1 KORINTUS 12:10 - KITTA' MATANGKASA'

¹⁰ Nia' tau nisare koasa untu' anggaukangi gau' appakalannasaka, nampa tau maraenganga nisare pakkulle untu' ampakasingaraki sikamma apa laNagaukanga sallang Allata'ala. Nia' maraenganga nisare pakkulle ri RohNa Allata'ala untu' angngasseng ambatei angkana kereanga passare battu ri RohNa Allata'ala, na kereanga teai. Nia' nisare pakkulle untu' a'bicara a'rupa-rupa bicara sukkaraka nipahang; nampa nia' todong nisare pakkulle untu' ampakasingaraki anjo bicara-bicara sukkaraka.

1 KORINTUS 12:10 Referans Kwoze

1 KORINTUS 14:39

Lanri kammana, sari'battangku ngaseng, usaha mako untu' ambirittakangi biritta battua ri Allata'ala, mingka teako pisangkai tau eroka a'bicara lalang bicara appakalannasaka.

1 YOHANES 4:1

Sikamma sari'battangku sannaka kukarimangnginna! Teako patappa' ngasengi tau nakanaya niaki RohNa Allata'ala ri kalenna; mingka pilajari rolong baji'-baji' sollanna akkulle nuasseng angkanaya roh battu kemae anjo niaka ri ke'nanga: Roh battuka ri Allata'ala yareka teai. Nasaba' kamma-kamma anne jai na'bi balle-balle a'jappa mange-mange.

MARKUS 16:17

Na la'jari buttia angkanaya tappaki ke'nanga, lanabongkami setanga lalang arengKu; la'bicarai ke'nanga lalang a'rupa-rupa bicara tenaya napahangi ke'nanga.

YO"EL 2:28

“Le'baki anjo, sikontu taua laKupilumpai ngasengi siagang RohKu. Na sikamma ana'nu bura'ne baine lanapabattui pasang-pasangKu; tutoa-toa niaka ri alla'nu langgappai pappiso'na turungkaya bura'ne baine langgappai paccini'.

GALATIA 3:5

Allata'ala assareko RohNa, naNapappicinikang gau'-gau' makoasaNa ri tangnga-tangnganu. Maka lanri nugaukanna hukkung-hukkung agamaya, naNagaukang Allata'ala anjo kammaya? Yareka lanri nulangngere'namo anjo Kabara' Bajika siagang lanri tappa'numo mae ri Almasi?

MARKUS 16:20

A'lampami ana'-ana' gurunNa ampa'la'bangi biritta battua ri Allata'ala, mange ri kere-keremae. Na nirurungammo ri Allata'ala lalang jama-jamanna ke'nanga. Siagang napa'buttimi angkanaya ma'nassa tojengi anjo biritta napabattua ke'nanga, lanri gau'-gau' appakalannasaka napappicinikanga ke'nanga. [

PAPPICINI' 2:2

Kuassengi apa nugaukanga ngaseng: anjama terasakko, siagang teai sipato' sa'bara'nu. Kuassengi angkanaya taerokako assarei pa'mai' tau ja'dalaka. Na anjo sikamma tau nakanaya kalenna tunisuroNa Allata'ala, nasikontutojenna teai, le'ba'mi nuparessa baji'; na nuasseng ngasemmo angkanaya anjo ke'nanga sangnging tau paballe-balle.

1 TESALONIKA 5:20

Teako cini' tunai biritta-biritta napabattua RohNa Allata'ala.

1 KORINTUS 13:8

Tenanniakka wattu nataparallua taua sikamaseang. Kamma-kamma anne nia' tau cara'de' ampabattui biritta battua ri Allata'ala, mingka nia' se're wattu nalammarimo ampabattui anjo birittaya. Kamma-kamma anne nia' tau cara'de' a'bicara a'rupa-rupa bicara appakalannasa', mingka nia' se're wattu nalammarimo a'bicara appakalannasa'. Kamma-kamma anne nia' tau cara'de' angngasseng ngasengi sikontu apa-apaya, mingka nia' se're wattu nalammarimo angngasseng ngasengi sikontu apa-apaya.

