1 SAMUEL 2:22 - KITTA' MATANGKASA'

²² Eli sanna' dudumi toana. Tena ammarina allangngere' tau a'jamma' battu ri panggaukanna ana'-ana'na mae ri tu Israel. Naasseng tongi Eli angkanaya anjo ana'-ana'na sikatinroangi siagang sikamma bai'-baine tugasaka ri dallekanna pakke'bu' Kema KahaderanNa Batara.

1 SAMUEL 2:22 Referans Kwoze

KALAPPASSANG 38:8

Appareki Bezaleel ba' tambaga; pa'lapa'na irawa tambaga nipare'. Anjo tambagaya battu ri carammenna ngaseng sikamma bai'-baine allayania ri pakke'bu' KemaNa Batara.

YEHEZKIEL 22:26

Sikamma imanna tu Israel nadakkai hukkung-hukkungKu siagang nara'massi apa-apa le'baka nisa'la' untu' iNakke. Tena napasimmaraengi ke'nanga angkanaya kereanga hallala' siagang kereanga harang. Tena todong naajaraki ke'nanga ra'yaka untu' ampasimmaraengi angkanaya kereanga tangkasa' siagang ra'masa' manuru' paratorang agamaya. Tena najampangi ke'nanga allo Pammari-marianga. Lanri kammanami anjo nanahinaMa' bansa Israel.

1 SAMUEL 8:1

Ri wattunna toamo Samuel, naangka'mi ana'-ana'na a'jari haking ri Israel.

PA'JARIANG 37:2

Na iaminne riwaya' kaluargana Yakub: Ri wattunna sampulo antuju taung umuru'na Yusuf, iamintu ana'na Yakub, sitabanna naparakai bembena siagang gimbala'na siagang ngaseng sari'battanna, iamintu ana'-ana'na Bilha siagang Zilpa, ruaya baine piarana manggena. Napabattui sikamma gau' ja'dala'na daenna mae ri manggena.

1 SAMUEL 2:23

Lanri kammana anjo nakanamo ri ana'-ana'na, “Kutarimami laporanga battu ri sikontu ummaka ri passala'na panggaukang ja'dala'nu ngaseng. Angngapa nanupanggaukang kamma anjo?

1 SAMUEL 3:13

Le'ba'mi Kupau mae ri ia angkanaya laKuhukkungi kaluargana sa'genna satunggu-tungguna, lanri le'ba'Ma nahina ana'-ana'na. Naassengi Eli dosa-dosana ke'nanga, mingka tena nakalarroi ke'nanga.

PA'JARIANG 35:22

Lalang nia'na ke'nanga ri anjo tampaka, assikatinroammi Bilha siagang Ruben, anjo baine piarana manggena. Anne passalaka nalangngereki Yakub, siagang sanna'mi larrona napakamma. Nia' sampulo anrua ana' bura'nena Yakub.