1 PETRUS 4:3 - KITTA' MATANGKASA'

³ Ri wattu allaloa, le'ba'mi sallo nugaukang apa nangaia nagaukang tau tenaya natappa' mae ri Batara. Tena nabaji' batenu appanggaukang ri katallassannu. Nuturukiangi hawa napasunu, angnginung-nginungko sa'gennu nasa'ring, assua'-suarakko, angnginung-nginungko siagang appakaringi'-ringikko anynyomba mae ri barhalaya.

1 PETRUS 4:3 Referans Kwoze

1 KORINTUS 6:11

Nia' siapa are jainu appanggaukang kamma anjo riolo. Mingka kamma-kamma anne le'ba' mako nitangkasi battu ri dosa-dosaya, sollannu a'jari umma' matangkasa'Na Allata'ala. Le'ba' mako assibajiki ammotere' siagang Allata'ala lanri tappa'nu mae ri Batara Isa Almasi siagang lanri koasa Roh battu ri Allata'alata.

EFESUS 5:18

Teako nabengoi anggoro', nasaba' anjo anggoroka akkulleko napanraki. Passangalinna paralluko nikoasai ri RohNa Allata'ala.

1 TESALONIKA 4:5

Teako turuki hawa napasunu mae ri bainennu sangkamma nagaukanga tau kapere' tenaya naassengi Allata'ala.

1 PETRUS 1:14

Mappilangngeriko mae ri Allata'ala, siagang teako turukiangi ero'nu rioloa, ri wattunna tenapa nuassengi Allata'ala.

GALATIA 5:21

kammayatompa assereatia, painunga sa'genna nasa'ring, assua'-suara' appala'busuka apa-apa, na maraengannaya. Yangasennami anjo kupakaingakkangko kamma-kamma anne; sangkamma todong kupakainga'nu pirangalloang, angkanaya anjo tau a'gau' kammaya takkulleai a'jari anggota Umma'Na Allata'ala.

GALATIA 5:19

Anjo ero'na sipa'-sipa' rupataua a'nyatai lalang ri panggaukang-panggaukang salimaraka, panggaukang ra'masaka, siagang panggaukang tenaya nasiratang;

YEHEZKIEL 45:9

Nakana Batara Kaminang Tinggia, “He sikamma patugasa' pamarentana Israel, angganna'mi dosa-dosanu! Pamarimi anjo tindakannu appaero'-eroka siagang anjallakkangai ra'yaka. Gaukammi apa annabaya siagang adeleka. Tea sikaliko bongkai pole ummakKu battu ri tampa'na ke'nanga. INakke, Batara Kaminang Tinggia, amparentakangi anjo mae ri kau.

YUDAS 1:4

Nasaba' tanisa'ringai na nia'mo siapa are tu kodi ateka' antama' ri tangnga-tangngata. Anjo ke'nanga sangnging tau panra'; naputara' baleki biritta pangngamaseanNa Allata'alata, sollanna akkulle anggappa kasampatang ke'nanga untu' anggaukangi ero' hawa napasuna. Taerokai ke'nanga antarimai Isa Almasi, Batara Makoasa tena ruanna. Battu riolo dudu iji nanipau la'bi riolo memammo lalang ri Kittaka hukkungang lanagappaya ke'nanga.

LAMPA-LAMPANA 17:30

Anjo wattu kadongokanta Nakaluppaimi Allata'ala, mingka kamma-kamma anne Nasuromi toba' battu ri dosa-dosana sikontu rupataua ri lino.

YEHEZKIEL 44:6

Paui mae ri anjo umma' Israel nangaia angngewa, angkanaya iNakke, Batara Kaminang Tinggia, taerokaMa' allappassangi ke'nanga anggaukangi ra'masaka.

YESAYA 28:7

Kammayatompa sikamma na'bia siagang imang-imanga nasa'ring tongi, lanri jai duduna anggoro' siagang inungang terasa' nainung ke'nanga. Ta'royong-royongi jappana ke'nanga siagang tatto'ro-to'roi lanri tenana nasilolongang pikkiranna. Na'bi-na'bia takkulleai napahang sikamma pangngunju' Nipappicinikanga mae ri ke'nanga battu ri Allata'ala. Sikamma imanga tena tommo nakkulle natappuki sikamma parkara nieranga mae ri dallekanna ke'nanga.

