1 TIMOTIUS 3:16 - KITTA' MATANGKASA'

¹⁶ Tena manna sitau akkulle ansassali, antekamma lompona rahasiana agamata, angkanaya: Napa'nyatai KalenNa lalang tubuna rupataua, na nipa'nyata katojenganNa ri RohNa Allata'ala siagang nicini' ri sikamma malaekaka. Nipakkiokkammi birittana mae ri sikamma bansa-bansaya, na nipatappa' ri sikontu linoa siagang niangka' nai' ri suruga.

1 TIMOTIUS 3:16 Referans Kwoze

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

IBRANI 1:3

Iami ampaccayai lalang ri KalenNa singara' kalompoanNa Allata'ala; Iami rupa ma'nyataNa battu ri KalenNa Allata'ala. Iatommi angkatutui kajarrekanna anne linoa, siagang sanna' makoasana kana Napaua. Ri le'ba'namo Nasare oloang rupataua untu' nilappassang battu ri dosa-dosana, mangemi ammempo ri empoang kala'biranNa ri suruga, ammarenta siagang Allata'ala, anna'galaka koasa kaminang tinggi.

MARKUS 16:19

Le'baki a'bicara Isa siagang ke'nanga, ta'angka'mi Isa nai' ri suruga. Anjorengi ammarenta siagang Allata'ala.

ROMA 16:25

Nipujimi Allata'ala! Makoasai anjarreki tappa'nu, situru' Kabara' Baji' battua ri Allata'ala, iamintu ri passala'na Isa Almasi, le'baka kubirittakang. Kubirittakangi anjo passalaka situru' apa Napa'nyataya Allata'ala; iamintu ri sesena rancanaNa Allata'ala, a'bilangngang taungamo tanaassenga taua.

LUKAS 24:4

Lalang ammentenna ke'nanga anjoreng siagang lalang lannasa'na ke'nanga annawa-nawai anjo passalaka, ti'ring nia'mo rua tau ammakeang sannaka kebo'na, battu ammenteng ri ampi'na ke'nanga.

KOLOSE 1:23

Mingka tantu musti tuli majarrekko tappa' siagang ammenteng kassa' ri katappakkannu. Gassingka nulappassangi anjo panrannuang le'baka nisareangko ri wattunna nutarima anjo Kabara' Baji' battua ri Allata'ala. Anjo kabaraka le'ba'mi nibirittakang mae ri sikontu taua ri lino. Na untu' iatommi anjo nainakke anne, iamintu Paulus, ku'jari palayang.

1 YOHANES 1:2

Ri wattunna nipa'nyata anjo tallasaka, nacini'mi ikambe. Iaminjo saba'na na'jari sa'bimo ikambe mae ri anjo passalaka. Kibirittakammi mae ri kau ngaseng passala'na anjo tallasa' sitojennaya siagang mannannunganga, ia niaka siagang Manggea, kammayatompa le'bakamo nipa'nyata mae ri kambe.

1 PETRUS 3:22

siagang lanri nai'Namo ri suruga. Kamma-kamma anne koasaI siagang Allata'ala siagang Naparentami sikontu malaekaka, sikontu tau anna'galaka koasa, kammayatompa sikontu kagassingang niaka lalang ri jama-jamang rohania.

1 PETRUS 1:12

Napaumi Allata'ala mae ri anjo na'bi-na'bia angkanaya anjo apa nagaukanga ke'nanga teai untu' kaparalluang kalenna ke'nanga, passangalinna untu' kaparalluannu; iamintu apa-apa singarakamo nulangngere'na kamma-kamma anne battu ri sikamma tau ambirittakangai anjo Kabara' Baji' ri passala'na Isa Almasi. Napabattumi ke'nanga anjo kabaraka mae ri kau ngaseng lalang koasaNa RohNa Allata'ala, nikiringa battu ri suruga. Ba'lalo manna sikamma malaekaka ero' tongi angngassengi anjo kabara' nabirittakanga ke'nanga.