ROMA 15:19

kammayatompa ilalang gau'-gau' appakalannasaka, siagang sukkaraka antama' ri akkala'na rupataua; yangasenna anjo koasaNa RohNa Allata'ala anggaukangi. Le'ba' ngasemmi kubirittakang sikamma Kabara' Baji' ri passala'na Isa Almasi mae ri taua, appakkaramula battu ri Yerusalem sa'genna ri Ilirikum.

ROMA 12:6

Massing nia' pakkulle untu' allayani Napassareang Allata'ala mae ri katte, tenaya nasangkamma ngaseng. Anjo pakkullea, passare battu ri Allata'ala lanri pangngamaseanNa mae ri katte. Lanri kammana, musti nipakei anjo pakkullea. Tau anggappaya passare untu' ambirittakangi biritta battua ri Allata'ala, musti nabirittakangi situru' pakkullena anjo biritta battua ri Allata'ala.

LAMPA-LAMPANA 19:6

Na ri wattunna napatompang limanna Paulus irateanganna ke'nanga, battumi RohNa Allata'ala angkoasai ke'nanga; sa'genna akkullemo ke'nanga a'bicara lalang a'rupa-rupa bicara appakalannasaka, siagang napabattumi ke'nanga kabara' battua ri Allata'ala.

LAMPA-LAMPANA 11:28

Kalase'renna ke'nanga niarengi Agabus. Lanri pangngajara'Na RohNa Allata'ala, natappu riolomi angkanaya lakajariangi sallang ri sikontu linoa kacipurang lompoa. (Na anjo napakkanaya kajariang tojemmi ri wattunna Karaeng Klaudius ammarenta.)

LAMPA-LAMPANA 5:3

Nakanamo Petrus, “Ananias, angngapa nanupassareang atinnu nakoasai Billisika, sa'gennu a'balle-balle ri RohNa Allata'ala? Iamintu nuboli' cokko-cokkoi untu' kalennu tawaruanna doe' ballinna anjo tanaya?

LAMPA-LAMPANA 1:8

Mingka punna battumo RohNa Allata'ala mange ri kau, langgappa mako koasa. Na la'jari mako sa'bingKu ri Yerusalem, ri sikontu Yudea, ri Samaria, sa'genna ri cappa'na linoa.”

YOHANES 16:13

Mingka punna battumo RohNa Allata'ala, iamintu ampa'nyatai katojenganNa Allata'ala, laniajara' mako angngassengi sikontu katojenganga. Tena nabattu ri KalenNa bawang nala'bicara, mingka apa-apa le'ba' Nalangngere' iaminjo Nabicara. Kammayatompa laNapauang tongko apa lakajarianga sallang ri allo ri boko.

YOHANES 14:12

Annaba tojengi anne kanangKu: Inai-nai tappa' ri Nakke, lanagaukangi apa le'baka Kugaukang, – ba'lalo lanagaukangi apa lompoanganga – nasaba' a'lampA' mae ri Manggea.

LUKAS 24:49

Na KalengKu lassuroi battu mae ri kau ngaseng apa le'baka Napa'janjiang Manggea. Mingka musti attayangko rolong anrinni ri kotaya, sa'genna battu koasaNa Allata'ala anrurungang ngasengko.”

IBRANI 2:4

Kammayatompa, KalenNa Allata'ala ampakajarreki kasa'bianna anjo taua ngaseng, iamintu lalang Nagaukanna a'rupa-rupaya gau' appakalannasaka siagang gau'-gau' sannaka heba'na; siagang lalang Napa'bage-bageanna sikamma passare malammoro' battua ri RohNa Allata'ala situru' kaerokang KalenNa.

LAMPA-LAMPANA 11:27

Anjo wattua nia' siapa are na'bi battu ri Yerusalem mange ri Antiokhia.

1 KORINTUS 11:4

Punna natongko' ulunna tu bura'-bura'nea ri wattunna appala' doang yareka ri wattunna napabattu biritta battua ri Allata'ala ri dallekanna tu jaia, nahinai Almasi.

1 KORINTUS 14:13

Lanri kammanami anjo, na inai-nai akkulle a'bicara appakalannasa', parallui napala' mae ri Allata'ala sollanna nisare todong pakkulle untu' ampakasingaraki anjo apa napaua.