2 KORINTUS 5:10 - KITTA' MATANGKASA'

¹⁰ Nasaba' attantumi angkanaya lanierangki' mange andallekang ri pangadelanNa Almasi; siagang massing langgappa maki' pa'balasa' situru' apa le'baka nigaukang ri linoa anne, iamintu panggaukang baji' yareka panggaukang ja'dala'.

2 KORINTUS 5:10 Referans Kwoze

MATIUS 16:27

Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua.

PAPPICINI' 22:12

Nakana Isa, “Parhatikangi anne! Tenamo nasallo Kubattu angngerang sawala' untu' lanipa'balassang mae ri sikamma taua situru' apa massing le'baka nagaukang.

EFESUS 6:8

U'rangi angkanaya, massing-massing rupataua, baji' na ata yareka natau bebasa', lannarima ngasengi pa'balasa' battu ri Batara situru' apa-apa baji' le'baka nagaukang.

KATO'BA 12:14

LaNaadeli ngasengi Allata'ala sikontu panggaukanta; ia bajika siagang kodia, ba'lalo manna pole toccokkoa.

PAMMUJI 62:12

Pissiapammi kulangngere' Allata'ala angkana, anjo kakoasanga battu ri Ia,

1 KORINTUS 4:5

Lanri kammana, nasaba' tenapa narapiki wattunna, teako akkaro-karo dudui ampattantui angkanaya salai yareka tena nasala se'rea tau. Tayangi sa'genna battu sallang Batara. Iami lassungke ngasengi sikontu rahasia taccokkoa lalang ri sassanga. Iami lampakacinikang ngasengi sikontu apa le'baka narancana lalang ri massing atinna taua. Iapi anjo wattua nampa massing lannarima taua pujiang siratannaya battu ri Allata'ala.

1 PETRUS 4:5

Mingka musti nituntuki sallang ke'nanga ri Allata'ala, Ia sadiayamo untu' angngadeli sikontu tau attallasaka siagang tau matea.

PAMMUJI 98:9

Saba' battui untu' angngadeli linoa; bansa-bansaya laNaadeli siagang adele' na tojeng.

LAMPA-LAMPANA 17:31

Nasaba' le'ba'mi Napattantu wattunna nalaNaadeli sikontu bonena anne linoa siagang adele'. Anjo tugasaka lanagaukangi tau le'bakamo nipile ri Allata'ala untu' anggaukangi anjo tugasaka. Na sollanna akkulle tappa' ngaseng taua ri anjo passalaka, Napattallasa' poleammi Allata'ala anjo taua battu ri kamateanga!”

LAMPA-LAMPANA 10:42

Na Nasuromo anne ikambe ampabattui anjo Kabara' Bajika mange ri sikontu rupataua. Kammayatompa a'jari sa'bi angkanaya Iami niangka' ri Allata'ala a'jari Haking mae ri sikontu tau attallasaka ija siagang tau mateamo.

AYUB 34:11

Nahukkungi taua situru' panggaukanna, Nagauki taua situru' gau'na.

PAPPICINI' 2:23

Sikamma ana' gurunna laKubuno ngaseng tongi, sollanna nasadari ngaseng jama'aka angkanaya iNakkemi anne angngasseng ngasengi pikkiranna siagang nawa-nawanna rupataua. LaKubalasa' ngasengko situru' massing-massing panggaukannu.

KATO'BA 11:9

Kasia' baji'mi wattu karungkannu, he ikau tau rungkaya! Rannu mako ilalang lolonu ija. Rupaimi sikamma nakaerokia nyawanu, gaukamma sikontu naniakkanga pa'mai'nu. Mingka u'rangi, Allata'ala niaka ri suruga, langngadeli ngasengi sikontu apa nugaukanga.

YEHEZKIEL 18:30

Nakana Batara Kaminang Tinggia, “He tu Israel, laKuadeli tunggala' taua situru' massing panggaukanna. Toba' mako battu ri dosa-dosanu. Teako lappassangi dosanu angngancuruki kalennu.

1 KARAENG-KARAENG 8:32

o Batara, poro Kipilangngeri ri suruga siagang Kitappuki parkarana anne ata-atanTa ngaseng. Hukkungi tau salaya situru' panggaukanna, siagang Kilappassangi tau tenaya nasala.

PA'JARIANG 18:25

Tea laloi nanibunoi anjo tau tenaya salana assama-sama siagang tau salaya. TeaKi' Batara! Nasaba' punna kamma anjo laKigaukang, ma'nassa anjo tau tenaya salana lanipasihukkungi siagang tau niaka salana. Maka akkullei hakinna sikontu linoa la'gau' tena adele'!”

1 KARAENG-KARAENG 8:39

poro Kipilangngeri lalang ri suruga tampa' pammantanganTa siagang Kipammopporangi na Kitulung ke'nanga. Poro iKatteji bawang angngassengi bone atinna rupataua. Lanri kammana anjo, Kigaukammi mae ri taua massing-massing situru' panggaukang-panggaukanna,

1 SAMUEL 2:10

Musu-musunNa Batara ancu'-ancuruki, mallaki ke'nanga; a'gunturuki battu ri langika. Batara angngadeli sikontu anne linoa, na Nasare koasa mala'biri' ri karaeng Nipilea.”

ROMA 6:19

Nasaba' sukkara' sikali nupahang, ammakema' pangngebarang mae ri nikanaya a'jari ata sollanna gampang nupahang. Riolo nupassareangi sikontu batangkalennu a'jari ata mae ri apa-apa ra'masaka siagang panggaukang ja'dalaka untu' kaja'dallanga. Kamma tomminjo ri kamma-kammaya anne, musti nupassareangi sikontu batangkalennu a'jari ata mae ri ero'Na Allata'ala, untu' anggaukangi ero'Na bawang Allata'ala.

1 SAMUEL 2:3

Pammarimi bicara kosonga! Pa'le'ba'mi bicara borroa! Nasaba' anjo Batara, Allata'ala Kaminang mapahang; Ia angngadeli sikontu panggaukanna taua.

2 KORINTUS 7:3

Teai lanri ero'nu kusalakang nakuakkana kamma anne mae ri kau ngaseng. Nasaba', kamma le'bakamo kupau, sanna' kikamaseannu, kammayatompa sanrapang maki' tau assari'battang, sikatallassang sikamateang.

ROMA 2:16

Kammaminjo lakajarianga sallang ri allo le'bakamo nipattantu. Ri anjo alloa – situru' Kabara' Baji' kubirittakanga – laNaadeli Allata'ala lalang Isa Almasi rahasia atinna siagang rahasia pikkiranna sikontu rupataua.

IBRANI 9:27

Le'ba'mi Napattantu Allata'ala angkanaya sikaliji bawang mate rupataua. Le'baki anjo niadelimi ri Allata'ala.