YESAYA 9:6

Ammarentai salaku turunganna Daud, kakoasanNa tamaka lompona. Tuli laamangi na salewangang pa'rasanganNa; pamarentahanNa ta'dongkoki rate ri hukkung siagang kaadelang anne kamma siagang satunggu-tungguna. Batara Kaminang Makoasaya, mattantu laNarupaina.

KOLOSE 2:2

Nakugaukang ngaseng anne sikammaya, lanri kukellaina a'jari jarre' pa'mai'na ke'nanga siagang namassing sikamaseang, sollanna pila' majarre' ke'nanga a'jari se're. Jari pila' napahang tojemmi ke'nanga na'jari tappa' sa'genna naasseng rahasia battua ri Allata'ala, iamintu KalenNa Isa Almasi.

KOLOSE 1:27

Mae ri anjo umma'Na, eroki Allata'ala ampa'nyatai antekamma baji'na siagang mala'biri'na anjo rahasiaNa untu' sikontu rupataua. Anjo rahasiaya, iamintu: Niaki Almasi lalang ri kalennu; battuanna langgappa tongko bageang lalang ri kalompoanNa Allata'ala.

KOLOSE 1:6

Tassiara'mi anjo kabaraka alla'bang lino. Na nibarakkakimo katallassanna rupataua lanri anjo birittaya; sangkamma todong nibarakkakimi katallassannu appakkaramula ri nulangngere'na anjo passare malammoro'Na Allata'ala na nupahang baji'-baji'.

LUKAS 22:43

Sanna'mi sessana pa'mai'Na Isa. Ammatti'-matti'mi songo'Na naung ri buttaya, sangkamma cera'. Jari pila' attojeng-tojemmi appala' doang. Nampa nia'mo sitau malaeka' battu ampakajarreki.]

MATIUS 3:16

Le'baki nije'ne', assulu'mi Isa battu ri je'neka ri anjo binangaya. Ti'ring tassungkemi langika, nampa nia'mo Nacini' Isa RohNa Allata'ala manurung sangkamma jangang-jangang bodobangkeng, battu attompo' irateanganNa.

1 YOHANES 3:5

Nuassengi angkanaya battui Almasi untu' antangkasi dosa-dosana rupataua, siagang angkanaya tena dosa lalang ri KalenNa.

IBRANI 12:2

Parallui tuli tattuju paccinitta mae ri Isa, nasaba' Iami ampabangungi siagang amparakai tappatta battu ri pakkaramulanna sa'genna kala'busang. Attahangi Isa angkasiaki sessaya ri kayu sallika! TaNajampangiai angkanaya anjo matea ri kayu sallika sannaki appakasiri'na. Iaji bawang Nau'rangi karannuang laNakasiaka sallang. Nakamma-kamma anne ammempomi ri sa'ri kanang empoang kala'biranNa Allata'ala, ammarenta siagang Allata'ala.

1 TIMOTIUS 3:9

Musti anna'gala' jarreki mae ri pangngajarang katappakkang Karistenga, ia le'bakamo Napa'nyata Allata'ala. Musti nagaukangi ke'nanga anjo jama-jamanga siagang situlusu' ati mailalanna.

YOHANES 20:12

Apaji nania'mo nacini' rua malaeka' ammakeang kebo'. Ammempoi anjo ruaya malaeka' ri bate pammantanganna maya'Na Isa, se're ri tuju ulunNa, nase're ri tuju bangkenNa.

MATIUS 1:23

“Nia' sallang se're tulolo latianang siagang allassukang sitau ana' bura'ne. Anjo anaka lanigallaraki Imanuel.” (Imanuel iamintu bicara tu Ibrani, battuanna “Niaki Allata'ala anrurungangki'”.)

PAPPICINI' 7:9

Le'baki anjo kucinikimi pole, na nia'mo kucini' tamparang tau, sannaka jaina tau bonena; tena manna sitau akkulle anrekengi jaina! Ia ke'nanga tau battu ri massing-massing bansa, suku, pa'rasangang, siagang bahasa. Ammenteng ngasengi anjo tau jaia andallekang mae ri empoang kala'biranga siagang andallekang mae ri anjo Ana' Gimbalaka; ammakeang juba kebo' ngasengi ke'nanga siagang massing anna'galaki leko'-leko' kaluku lolo.

