1 PATTOTTORANG 11:10 - KITTA' MATANGKASA'

¹⁰ Iaminne areng-arenna sikamma perwira-perwira tantarana Daud, ia masahoroka. A'rurung siagang sikontu ra'ya' Israel a'bundu'mi ke'nanga sollanna a'jari Karaeng Daud sangkamma apa le'baka Napa'janjiang Batara. Na tuli napakajarre'na ke'nanga pamarentahanna Daud.

1 PATTOTTORANG 11:10 Referans Kwoze

1 PATTOTTORANG 11:3

Jari appare'mi parjanjiang Daud siagang anjo pamimping-pamimpinna Israel. Nampa nalanti'mo ke'nanga Daud a'jari karaenna Israel sangkamma le'baka Napa'janjiang Batara tete ri Samuel.

1 PATTOTTORANG 12:38

Sikontu anjo pejuanga a'lampai mange ri Hebron, sadia untu' a'bundu' siagang eroka angngangkaki Daud a'jari karaeng untu' sikontu bansa Israel. Na sikontu tu Israel maraengannaya a'julu ati ngaseng tommi untu' anggaukangi anjo passalaka.

2 SAMUEL 3:21

Le'baki anjo appala'kanami Abner siagang angkana, “Kilappassamma' a'lampa untu' ampagioki sikontu tu Israel sollanna asse're ke'nanga siagang karaengku. Lanatarimaki' ke'nanga a'jari karaeng, na lanri kammana na karaengku lammarenta mae ri sikontu pa'rasanganga, situru' ero'na karaengku.” Nampa nilappassammo Abner a'lampa ri Daud siagang nitanggongi kasalamakkanna.

1 SAMUEL 16:1

Siapa are wattu ribokoanganna, Nakanamo Batara mae ri Samuel, “Siapapi sallonu lasi'na pa'mai' passabakkang Saul? Sai ia tenamo naniakui salaku karaeng Israel? Kamma-kamma anne angngalleko minynya' zaitun, siagang a'lampako mange ri Betlehem, mange ri se'reang tau niarenga Isai, nasaba' kalase'renna ana'na Kupilei a'jari karaeng.”

1 PATTOTTORANG 12:23

Ri wattunna nia' Daud ri Hebron, jai pejuang le'baka nilati a'gabung siagang Daud. Nabantumi ke'nanga Daud sollanna akkulle a'jari karaeng assambeangi Saul, situru' janjinNa Batara. Ia jaina ke'nanga, iamintu: Battu ri suku Yehuda: 6.800 tau, langka' siagang poke na pa'lapa' barambang. Battu ri suku Simeon: 7.100 tau le'baka nilati. Battu ri suku Lewi: 4.600 tau. Ana' buana Yoyada pamimping battua ri turunganna Harun: 3.700 tau. Bija pammanakanna Zadok, iamintu sitau pejuang rungka barania: 22 tau, yangasenna kapala kaluarga. Battu ri suku Benyamin (sukuna Karaeng Saul): 3.000 tau; jaiangangi suku Benyamin tamaminrayai mae ri Saul. Battu ri suku Efraim: 20.800 tau masahoroka lalang ri massing-massing bijanna. Battu ri suku Manasye niaka ri laukanna Binanga Yordan: 18.000 tau, ia nijo'joka untu' allantiki Daud a'jari karaeng. Battu ri suku Isakhar: 200 pamimping siagang ana' buana ke'nanga; anne pamimping-pamimpinga cara'deki ampattantui apa mustia nagaukang bansa Israel ri wattu bajika. Battu ri suku Zebulon: 50.000 tau, ia cara'deka ampakei sangka' rupaya sanjata, siagang tuli sadiaya untu' a'bundu'; iami ke'nanga kaminang tamamminraya siagang kaminang nipatappaka. Battu ri suku Naftali: 1.000 pamimping siagang 37.000 tantara kompeleka siagang poke na pa'lapa' barambang. Battu ri suku Dan: 28.600 tau le'baka nilati. Battu ri suku Asyer: 40.000 tau, ia sadiaya untu' a'bundu'. Battu ri suku-suku niaka ri bageang rayanganna Binanga Yordan, iamintu Ruben, Gad, siagang sipa'gang suku Manasye: 120.000 tau, ia cara'deka ammake sangka' rupa sanjata.

1 PATTOTTORANG 28:1

Naparentakangi Daud sollanna a'rappungang ngaseng sikontu pamimping Israel ri Yerusalem. Jari sikamma kapala sukua, pajaba' ri urusang pamarentahanga, kapala-kapala pa'rappungang bijaya, sikamma pajagana barang-baranna siagang olo'-olo'na siagang ana'-ana' bura'nena karaenga – bodona kana sikamma tumalompoa ri balla'na karaenga, komandang tantaraya siagang tunipakalompoa, yangasenna a'rappungangi ri Yerusalem.

1 PATTOTTORANG 12:21

Ke'nangami pejuang barania siagang ambantuai Daud angngewai garombolanga. Allo ribokoanganna iami ke'nanga a'jari perwira-perwira lalang ri tantarana Israel.

1 PATTOTTORANG 12:39

Tallungalloi sallona anjo sikamma pejuanga ammantang siagang Daud anjoreng, siagang assua'-suara'mi ke'nanga angnganre siagang angnginung battu ri kanre siagang inungang napasadiaya tu Israel maraenganga.

1 PATTOTTORANG 27:1

Urusang pamarentahanna kakaraengang Israel niatoroki ri kapala-kapala kaluargaya, pamimping-pamimping pa'rappungang passibijanga, siagang perwira-perwiraya. Massing-massing taung, lalang sibulang sallona, nia' se're pa'rappungang nisare tugasa' a'le'basa' tasse'rei pa'rappungang nipimping ri se'reang kapala. Massing-massing pa'rappungang nia' 24.000 jaina tau. Iaminne areng-arenna kapala pa'rappungang tugasaka untu' massing-massing bulang: Bulang makase're: Yasobam ana'na Zabdiel (ia anggota battu ri pa'rappungang bija Peres suku Yehuda). Bulang makarua: Dodai, turunganna Ahohi. Miklot iami a'jari wakkele'na. Bulang makatallu: Benaya ana'na Imang Yoyada; iami pamimping “Tallumpuloa Komandang” (Amizabad ana'na a'jari wakkele'na). Bulang makaappa': Asael sari'battanna Yoab (sambenna iamintu Zebaja, ana'na). Bulang makalima: Samhut, turunganna Yizrah. Bulang makaannang: Ira ana'na Ikes, battu ri Tekoa. Bulang makatuju: Heles, turunganna Efraim battu ri kota Peloni Bulang makasagantuju: Sibkhai battu ri kota Husa (ia anggota bijanna Zerah, suku Yehuda). Bulang makasalapang: Abiezer battu ri kota Anatot ri daera suku Benyamin. Bulang makasampulo: Maharai, turunganna Zerah battu ri kota Netofa. Bulang makasampulo asse're: Benaya battu ri kota Piraton ri daera suku Efraim. Bulang makasampulo anrua: Heldai turunganna Otniel battu ri kota Netofa.