1 TIMOTIUS 2:7 - KITTA' MATANGKASA'

⁷ Na iaminjo saba'na kunisuromo a'lampa mange ri bansa-bansa maraenga untu' ambirittakangi mae ri ke'nanga biritta ri sesena katappakkang annabaya. Anne kupabattua ma'nassa biritta kontutojeng; tena nakua'balle-balle.

1 TIMOTIUS 2:7 Referans Kwoze

LAMPA-LAMPANA 9:15

Mingka Nakanamo Batara ri Ananias, “A'lampamako! Nasaba' le'ba'mi Kupile anjo taua a'jari palayangKu; sollanna akkulle napabattu arengKu mae ri bansa-bansa maraenga, tenaya nantama' agama Yahudi, siagang ri sikamma karaenga, kammayatompa ri umma' Israel.

2 TIMOTIUS 1:11

Untu' iaminjo Kabara' Bajika lanibirittakang naNaangkaka' Allata'ala a'jari tunisuro siagang guru.

ROMA 9:1

Kontutojengi anne apa eroka kupau lanri inakke taunNa' Isa Almasi. Tena nakua'balle-balle. Atingku siagang pa'maikku, nirurunganga ri RohNa Allata'ala, ampakatappa' tonga' ma'nassana kontutojengi anne kanangku.

ROMA 15:16

Napa'jarima' palayanNa Isa Almasi, sollangku nisuro mae ri bansa pantaranganna bansa Yahudia, iamintu bansa-bansa maraenga. Nipa'jarima' imang sollanna kubirittakang Kabara' Baji' battua ri Allata'ala mae ri ke'nanga, sollanna akkulle ke'nanga nitarima a'jari koro'bang mae ri Allata'ala. Kuminasai ke'nanga nanitangkasi ri RohNa Allata'ala, sollanna akkulle a'jari koro'bang matangkasa' mae ri Allata'ala.

GALATIA 2:9

Anjo Yakobus, Petrus, siagang Yohanes a'jari pamimpinga mae ri jama'ah-jama'aka; namangakui ke'nanga angkana ma'nassa Allata'ala assarea' anne jama-jamang matangkasaka. Jari assijamakkimi ke'nanga siagang Barnabas, na inakkemi a'jari pammateina anjo passari'battanganga. Nampa assamaturu' ngasemmo ke'nanga siagang ikambe angkanaya ikambemi lanjama ri tangnga-tangngana bansa-bansa maraenga, na ke'nanga lanjama ri tangnga-tangngana bansa Yahudia.

GALATIA 1:20

Anne kutulisika apa kontutojeng. Naassengi Allata'ala angkanaya tena ku'balle-balle!

GALATIA 1:16

Napappiassengammi Ana'Na Allata'ala mae ri nakke; sollanna akkulle kubirittakang anjo Kabara' Baji' ri sesena Ana'Na, mae ri bansa-bansa maraenga. Anjo wattua tena ku'lampa appala' pappitangara' manna ri nai.

ROMA 11:13

Mingka kamma-kamma anne bajiki punna a'bicara' mae ri sikamma sari'battang bansa maraenga. Anne siapaya sallona, a'jariku tunisuro mae ri bansa-bansa maraenga, teai sipato' kupakalompona anjo jama-jamangku.

2 PETRUS 2:5

Kammayatompa lino jammang rioloa, tena todong nalata'lappasa' battu ri hukkunganNa Allata'ala. Appabattui a'ba lompo Allata'ala antama' ri linona tau ja'dalaka anjo wattua. Nuh bawang siagang tuju tau maraengannaya nipasalama', lanri napa'la'banna Nuh biritta katallassang nipangngellaia ri atinNa Allata'ala.

GALATIA 3:9

Tappa'mi Abraham, jari nibarakkakimi. Kammatommi anjo sikontu rupataua. Punna tappaki, lanibarakkaki siagang Abraham.

2 KORINTUS 11:31

Nasaba' tena nakua'balle-balle; Allata'ala, ManggeNa Batarata Isa a'jari sa'bi mae ri nakke! Nipujimi arenNa satunggu-tungguna.