1 PETRUS 1:20

Le'ba' memammi nipile Almasi ri tenanapa Napa'jari Allata'ala anne linoa. Na ri allo ma'reppese'namo anne kala'busang jammanga, battumi antama' ri linoa sollannu nipasalama'.

IBRANI 7:7

Memang takkulleai nisassali angkanaya la'bi rawangangangi tau nibarakkakia na ia tau ambarakkakiai.

EFESUS 6:19

Siagang inakke pole, pappala' doangang tonga'; sollanna punna a'bicara', Nasarea' Allata'ala kana-kana cocoka lakupau. Kammayatompa nakubarani ampaui anjo rahasiana Kabara' Bajika.

EFESUS 1:9

Lanri ero' KalenNa, Napauang maki' rahasiana jama-jamang eroka Nagaukang; le'ba'mi Napattantu angkanaya anjo jama-jamanNa laNapa'le'baki sallang lalang ri KalenNa Almasi.

GALATIA 4:4

Mingka ri wattunna narapi' baji'mo wattunna, Nasuromi Ana'Na Allata'ala antama' ri anne linoa. Nilassukammi anjo ana'Na ri se'reang baine, nattallasa'mo irawangang kakoasanna hukkung agamaya.

1 KORINTUS 15:47

Adam rioloa butta nipa'jari, mingka Adam makaruaya battu ri suruga assala'na.

1 KORINTUS 2:7

Anjo pangngassengang kupabattua iamintu pangngassengang battu ri Allata'ala. Anjo pangngassenganga tanaassengai anne linoa, mingka iami anjo le'baka Napasadia Allata'ala ri wattu tenanapa nipa'jari anne linoa, untu' katallassang mate'neta ngaseng.

ROMA 10:18

Mingka erokka' akkuta'nang: Maka tena memang tompa nalangngereki ke'nanga anjo birittaya? Mattantu le'ba'mi! Nasaba' nia' tattulisi' lalang ri Kittaka angkanaya, “Alla'bammi sa'ranna ke'nanga ri sikontu linoa, anrapi'mi kana-kananna ke'nanga mange ri cappa'na linoa!”

LAMPA-LAMPANA 20:28

Paralluko anjagai kalennu. Kammayatompa paralluko anjagai sikontu jamaah le'baka Napassareang RohNa Allata'ala mae ri kau untu' lanujagai; nasaba' le'ba' mako niangka' a'jari tummarakai ri anjo jama'aka. Parallui nujagai anjo jama'aNa Allata'ala, sanrapang pakalawaki anjagai gimbala'na; nasaba' le'ba'mi Napa'jari Allata'ala anjo jama'aka a'jari pisakaNa lanri kamateanNa Ana' KalenNa.

GALATIA 2:8

Nasaba' Allata'ala assarei pakkulle Petrus a'jari tunisuroNa mange ri bansa Yahudia. Iatommi assarea' pakkulle a'jari tunisuro mange ri bansa-bansa maraenga.

ROMA 9:5

Iami ke'nanga sossoranna boe-boeta. Battu ri bansanami ke'nanga assala' kabattuanNa Almasi, ri wattu battuNa a'jari ma'rupatau ri lino. Iami kaminang mala'biri' ri sikontuna taua. Nipujimi Allata'ala satunggu-tungguna! Aming.

LAMPA-LAMPANA 10:34

Nakanamo Petrus, “Kamma-kamma anne ma'nassa nupahang tojemmi angkanaya Napasangkamma ngasengi Allata'ala sikamma rupataua.

ROMA 8:3

Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le'ba' Nagaukang Allata'ala. Le'ba'mi Nabeta Allata'ala koasana dosaya lalang ri sipa'na rupataua; iamintu lalang Nasurona battu Ana' KalenNa, le'bakamo battu sanrapang rupatau dorakaya, sollanna Natangkasi dosa-dosata.

