2 KORINTUS 4:7 - KITTA' MATANGKASA'

⁷ Mingka anjo pa'barang-barangang rohani ga'gaya, ikambemi anne angngerangi, iami antu tubu tenaya anggaranna lanri buttaji nipare'. Lanri kammana, ma'nassami angkanaya anjo koasa malompoa niaki ri Allata'ala, jari tena nania' ri kambe.

2 KORINTUS 4:7 Referans Kwoze

2 KORINTUS 5:1

Nasaba' naassemmi ikambe angkanaya punna nibongkara' anne balla' nipammantangia ri lino, iamintu pangngebarranna tubuta, le'ba' memammi Napasadia Allata'ala balla' niaka ri suruga; iamintu balla' Napareka KalenNa Allata'ala siagang akkullea attahang sa'genna satunggu-tungguna.

1 KORINTUS 1:28

Napilemi Allata'ala apa-apa nicini' rawaya, nicini' tunaya, yareka nicini' tenaya matu-matunna ri anne linoa, sollanna Naancu'-ancuru' Allata'ala apa-apa nicini' mala'birika ri anne linoa.

KOLOSE 2:3

Almasimi ampa'nyatai sikontu apa-apa tenayapa niassengi battu ri kacara'dekanNa siagang pangngassenganNa Allata'ala, ia taccokkoa riolo.

PIRAUNG 4:2

Riolo ana'-ana' rungkana Kota Sion rapangi bulaeng tinggia anggaranna, mingka anne kamma nipare' mami rapang uring butta bawang.

KOLOSE 1:27

Mae ri anjo umma'Na, eroki Allata'ala ampa'nyatai antekamma baji'na siagang mala'biri'na anjo rahasiaNa untu' sikontu rupataua. Anjo rahasiaya, iamintu: Niaki Almasi lalang ri kalennu; battuanna langgappa tongko bageang lalang ri kalompoanNa Allata'ala.

EFESUS 3:8

Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na;

2 KORINTUS 10:10

Lanakana kapang taua, “Sanna' terasa'na siagang sanna' baji'na sura'-sura'na Paulus. Mingka punna kalenna nia' ri tangnga-tangngata, lamma sikaliji siagang tena nasiapa pau-pauna!”

MATIUS 13:44

“Punna ammarenta Allata'ala, pangngebaranna lakammaminne: Nia' barang-barang taccokko lalang butta, nanibuntulu' ri se'reang tau, na napoterang pole anjo baranga antama' ri buttaya. Nampa, lanri teai sipato' rannuna, a'lampami anjo taua ambalukang ngasengi sikontu barang-baranna, na nampa ammotere' amballi anjo tampaka sumpaeng.”

2 TIMOTIUS 2:20

Lalang se'rea balla' lompo nia' a'rupa-rupa pakkakasa' balla'. Nia' pakkakasa' pera' yareka bulaeng, mingka nia' todong battu ri kayu yareka butta. Nia' lanipake untu' kaparalluang lompo, na nia' todong lanipake untu' kaparalluang biasa.

2 KORINTUS 4:1

Lanri pangngamaseanNa Allata'ala nakkulle nagaukang ikambe anne jama-jamanga. Iaminjo saba'na natena natappu' panrannuang ikambe.

KOLOSE 2:12

Nasaba' ri wattunnu nije'ne', iaminjo a'jari pammatei angkanaya nitarawang mako siagang Almasi; siagang iatommi anjo pa'je'neka a'jari pammatei angkanaya nibangung poleang todong mako battu ri kamateanga siagang Almasi, lanri tappa'nu ri koasaNa Allata'ala, ampabangung poleangai Almasi battu ri kamateanga.

AYUB 4:19

La'bipa apa attallasa' nipareka battu ri butta pi', limbu'buka nipare', akkullea niti'rasa' rapang alitana!

1 TESALONIKA 1:5

Nasaba' teai lalang kana-kana bawang batena ikambe ampabattui anne Kabara' Bajika, mingka lalang koasaNai siagang lalang RohNa Allata'ala, siagang lanri matappa'na ikambe ri katojenganna anjo Kabara' Bajika. Ri wattunna nia' ikambe ri tangnga-tangnganu, nuassemmi antekamma batena attallasa' ikambe untu' kabajikannu.

EFESUS 2:5

sa'genna ri wattunna mate katallassang rohanita, lanri gau'-gau' salata, Napattallasa' poleang maki' ammotere' siagang Almasi. Jari, lanri kabajikanNa bawang Allata'ala, naNapasalamakko.

2 KORINTUS 13:4

Memang, ri wattunna nisalli' lammai; mingka kamma-kamma anne attallasa' poleammi lanri kakoasanNa Allata'ala. Ikambe tulamma tonjaki' lalang assileo'na katallassanta siagang Almasi; mingka punna sidallekangki' siagang ikau ngaseng, a'jari majarre' tommaki' lanri koasaNa Allata'ala.

HAKING-HAKING 7:2

Nakanamo Batara ri Gideon, “Jai dudui taunnu. Tena Kuero' assarei pammetang mae ri tu Midianga. Nasaba' nakana sallang ke'nanga, ammetai lanri kagassingang kalenna ke'nanga, sa'genna teaimi Nakke napakalompo.

2 KORINTUS 6:10

Manna nanipakasi'na pa'maitta, mingka tuli rannujaki'. Kasi-asi maki' nicini', mingka jaimi tau nipa'jari kalumanynyang. Tena nicini' apa-apanta, mingka sikontutojenna nia' ngasemmi ri katte sikontu apa-apaya.

MATIUS 13:52

Jari Nakanamo Isa, “Lanri kammana minjo na anjo sikamma guru agama a'jariamo umma'Na Allata'ala, sanrapangi patanna balla' ampasuluka ngasengi barang-barang beruna siagang barang-barang sallona battu ri pammolikang barang-baranna.”

AYUB 10:9

Kiu'rangi angkana battu ri butta pi' nakiparekka'! Masa' laKipa'jari limbu'buka' ammotere'?

AYUB 33:6

Mae ri Allata'ala, ikau siagang inakke tena sisalata battu ri butta pi' ngaseng jaki' nipa'jari.

YOHANES 16:33

Kupau ngasengi anne mae ri kau, sollannu anggappa salewangang lanri asse're ngasengko siagang iNakke. Lasessako lalang ri linoa. Mingka jarreki pa'mai'nu! Le'ba'mi Kubeta anne linoa!”

1 TESALONIKA 4:4

Sikontu bura'ne-bura'ne niaka ri kau parallui naasseng antekamma carana attallasa' siagang bainenna siagang matangkasa' na baji', napakasannang atinNa Allata'ala siagang rupataua.