ROMA 10:14

Mingka antekamma lakkulle taua akkio' mae ri Batara punna tenapa natappa' ke'nanga? Siagang antekamma lakkulle tappa' ke'nanga mae ri Batara punna tenapa nalangngereki biritta battua ri Batara? Kammayatompa, antekamma lakkulle nalangngere' ke'nanga biritta battua ri Batara punna tena tau ampabattui anjo birittaya?

LAMPA-LAMPANA 26:20

Kupaumi silambusu'na mae ri taua angkanaya musti toba' ngasengi ke'nanga battu ri massing dosa-dosana. Musti napassareangi tallasa'na ke'nanga mae ri Allata'ala. Siagang musti napa'butti lalang ri katallassanna ke'nanga, angkanaya ma'nassa toba' tojeng-tojemmi battu ri dosa-dosana ke'nanga. Uru-uruna anjorengi ri Damsyik kupau anne passalaka. Le'baki anjo nampa ri Yerusalem, siagang ri sikontu Yudea, ri tangnga-tangngana bansa maraenga.

LAMPA-LAMPANA 22:21

Mingka Nakanamo pole Batara mae ri nakke, ‘A'lampamako, nasaba' laKusuroko a'lampa mange ri tampa'-tampa' bellaya, mange ri bansa-bansa maraenga.’ ”

LAMPA-LAMPANA 14:27

Ri wattunna battumo ke'nanga mange ri Antiokhia, napa'rappungammi ke'nanga sikamma anggota jama'aka anjoreng. Nampa nacaritakang ngaseng anjo anggota jama'aka sikamma apa le'baka Nagaukang Allata'ala lalang ri kalenna ke'nanga ilalang ri pa'lampanna ke'nanga. Nacarita tommi ke'nanga antekamma batena Nasungkeang todong Allata'ala bansa-bansa maraenga agang, sa'genna akkulle todong ke'nanga a'jari tappa' mae ri Isa.

YOHANES 7:35

Nakana ngasemmo tukoasana tu Yahudia, massing para ia, “La'lampa kemaei anne taua nitakkullea ambuntuluKi? Apa eroKi a'lampa mange ri tu Yahudi pantarang pa'rasanganga, ri pa'rasanganna tu Yunania, naero' Naajara' tu Yunania?

KATO'BA 7:27

Nakana Tau Assarea Pangngajarang: Ciniki, yangasenna anjo kugappai kupahang, ri wattunna kuboya tassike'de'-tassike'de' pappialia.

KATO'BA 1:12

Inakke, Tau Assarea Pangngajarang, ammarenta' a'jari karaeng ri Yerusalem mae ri tu Israel.

PAMMUJI 111:7

Adeleki siagang tamamminrayai Batara lalang sikontu tindakanNa, sikontu parentaNa akkullei nipattoang.

GALATIA 2:16

Mingka niassengi angkanaya lanri tappa'na taua mae ri Isa Almasi nakkulle assibajiki ammotere' siagang Allata'ala; teai lanri nagaukanna hukkung-hukkung agamaya. Ikambe pole, tappa' tommaki' mae ri Isa Almasi; sollanta akkulle assibajiki ammotere' siagang Allata'ala tete ri anjo matappatta. Jari teai lanri kigaukanna hukkung-hukkung agamaya. Nasaba' tena manna sitau lakkulle assibajiki ammotere' siagang Allata'ala lanri nagaukanna hukkung-hukkung agamaya.

ROMA 1:9

Punna appala' doanga' tuli kuu'ranginnu ngaseng. Allata'alami a'jari sa'bingku ma'nassana kammatojeng anne kukanaya. Iami Allata'ala kusombaya siagang sikontu pa'maikku, iamintu kupa'la'bangi Kabara' Bajika ri passala'na Ana'Na.

1 KORINTUS 9:1

Sai inakke tau bebasakka'? Sai inakke tunisuroNa' Allata'ala? Maka tenapa nakuciniki Isa, Batarata? Maka teaiko wassele' jama-jamangku untu' Batara?