LAMPA-LAMPANA 14:27

Ri wattunna battumo ke'nanga mange ri Antiokhia, napa'rappungammi ke'nanga sikamma anggota jama'aka anjoreng. Nampa nacaritakang ngaseng anjo anggota jama'aka sikamma apa le'baka Nagaukang Allata'ala lalang ri kalenna ke'nanga ilalang ri pa'lampanna ke'nanga. Nacarita tommi ke'nanga antekamma batena Nasungkeang todong Allata'ala bansa-bansa maraenga agang, sa'genna akkulle todong ke'nanga a'jari tappa' mae ri Isa.

YOHANES 16:28

Memang iNakke assalakKu iamintu battu ri Manggea, siagang nia'Ma' battu antama' ri linoa. Mingka kamma-kamma anne laKubokoimi anne linoa, naKuammotere' mae ri Manggea.”

YOHANES 13:3

Naassemmi Isa angkanaya le'ba'mi Napassareang ngaseng ManggeNa sikontu koasaya mae ri KalenNa. Na Naasseng todong angkanaya Ia battui ri Allata'ala, nalammotere' poleang mae ri Allata'ala.

LUKAS 24:51

Lalang Nabarakkakina ke'nanga, ta'angka'mi Isa nai' ri suruga, nampa tassa'la' battu ri ke'nanga.

PAPPICINI' 17:7

Nampa nakana anjo malaekaka ri nakke, “Apa saba'na nanulannasa' kamma? Baji'mi nakupauangko rahasiana anjo bainea siagang rahasiana anjo olo'-olo' nadongkokia, iamintu olo'-olo' tujua ulunna siagang sampuloa tanru'na.

PAPPICINI' 17:5

Ri tompo' kanynyinna nia' tattulisi' areng, niaka rahasiana battuanna. Anjo arenga iamintu “Babel Lompoa, anronna sikontu pasundalaka siagang tau kodi sipaka ri lino.”

IBRANI 8:1

Poko'na anne sikamma nibicaraya iamintu: Nia' Imang Malompota sangkammaya anjo; niaka ammempo ammarenta siagang Allata'ala Kaminang Lompoa ri suruga.

2 TESALONIKA 2:7

Anjo kagassingang anggaukangai anjo kaja'dallanga appakkaramulami anjama cokko-cokko, mingka nitahang-tahangiji. Punna nipalesammo sallang anjo antahangai,

2 TESALONIKA 1:10

iamintu punna battu sallang Batara untu' lanipakalompo ri umma'Na siagang untu' lanikangalikang ri sikontu tau tappaka. Ikau pole, lania' ngaseng tongko ri alla'na anjo umma'Na Allata'ala, lanri tappa' ngaseng mako mae ri anjo biritta napabattua ikambe mae ri kau ngaseng.

LAMPA-LAMPANA 1:19

Naasseng ngasemmi sikontu tau niaka ammantang ri Yerusalem anjo passalaka. Iaminjo saba'na nanaaremmo ke'nanga Akeldama anjo tampaka, situru' bicaranna ke'nanga, battuanna ‘Butta Cera'’.)

YOHANES 17:5

Bapa'! Kipakala'biri'Ma' kamma-kamma anne ilalang KalenTa, situru' kala'birang le'baka nipa'jului riolo, ri wattu tenanapa nanipa'jari anne linoa.

YOHANES 15:26

LaKusuroi battu mae ri kau Pannulung battua ri Manggea. Iamintu Roh, lampa'nyatai katojenganNa Allata'ala. Punna battui, Iami la'jari sa'bi mae ri KalengKu.

YOHANES 6:62

Antekamma sallang kajarianna punna nucini' Ana' Ma'rupataua nai' ammotere' ri tampa' Nakabattuia?

LUKAS 2:32

Sanrapang singara', ansingaria oloanna bansa-bansa maraenga, untu' labattu mae ri Katte; singara' angngeranga kala'birang mae ri ummatTa Israel.”

MARKUS 16:5

Antama'mi ke'nanga ri anjo jeraka. Nia'mo nacini' ke'nanga sitau tu rungka ammempo lalang ri sa'ri kananna jeraka, ammake juba sannaka kebo'na. Na ta'bangkamo ke'nanga anciniki.

MARKUS 1:13

Patampulo alloi ammantang anjoreng, niso'ri ri Billisika. Jai olo'-olo' liaraka Naagang sipammantangang; na battumo malaekaka allayani.

