 2:13

Kuassengi angkana kemaeko ammantang. Lalangko ammantang ri tampa' kakoasanna Billisika. Tamamminrayako mae ri Nakke. Ba'lalo, ri wattunna nibuno Antipas ri Billisika ri dallekannu, iamintu sa'biKu tamamminraya, tena todong nanussassala' angkanaya tappakko mae ri Nakke.

PAPPICINI' 1:9

Inakke Yohanes, sari'battannu ngaseng, nuaganga' a'julu sessa sangkamma nakasiaka sikontu tau amminawanga ri Almasi. Sa'barakki' angkasiaki kasessanga, lanri ikatte anne umma'Naki'. Nipelakka' mange ri Pulo Patmos passabakkang kupa'la'bangi pappasang battua ri Allata'ala, Napakajarreka Isa lalang ri kasa'bianNa.

YUDAS 1:4

Nasaba' tanisa'ringai na nia'mo siapa are tu kodi ateka' antama' ri tangnga-tangngata. Anjo ke'nanga sangnging tau panra'; naputara' baleki biritta pangngamaseanNa Allata'alata, sollanna akkulle anggappa kasampatang ke'nanga untu' anggaukangi ero' hawa napasuna. Taerokai ke'nanga antarimai Isa Almasi, Batara Makoasa tena ruanna. Battu riolo dudu iji nanipau la'bi riolo memammo lalang ri Kittaka hukkungang lanagappaya ke'nanga.

FILIPI 1:28

Paralluko tuli barani; teako mallaki mae ri musu-musunnu. Iaminjo a'jari butti angkanaya ma'nassa lanibetai ke'nanga, na ikau mattantu lammeta, nasaba' KalenNa Allata'ala ampassareangi anjo pammetanga mae ri kau.

MARKUS 8:38

Punna nia' tau siri'-siri' angngakuiA' siagang pangngajarangKu ri anne jammang sannaka dorakana siagang ja'dala'na, tena todong Naero' Ana' Ma'rupataua angngakui sallang punna battui siagang koasaNa ManggeNa, nirurungang ri malaeka'-malaeka' matangkasa'Na.”

MATIUS 26:35

Appialimi Petrus nakana, “Manna pole lasikamateangki', mingka tena sikali nakuero' ansassaliKi'!” Kammayatompa ana'-ana' gurunNa maraenga akkana kamma ngaseng tommi.

PAPPICINI' 3:8

Kuassengi apa nugaukanga ngaseng. Kuassengi angkanaya tena nasiapa kagassingannu; nuturukimi pangngajarangKu siagang tamamminrayako mae ri Nakke. Kusungkeang mako se're pakke'bu' untu' ikau ngaseng, tenaya nakkulle natongko' manna pole inai.

PANGNGEBARANG 30:9

Saba', punna kalumanynyanga', gassingka kukana sallang angkana tenamo kuparalluangKi'. Na punna kasi-asia', gassingka a'lukkaka' sa'genna kura'massi arenTa.”

LAMPA-LAMPANA 14:22

Napakajarre'mi atinna sikamma tau tappaka ri Isa ri anjo kota-kotaya. Napakainga'mi ke'nanga, sollanna tuli jarre' tappa'na mae ri Isa. “Musti jai rolong pa'risi' nikasia', nampa akkulle nikasia' mate'nea lalang ri Lino BeruNa Allata'ala,” kammami anjo napangngajarrang tunisuroNa Allata'ala mae ri sikamma tau tappakamo mae ri Isa, ri anjo kota-kotaya.

MARKUS 10:33

Nakana, “Pilangngeri anne; kamma-kamma anne a'lampa maki' mange ri Yerusalem. Anjoreng lanipassareammi Ana' Ma'rupataua mae ri imang-imang kapalaya siagang guru-guru agamaya. Lanihukkung matei, nampa nipassareang mae ri tu kapereka.

MATIUS 26:75

Nau'rangimi Petrus le'baka Napau Isa ri ia angkanaya, “Ri tenanapa nattingkoko janganga na pintallumMa' nusassali.” Assulukammi Petrus angngarru', si'na pa'mai'na.

PAPPICINI' 1:6

Nampa Napa'jariki' se're bansa imang-imang, allayania mae ri Allata'ala, ManggeNa. Iaminjo Isa Almasi malompoa siagang makoasaya sa'genna satunggu-tungguna. Aming!

LUKAS 22:29

Sangkamma nasareMa' pangngellai ManggeKu ammarenta, sangkamma tommi anjo, laKusare tongko pangngellai kammaya.

LUKAS 22:30

Lanri kammana, akkulle tommako amminawang a'rannu-rannu siagang iNakke ri wattungKu a'jari Karaeng. Siagang lammempo ngaseng tommako irate ri sampuloa anrua empoang kala'birang, untu' ammarenta ri sampuloa anrua bansa Israel.”

ROMA 5:17

Passabakkang se're tau doraka, na'la'bammo kamateanga tete ri anjo tau se'rea. Mingka la'biangampa lompona barakka'na mae ri rupataua passabakkang se'rea tau maraengannaya, iamintu Isa Almasi. LaNapa'la'bang bawang-bawangi pangngamaseanNa Allata'ala mae ri ke'nanga sa'genna akkulle ke'nanga assibajiki ammotere' siagang Allata'ala; lamakoasai ke'nanga ri anne linoa lanri Isa Almasi.

1 TIMOTIUS 5:8

Mingka punna nia' tau tena naparakai bija pammanakanna, la'biangampa nabone balla'na tonja, anjo tau kammaya nasassalimi katappakkanna; anjo tau kammaya la'bi kodiangammi natau tenaya natappa'.

PAPPICINI' 3:10

Lanri nuturukimi apa Kuparentakanga mae ri kau, iamintu Kukellaiko tamalanrea, laKujagai mako ri kasusaang lantujuai sallang sikontu linoa. Lakajariangi anjo sikammaya, untu' a'jari paccoba mae ri sikontu rupataua ri lino.

PAPPICINI' 3:21

Ia ammetaya, laKupa'biangi ammempo ri empoang kala'birangKu siagang sipammempoangA' sangkamma Kalengku le'bakamo ammeta siagang kamma-kamma anne siagang ManggeKu ri empoang kala'biranNa.