2 SAMUEL 4:1 - KITTA' MATANGKASA'

^1-4 Jari-jarina Saul maraenga iamintu Mefiboset, ana'na Yonatan. Anjo taua tempangi battu ri umuru' liman taung, iamintu ri wattunna mate Saul siagang Yonatan. Nasaba' ri wattunna battu kabara' kamateanna ke'nanga battu ri kota Yizreel, lari patarintina Mefiboset angkalawingi; mingka lanri ta'lalo akkaro-karona anjo bainea, tu'guruki anjo anaka sa'genna tempang. Nalangngere'na Isyboset iamintu ana' bura'nena Saul angkanaya le'ba'mi nibuno Abner ri Hebron, lanynya'mi sumanga'na, siagang annekkere' ngasemmi sikontu bansa Israel. Nia' rua perwira tantarana Isyboset, a'jaria kapala pasukang untu' maju a'bundu'; se'rea niarengi Baana, nampa se'reanga pole niarengi Rekhab. Anjo ke'nanga ana'na Rimon, battu ri Beerot battu ri suku Benyamin. (Anjo Beerot antamaki daerana Benyamin. Pandudu' riolona larimi mange ri Gitaim nampa ammantang anjoreng appakkaramula anjo wattua.)

2 SAMUEL 4:1 Referans Kwoze

EZRA 4:4

Nampa appakkaramulamo anjo pandudu' salloamo ammantang ri anjo pa'rasanganga ampakalammai sumanga'na tu Yahudia, siagang nagaratta'mi ke'nanga sollanna napammari ke'nanga anjo pambangunanga.

YESAYA 13:7

Tunggala' taua lanakasiaki mate limanna siagang tappela' kabaranianna.

YEREMIA 6:24

Nalangngere'na anjo kabaraka, naummi sumanga'na pandudu' Yerusalem. Nibattuimi ri malla', siagang sessami pakkasia'na ke'nanga rapang baine eroka ammana'.

ZEFANYA 3:16

Lanarapiki wattunna nalakkana sallang taua, “He Yerusalem, teako mallakki siagang teako la'bai pa'mai'nu.

YEREMIA 50:43

Nalangngere'na anjo kabaraka, lammami nasa'ring karaeng Babel. Nibattuimi ri malla', siagang pa'risi'mi nasa'ring kamma baine eroka ammana'.

YESAYA 35:3

Pakajarreki limanna tau lammaya, kassaki kulantu' ta'lenggaya.

NEHEMIA 6:9

Nacoba-cobami ke'nanga anggarattaka' sollanna napammari ikambe anjo jama-jamanga. Appala' doamma' angkana, “O, Allata'ala, pakajarreki pa'maikku!”

2 SAMUEL 17:2

Lakumajui kubunduki ri wattunna mangngang siagang runtung sumanga'na. Lakupata'bangkai, sa'genna lari sikontu ana' buana. Karaeng Daud bawang lakubuno.

2 SAMUEL 3:27

Tena nasallo battuna Abner mange ri Hebron, nikio'mi ri Yoab mae ri sa'ri, mae ri ampi'na pakke'bu' lompoa, sangkamma angkanaya nia' rahasia lanabicara. Ti'ring natobo'mi Yoab parru'na Abner sa'genna mate. Kammaminjo namatemo Abner nibuno ri Yoab untu' ambalasaki pammunoanna Abner ri andi'na Yoab iamintu Asael.

2 SAMUEL 2:8

Ia panglimana tantarana Saul, iamintu Abner ana'na Ner, larimi siagang Isyboset ana'na Saul, mange ri Mahanaim ri ba'leanna Binanga Yordan.