2 KARAENG-KARAENG 13:6 - KITTA' MATANGKASA'

⁶ Mingka manna nakamma tena tongija nammari tu Israel anggaukangi dosa-dosa appakkaramulaya nagaukang Karaeng Yerobeam. Tulusu' nagaukanna ke'nanga anjo dosa-dosaya, siagang nalappassang patunna Dewi Asyera ammantang tuli ri Samaria.

2 KARAENG-KARAENG 13:6 Referans Kwoze

1 KARAENG-KARAENG 16:33

Appare' tongi patung rewata baine niarenga Asyera. Jaiangngangi dosa nagaukanga na dosa le'baka nagaukang sikontu karaeng Israel ammarentaya rioloangannaya. Lanri kammana anjo napakabattumi larroNa Batara, Allata'ala Ia mustia nisomba ri tu Israel.

2 KARAENG-KARAENG 13:2

Sangkamma Karaeng Yerobeam ammarentaya rioloanganna, doraka tongi Yoahas mae ri Batara siagang a'jari passabakkang tongi nadoraka tu Israel. Tena nale'ba' nabokoi sikamma panggaukang ja'dala'na.

2 KARAENG-KARAENG 23:4

Le'baki anjo naparentakammi karaenga mae ri Imang Lompo Hilkia, sikamma imang pambantua siagang sikamma pangawala' tugasaka ri pakke'bu' Balla'Na Batara, sollanna napasulu' battu ri anjo Ballaka sikontu pakkakasa' le'baka nipake untu' anynyomba ri Baal, Dewi Asyera, siagang bintoeng-bintoenga. Sikontu anjo barang kammaya natunui Karaeng Yosia ri pantaranna kotaya ri ampi'na Ka'bung Lappara' Kidron, nampa nierang auna mange ri Betel.

2 KARAENG-KARAENG 18:4

Naputtai tampa'-tampa' panynyombanga mae ri rewataya, siagang naruntungi tembo'-tembo' siagang patung-patung Dewi Asyera. Naancuru' tongi ulara' tambagaya bate pare'na Musa niarenga Nehustan. Nasaba', sa'genna anjo wattua tuli attunu iji dupa tu Israel untu' ampakalompoi anjo ulara' tambagaya.

2 KARAENG-KARAENG 17:16

Nadakkai kabusuki sikamma hukkunNa Batara, Allata'alana ke'nanga siagang appareki ke'nanga ruang kayu sapi tambaga untu' nasomba. Appareki ke'nanga patung Dewi Asyera, anynyombai bintoeng siagang mae ri Rewata Baal.

2 KARAENG-KARAENG 10:29

Lanri kammana anjo Nakanamo Batara ri Yehu, “Sikontu apa Kuparentakanga mae ri kau sollanna nigaukang mae ri jari-jarina Ahab, le'ba'mi nugaukang. Lanri kammana anjo a'janjiA' angkanaya ana' cucunnu sa'genna lapisi' makaappaka la'jari karaengi ri Israel.” Mingka tena nattojeng-tojeng pa'mai'na Yehu anturuki hukkunNa Batara, Allata'alana Israel. Naturuki panggaukanna Yerobeam angngerangai tu Israel mae ri gau' dosaya, iamintu anynyombai mae ri patung sapi bulaeng nipaentenga ri Betel siagang ri Dan.

1 KARAENG-KARAENG 16:26

Sangkamma Yerobeam, doraka tommi Omri siagang a'jari passabakkang nadoraka tommo tu Israel siagang anynyomba tommi ke'nanga ri rewataya. Lanri kammana anjo na napakabattumo ke'nanga larroNa Batara, Allata'ala Ia mustia nasomba tu Israel.

1 KARAENG-KARAENG 15:3

Sangkamma manggena, Abiam jai dosa nagaukang. Tena natulusu' majarre' pa'mai'na mae ri Karaeng Allata'alana, tasangkammayai siagang Daud, boe-boena.

PAOLE 7:5

Lanri kammana anjo, rumbangi tampa'-tampa' pakkoro'bangnganna anjo bansa-bansaya, ancuru' ngasengi benteng-benteng batu nakanaya ke'nanga karamaki, ra'bai gamba'-gambara'na barhala Asyera, siagang tunui sikamma patung-patung barhala nasombaya ke'nanga.

1 KARAENG-KARAENG 14:16

Lanibokoi Israel ri Batara lanri dorakanamo Yerobeam siagang a'jaria passabakkang nadoraka todong tu Israel.”

2 KARAENG-KARAENG 13:11

Ia doraka tongi mae ri Batara lanri naturukinna kaja'dallanna Karaeng Yerobeam le'baka angngerangi tu Israel ri panggaukang dosaya.

2 KARAENG-KARAENG 21:3

Tampa'-tampa' panynyombanga mae ri rewataya iamintu le'baka naputta Hizkia manggena, nabangungi ammotere'. Ambangungi tampa'-tampa' pakkoro'bangngang untu' anynyomba mae ri Baal, kammayatompa appareki patung Dewi Asyera, sangkamma todong nagaukang Ahab karaeng Israel. Anynyomba tongi Manasye mae ri bintoeng-bintoenga.

YESAYA 26:10

Manna nabaji' nigaukang ri tau ja'dalaka, tena todong napappilajari apa annabaya. Manna ri pa'rasangang niaka hukkunna jekkong tonji gau'na, na taeroka angngakui koasaNa Batara.