1 PATTOTTORANG 21:16 - KITTA' MATANGKASA'

¹⁶ Naciniki Daud anjo malaekaka allayang ri alla'na langika siagang buttaya. Nia' pa'dang lalang limanna, nasadia anjo malaekaka angngancuruki Yerusalem. Na anjo wattua, Daud siagang sikamma pamimping-pamimping ra'yaka, ammakemi care-care karung a'jari pammatei angkanaya assesse'lalammi ke'nanga, nasu'ju' ke'nanga naung ri buttaya.

1 PATTOTTORANG 21:16 Referans Kwoze

PAMMILANGNGANG 14:5

Nampa su'ju'mo Musa siagang Harun ri dallekanna sikontu ra'yaka.

1 KARAENG-KARAENG 21:27

Le'baki Elia a'bicara, nakekke'mi pakeanna Ahab siagang ammakemi kaeng karung salaku pammatei ri sesse' lalanna, nampa appuasa. Manna ri wattunna tinro ammake tonji pakeang karung, siagang punna a'jappai tuli susana tanja'na.

2 KARAENG-KARAENG 19:1

Ri wattu nalangngere'na Karaeng Hizkia laporanna anjo tau tallua, nakekke'mi pakeanna siagang ammakemi kaeng karung tanra si'nana pa'mai'na, nampa a'lampa mange ri Balla'Na Batara.

2 KARAENG-KARAENG 6:17

Nampa appala' doang Elisa angkana, “O Batara, dasi-dasi natassungke matanna palayangku sollanna akkulle accini'!” Niturukiammi pappala'na Elisa, sa'genna ri wattunna assaile palayanna, nacini'mi anjo monconga rassi siagang jarang na kareta a'rinra angkulilingi Elisa.

PAMMILANGNGANG 22:31

Nampa Napa'jarimo Batara akkulle Bileam anciniki anjo malaeka'Na Batara niaka ammenteng anjoreng anna'gala' pa'dang ta'bi'bu'. Su'ju'mi linta' Bileam naung ri buttaya nampa anynyomba.

PAMMILANGNGANG 16:22

Mingka su'ju'mi Musa siagang Harun anynyomba siagang nakana, “O Allata'ala, iKattemi katallassang mae ri sikontu apa attallasaka. Punna sitauja bawang doraka, apaka larroKi' mae ri sikontu ummaka?”

PA'JARIANG 3:24

Nampa irayanganna anjo kokoa, ri dallekanna pakke'bu antamaya, nia'mo sipa'rappungang malaeka' pajaga, siagang nia'mo se're pa'dang a'rinraya pepe'na, amminroa ri kere-keremae, anjagai agang mangea ri anjo poko' assarea katallassang. Jari tenamo manna sitau akkulle antama' siagang a'reppese' anjoreng ri anjo pokoka.

HAKING-HAKING 13:20

Lalang a'rinrana nai' anjo pepeka battu ri tampa' pakkoro'bangnganga, nacini'mi Manoah siagang bainenna anjo malaekaka lalang pepe' nai' ri langika. Nampami naasseng Manoah angkana malaeka'Na Batara anjo battua; Jari su'ju'mi siagang bainenna anynyomba. Ribokoanganna tale'bakami nacini' pole ke'nanga anjo malaekaka.

YEHEZKIEL 9:8

Lalang nigaukanna anjo pammunoanga, kale-kalengku nia' anjoreng. Su'juka' siagang akkio'ma' angkana, “O Batara Kaminang Tinggia, maka sanna' dudu kammami anjo larroTa mae ri Yerusalem, sa'genna ero' Kibuno kabusu' tau niaka ija ri anne Israel?”

YEHEZKIEL 30:25

Tojeng, karaeng Mesir laKupa'jari lammai, nampa karaeng Babel laKupa'jari kassaki. Punna Kupassareang pa'dangKu ri ia, nampa napatuju limanna mange ri Mesir, lanaassemmi ke'nanga angkanaya iNakke Batara.

PAMMILANGNGANG 22:23

Nacini'na nia' malaeka' ammenteng anjoreng anna'gala' pa'dang ta'bi'bu', ammengkami anjo keledaia, a'bilu' antama ri kokoa. Natunrummi Bileam anjo keledaia nampa naerang ammotere' mange ri aganga.