MATIUS 28:2

Ti'ring ta'ge'goso' sanna'mi buttaya. Nampa nia'mo malaeka'Na Batara manaung battu ri suruga mange anggulungi assulu' anjo batu antongkokiai jera'Na Isa, nampa nai' ammempo ri tompo'na anjo batua.

MATIUS 13:11

Appialimi Isa Nakana, “Nasaba' ikau nisare ngaseng mako pangngassengang sollanna nupahang rahasiana ri passala' antekamma batena ammarenta Allata'ala. Mingka anjo ke'nanga tanisareai.

MATIUS 4:11

Kala'busanna, a'lampami Billisika ambokoi Isa. Nampa battumi malaeka'-malaekaka allayani Isa.

MIKHA 5:2

Jari, laNalappassangi Batara nikoasai umma'Na ri musu-musunna ke'nanga, sa'genna baine le'baka nipattantu untu' a'jari anrong ri anjo tumakoasaya, nalassukammi anjo Anaka. Le'baki anjo, sikamma julu bansana niaka ri pammelakkanga lanipakase'rei ammotere' siagang bansana ke'nanga.

1 PETRUS 3:18

Nasaba' le'ba'mi sikali mate Almasi untu' satunggu-tungguna passabakkang dosana rupataua; Ia tena salanna mingka matemi untu' tau salaya. Nagaukammi Almasi kammaya anjo sollannu akkulle Narurungang ngaseng mae ri Allata'ala. Nibunomi tubuNa, mingka nipattallasa' poleammi ammotere' katallassang rohaniNa.

YESAYA 7:14

Kamma-kamma anne, KalenNa Batara lassare tanra mae ri kau: Nia' sallang sitau tulolo latianang siagang allassukang sitau ana' bura'ne, lanaarenga Imanuel.

ROMA 10:12

Anne nataba ngasengi sikontu rupataua; nasaba' tena simmaraenna tu Yahudia siagang bansa-bansa maraenga. Anjo Allata'ala se'rea, Bataranai sikontu rupataua. Napassareangi barakka'Na alla'bia jaina mae ri sikamma tau appala' tulunga mae ri Ia.

ROMA 3:4

Mattantu tena! Nasaba' ma'nassami angkanaya tuli annabai Allata'ala, manna pole a'jari paballe-balle ngasemmi rupataua. Sangkamma niaka lalang ri Kittaka tattulisi' angkanaya, “Poro a'butti laloi katojengannu ilalang ri kana nupabattua, nummeta punna narapi' wattunnu niadeli.”

ROMA 16:26

Mingka kamma-kamma anne, situru' passuroNa Allata'ala mannannunganga, le'ba'mi nipa'nyata siagang nipabattu anjo rancanaya mae ri sikontu bansa-bansaya, iamintu le'baka natulisi' na'bi-na'bia, sollanna tappa' ngaseng siagang mannuruki ngaseng ke'nanga mae ri Allata'ala.

2 KORINTUS 1:19

Nasaba' anjo Isa Almasi, Ana'Na Allata'ala, nabirittakanga sari'battanta Silas, Timotius, kammayatompa kalengku, teai passala' “Iyo” yareka “Tena”. Passangalinna passala' pappiali Iyo battu ri Allata'ala.

1 PETRUS 1:21

Tete ri Iami nanutappa' mae ri Allata'ala, le'baka ampattallasa' poleangi battu ri kamateanga siagang le'baka ampakala'biriki. Jari, Allata'alami nupatappa', siagang ri Allata'ala tommi le'ba' nupadongko' panrannuannu.

1 YOHANES 3:8

Mingka inai-nai tuli a'gau' dosa, iami ana'na Billisika, nasaba' anjo Billisika doraka memammi battu ri pakkaramulanna. Untu' iaminne Nabattu Ana'Na Allata'ala, iamintu untu' angngancuruki jama-jamanna Billisika.

LUKAS 20:44

Jari punna Daud angkana ‘Batara’, ri anjo Karaeng Mappasalamaka, antekamma nakkulle nikana sossoranna Daud?”