2 KARAENG-KARAENG 6:10 - KITTA' MATANGKASA'

¹⁰ Jari napakainga'mi karaeng Israel sikamma tau niaka a'reppese' ammantang anjoreng sollanna sadia-sadia. Kammami anjo pissiapa arei Elisa ampakaingaki karaenga.

2 KARAENG-KARAENG 6:10 Referans Kwoze

IBRANI 11:7

Lanri tappa'na nanatarimamo Nuh pappakainga' Napassareanga Allata'ala mae ri ia; iamintu passala'na apa-apa lakajarianga tenaya nakkulle nacini' Nuh. Naturukimi Nuh kananNa Allata'ala. Jari appare'mi se're biseang lompo. Nama'nassa iaminjo biseang lompoa ampasalamaki kalenna siagang pole sikamma ana'na siagang tubai'-bainena. Jari nihukkummi linoa, mingka Nuh nipattojemmi ri Allata'ala nikana tau baji' lanri tappa'na.

LAMPA-LAMPANA 27:24

Nakana anjo malaekaka, ‘Teako mallakki Paulus! Nasaba' lamangeko andallekang ri Karaenga ri Roma. Lanri kabajikanNa Allata'ala mae ri kau, nasikontu anne tau nuaganga assombala', lanipasalama' ngasengi passabakkang ikau.’

MATIUS 3:7

Jai tommi tu Farisi siagang tu Saduki battu mae ri Yohanes, ero' assuro je'neki kalenna. Mingka nacini'na Yohanes battu todong ke'nanga, nakanamo ri ke'nanga, “Ikau ngaseng tu ja'dalaka! Inai ampauangko angkanaya akkullei nuliliang hukkunganNa Allata'ala, labattua sallang mae ri kau?

MATIUS 2:12

Ri lammotere'na ke'nanga, nipauammi ri Allata'ala lalang so'na, sollanna tea ammoteri ke'nanga mange ri Herodes. Jari oloang maraemmi naolo ke'nanga ammotere' mange ri pa'rasanganna.

PANGNGEBARANG 27:12

Tau cara'deka a'lili punna nia' nacini' bahaya; tau toloa a'jappa tulusuki nampa nituju ri bala.

2 PATTOTTORANG 20:20

Ammukona bari'basa' dudu, assulu'mi ra'yaka nampa a'lampa mange ri daera parang lompoa ri ampi'na Tekoa. Ri wattunna ero' appakkaramula ke'nanga a'lampa, appasammi Karaeng Yosafat ri ke'nanga angkana, “He ra'ya' Yehuda siagang Yerusalem! Tappakko mae ri Karaeng Allata'alanu, sollannu akkulle attahang. Tarimai pappakainga'na na'bi-na'binu, sollannu akkulle ammeta.”

2 KARAENG-KARAENG 13:14

Ri se'reang wattu garring sannaki Na'bi Elisa, na nia' battu Karaeng Yoas antoaki. Ri wattunna nacini' angkanaya la'birimmi mate Elisa, angngarru'mi karaenga siagang nakanamo, “O Bapakku, Bapakku, pannulung lompona tu Israel!”

2 KARAENG-KARAENG 5:14

Lanri kammana anjo a'lampami Naaman mange ri Binanga Yordan nampa antama' ampaselangi kalenna pintuju sangkamma napassuroanga Elisa. Na'jari baji'mo Naaman. A'jari baji'mi ammotere' tanja'na kalenna sangkamma kale turungka.

2 KARAENG-KARAENG 2:12

Naciniki Elisa anjo kammaya nampa akkio' angkana, “Elia, bapakku! Bapakku! Pajagana Israel malompoa! Tenami bapakku!” Jari lanynya'mi Elia battu ri paccini'na Elisa. Si'nami nyawana Elisa na nakekke' jubana a'jari rua.

1 KARAENG-KARAENG 20:15

Jari napagio'mi karaenga sikamma tantara rungka-rungkaya pangawala'na sikamma kapala daeraya. Yangasenna nia' 232 tantara. Nampa napakammatommi anjo tantara Israel. Yangasenna nia' 7.000 jaina tau.

2 KARAENG-KARAENG 6:9

Mingka akkirimmi Elisa kabara' mange ri karaeng Israel untu' ampakaingaki sollanna tena na'lampa ke'nanga mange anjoreng ri tampaka, lanri biasana tu Siria anjorengi angngalle oloang.

2 KARAENG-KARAENG 6:11

Sanna'mi birisi'na karaeng Siria ri anjo passalaka, sa'genna nakio' sikamma perwira tantarana nampa akkuta'nang angkana, “Ma'nassa nia' tau ri katte a'bali'ballang. Inai anjo taua? Paui!”

YEREMIA 11:18

Napauanga' Batara ri passala'na rancana ja'dala'na musu-musua mae ri nakke.