TITUS 3:3

Nasaba' ikatte riolo dongo' tonjaki', lingu tonjaki' siagang tena tonja nimappilangngeri. Nipare' ataki' ri a'rupa-rupaya hawa napasuta siagang kacinnanta; a'rupa-rupai ero' ja'dalatta, assereatiki', siagang sikabiri'-birisiki'.

2 KORINTUS 12:21

Kukamallakkangi gassingka Napakatuna' Allata'alaku sallang ri dallekannu punna battua' angkunjungiko. Ranggasela tonga' gassingka jaiko sallang lampakarruka', lanri tenana nuero' ampinrai gau' dosanu allaloa, anggaukangi gau' bawanga, gau' ra'masaka, kammayatompa gau' tenaya nasiratang.

1 KORINTUS 12:2

U'rangi angkanaya ri wattunna tenapa nutappa' mae ri Batara, amminawangko anynyomba mae ri barhala pepea.

ROMA 13:13

Musti nigaukangi apa-apa mala'birika, sangkamma biasaya nagaukang taua ri wattu singaraka; teako alla'bi dudu batenu assua'-suara', yareka teako ta'liwakki batenu angnginung sa'gennu nasa'ring. Teako assalimaraki, yareka teako appanggaukang kammai tu tena nungngasseng atorang. Teako assiba'ji, yareka teako assereati.

MARKUS 7:22

a'gau' salimara', annipu, appitina, siagang anggaukangi sikamma apa-apa ja'dalaka, ampa'jari taua angngoa, tenangngasseng atorang, assereati, tampo, kammayatompa susai niajara'.

YEREMIA 16:18

LaKubalasaki dosana siagang kaja'dallanna ke'nanga siagang hukkungang a'lappi rua, lanri narantassimi pa'rasangangKu siagang jai barhala. Anjo barhala-barhalaya tena na'nyawa, sangkammai maya'.”

YESAYA 65:4

Punna bangngi a'lampai ke'nanga mange ri kali'bong-kali'bong batua siagang sikamma kuburuka untu' appala' tangara' mae roh-rohna alusuka. Angnganrei ke'nanga dageng bawi siagang angnginungi je'ne' dageng haranga.

YESAYA 5:11

Cilaka mako kau! Battu ri bari'basa' sa'genna bangngi iaji bawang nugaukang angnginunga inungang terasa' siagang nasa'ringa.

2 PATTOTTORANG 15:8

Nalangngere'na Asa kananna anjo Azarya ana'na Oded, a'rinrami sumanga'na. Napakabella kabusu'mi sikontu barhala niaka ri pa'rasangang Yehuda siagang Benyamin, kammayatompa ri kota-kota le'baka nabeta ri daera monconna Efraim, nampa napakabaji' tampa' pakkoro'bangngang niaka ri parang lakkenna Balla'Na Batara.

1 KARAENG-KARAENG 21:26

Ahab nagaukangi dosa-dosa sannaka hinana: anynyombai barhala sangkamma nagaukanga tu Amori, iamintu tau le'baka nibongka ri Batara assulu' battu ri pa'rasangang Kanaan ri wattunna napantamakki Israel anjo pa'rasanganga.

2 SAMUEL 13:28

Naparentakammi mae ri sikamma ata-atanna angkana, “Parhatikangi baji'-baji', punna nasa'rimmo Amnon angnginung anggoro', lakusareko pammatei nampa nubuno. Teako mallakki. Inakke antanggongi anne passalaka. Pa'baraniangi kalennu anggaukangi siagang teako bata-batai.”

YEREMIA 16:11

Pauangi ke'nanga angkanaya kammai anne kanangKu, ‘Le'ba'Ma' nabokoi boe-boenu untu' a'lampa mange anynyomba siagang assambayang ri rewata-rewata maraenga. Nabalang parekangA' siagang taerokai ke'nanga mannuruki ri paratorang-paratorangKu.