2 KORINTUS 3:1 - KITTA' MATANGKASA'

¹ Maka sangkammai angkanaya napuji kalenna ikambe ilalanna anne passalaka? Yareka nakulle parallui ikambe sura' pammuji untu' ikau, yareka battu ri kau, sangkamma naparalluanga sikamma tau maraenga?

2 KORINTUS 3:1 Referans Kwoze

2 KORINTUS 12:11

A'gau' sanrapang tojemma' tau dongoka – mingka passabakkang ikaumi naku'jari kamma anjo. Sikontutojenna ikau ngasemmi siratang ampujia'. Nasaba' manna tena sikali anggarangku, mingka tena nakunibeta ri sikamma anjo suro balle-balle nukanaya sannaka porena!

2 KORINTUS 10:12

Tantu tena nakibarani ampasangkammai yareka ampasantinggi kalenta siagang tau nakanaya kalenna tinggi. Teai sipato' dongo'na ke'nanga! Appareki pa'baku' untu' kalenna ke'nanga, nampa napake anjo pa'bakuka mae ri kalenna.

2 KORINTUS 5:12

Mingka teai lanri ero'na ikambe appala' pammuji battu ri kau ngaseng. Passangalinna lanri ero'naji bawang ikambe assareko alasang baji', sollanna lompo pa'mai'nu mae ri kambe; sollannu angngasseng appiali mae ri tau angngalleangangai apa-apa nacinika ri tanja'na taua, na ia sipa'-sipa'na.

LAMPA-LAMPANA 18:27

Le'baki anjo apparurumi Apolos ero' a'lampa mange ri Akhaya. Jari annulisi'mi sura' tau tappaka ri Isa niaka ri Efesus mae ri tau tappaka ri Akhaya sollanna ero' ke'nanga antarimai Apolos siagang te'ne pa'mai'. Na ri wattunna Apolos mange ri Akhaya, ma'nassa sanna'mi lompona matu-matunna pannulunna mae ri sikamma tau tappaka ri Isa lanri pangngamaseanNa Allata'ala.

1 KORINTUS 16:3

Punna battua' sallang, lakusuromi tau le'baka nupassamaturuki untu' a'lampa angngerangi anjo sumbanganga. Lakusarei ke'nanga sura' pangngantara', sollanna naerang ke'nanga anjo sumbanganga mange ri Yerusalem.

2 KORINTUS 12:19

Gassingka nukana ngaseng anne siapa sallona erokka' alliliangi kasalangku mae ri kau. Sala pahang sikaliko antu. Naassengi Allata'ala angkanaya yangaseng anjo napaua ikambe situruki ero'Na Almasi. Sikontu anjo apa kigaukanga iamintu untu' ambangung ngasengi tappa'nu.

2 KORINTUS 10:8

Tena nakusiri'-siri' tuli angkalompoang pa'maiki kakoasang le'baka Napassareang Batara mae ri kambe. Nasaba' anjo kakoasanga eroki nipake untu' ambangungko. Teai untu' anruntungko.

2 KORINTUS 2:17

Ikambe tena kisangkamma taua, ampare' kammai danggangang biritta battua ri Allata'ala. Ikambe ci'nongi pattujunta, nasaba' Allata'ala assareki' jama-jamang. Siagang KalenNa Allata'ala anciniki angkanaya nipa'jari atanNami Isa kalenta ampabattui anjo birittaya.

1 KORINTUS 10:33

Pasangkammami bateku attallasa' batenu todong attallasa'. Inakke kuusahakangi sollanna sannang ngaseng taua mae ri nakke; mingka teai lanri nia'na kaparalluang kalengku kuboya. Iaji kuboya iamintu sollanna nipasalama' ngaseng ke'nanga.

1 KORINTUS 4:15

Nasaba' inakkemi a'jari manggenu ngaseng, manna pole ebara' angkana nia'mo sampulo sa'bu gurunnu. Lalang attallasa'numo a'jari se're siagang Almasi inakkeji bawang a'jari manggenu, nasaba' inakke ampabattui anjo Kabara' Baji' battua ri Isa Almasi mae ri kau.

1 KORINTUS 3:10

Sanrapanga' tu nisare kacara'dekang a'jari panrita balla' ri Allata'ala. Iami anjo kacara'dekanga kupake le'ba' ampadongkoki batu pondasina anjo bangunanga, nampa tau maraeng ampatulusuki ambangung irateanna anjo pondasia. Sikontu taua musti naparhatikangi baji'-baji' antekamma batena musti ambangung irateanna anjo pondasia.

ROMA 16:1

Eroki kupappiassengang ri kau ngaseng, sari'battang baineta, iamintu Febe. Iami ambantui jama'aka ri Kengkrea.

2 KORINTUS 10:18

Nasaba' tau akkullea nipuji iamintu tau nipujia ri Batara; teai tau ampaleceai kalenna.