2 KARAENG-KARAENG 9:13 - KITTA' MATANGKASA'

¹³ Akkaro-karomi agang-aganna Yehu ansungkei jubana ke'nanga nampa napaka'rang ri tukaka ri dallekanna Yehu. Nampa appasa'ra ke'nanga tarompe' siagang a'gora angkana, “Yehu a'jari karaeng!”

2 KARAENG-KARAENG 9:13 Referans Kwoze

1 KARAENG-KARAENG 1:39

Nampa angngalle Zadok minynya' zaitun le'baka naerang battu ri KemaNa Batara, nampa naminynyaki na naangka' Salomo a'jari karaeng. Nipasa'rami tarompeka nampa sikontu tau hadereka anjoreng akkio'mi angkana, “Mattallasaki Karaeng Salomo!”

1 KARAENG-KARAENG 1:34

Anjoreng musti niangkaki ri Zadok siagang Natan a'jari karaeng Israel. Le'baki anjo musti nupasa'rai tarompeka nampa akkio' rannuko angkana, ‘Mattallasaki Karaeng Salomo!’

PAMMUJI 98:6

Pasa'rai musika siagang tarompeka, akkio' rannuko mae ri Batara, Karaenta.

2 SAMUEL 15:10

Mingka rioloangannaya anjo le'ba'mi akkiring siapa are tunisuro mae ri sikontu suku Israel angngerang pasang angkana, “Punna allangngerekko sa'ra tarompe', akkio' mako angkana, ‘A'jari karaemmi Absalom ri Hebron!’ ”

2 KARAENG-KARAENG 9:12

Appialimi ke'nanga angkana, “Tena, tena tojempa niassengi anne. Pau laloi!” Appialimi Yehu angkana, “Napabattuanga' pasanNa Batara angkanaya niangkakka' a'jari karaeng Israel.”

1 KARAENG-KARAENG 1:25

Annemi alloa nale'ba' assare jai koro'bang gimbala', sapi laki, siagang ana' sapi co'mo'-co'moka. Yangaseng ana'-ana' bura'neta naundangi. Kammayatompa sikamma panglima tantarata siagang Imang Abyatar. Kamma-kamma anne sitabangi ke'nanga assua'-suara' siagang akkiok-kio' rannu angkana, ‘Attalasaki Karaeng Adonia!’

2 KARAENG-KARAENG 11:12

Le'baki anjo nierammi Yoas assulu' ri Yoyada, nampa napataba ri ulunna Yoas songko' kakaraenganga, siagang napassareang mae ri ia kitta' HukkunNa Allata'ala. Nilanti'mi Yoas a'jari karaeng, nampa nipa'la'bang anjo passalaka mae ri sikontu ra'yaka. Attempa lima kabusu'mi ke'nanga siagang akkio' rannu angkana, “La'bui umuru'na karaenga!”

2 KARAENG-KARAENG 11:14

Nacini'mi anjo karaeng berua ammenteng ri pakke'bu' antamaya ri Balla'Na Batara ri napattampakkia nilanti', nitammulili ri perwira-perwiraya siagang patui' tarompeka. Sikontu ra'yaka akkio' rannu kabusuki nampa nipasa'raya tojeng tarompeka. Lussa'mi nasa'ring nyawana Atalya nanakekke' pakeanna, siagang a'gora angkana, “Pasingkongkolang! Pasikongkolang!”

LUKAS 19:36

Lalang numalona Isa andongkoki anjo keledaia, napalapara'mi jubana taua ri agang laNaoloa Isa.