1 KORINTUS 1:10 - KITTA' MATANGKASA'

¹⁰ Sikamma sari'battangku! Kupalaki, lalang arenNa Batarata Isa Almasi, sollannu a'julu kana; sollanna tena nanusisa'la'-sa'la'. Paralluko a'jari se're, a'julu ati siagang a'julu pikkirang.

1 KORINTUS 1:10 Referans Kwoze

1 KORINTUS 12:25

Lanri kammana, tenamo nasanrapang ta'bage-bage anjo tubua; massing sijampangimi anjo anggota tubua.

ROMA 12:16

Massing assiamakko siagang assibajikiko. Teako tinggi langgai, mingka pakatunai kalennu sangkamma tau tunaya. Teako angkanai kalennu cara'de' dudu ri sitojennaya.

2 KORINTUS 13:11

Kala'busang kana, sari'battangku ngaseng, paralluko a'rannu-rannu, siagang usahakangi nu'jari sukku'. Tarima ngasemmi pappakaingakku. Paralluko a'julu ati siagang assiama' lalang tallasa'nu. Allata'ala Kaminang Mangngarimangngia siagang mappasiamaka lanrurungangko.

PAMMUJI 133:1

Kelong siara battu ri Daud. Tamaka baji'na siagang sannanna, punna assiama' tallasa'na umma'Na Allata'ala!

1 KORINTUS 11:18

Nasaba' uru-uru kulangngereka iamintu angkanaya punna a'rappungangko salaku jamaah, assisa'la'-sa'lakko a'jari a'rupa-rupa golongang nampa assigea'-geakko. Na anne kabaraka kukira-kira nia' kamma tojenna.

FILIPI 1:27

Jari, ia parallua kamma-kamma anne, iamintu musti attallasakko situru' apa nakaerokanga anjo Kabara' Bajika ri sesena Almasi. Jari, iaka nisigappa yareka tena, mingka lakulangngereki angkanaya majarrekko asse're, siagang lasiagang ngasengko anjama a'julu ero' siagang a'julu pattujuang; iamintu untu' katappakkang situru' anjo Kabara' Baji' battua ri Allata'ala.

ROMA 16:17

Sikamma sari'battangku ngaseng! Sanna' kupala'na mae ri kau ngaseng: tutuko mae ri tau eroka appasisala-sala siagang tau eroka angkacoi tappa'na taua mae ri Batara. Assisalai anjo kammaya siagang apa le'baka nipangngajarrang mae ri kau. Pakabellai kalennu battu ri tau kammaya anjo.

2 KORINTUS 5:20

Jari ikambemi anne tunisuroNa Almasi. A'bicarami ikambe sangkamma angkanaya KalenNa Allata'ala a'bicara mae ri kau ngaseng lalang ri kalenna ikambe. Lalang arenNa Almasi, nanapala' dudumo ikambe sollanna nujamakkimo limanNa Allata'ala assareako oloang nukkulle assibajiki siagang KalenNa.

1 KORINTUS 4:16

Lanri kammanami anjo nasanna' kupala'na ri kau ngaseng, sollannu angngalle conto mae ri nakke.

LAMPA-LAMPANA 4:32

A'julu atimi siagang a'julu nyawa ngasemmi anjo sikontu tau tappaka. Punna nia' apa-apanna ke'nanga, tena manna sitau langkana anjo apa-apaya ia bawang pata. Sikontu apa niaka ri ke'nanga, napassama-samaimi napake.

YEREMIA 32:39

LaKusarei ke'nanga poro se're bawang oloang mange ri katallassanga: iamintu, napakalompoA' satunggu-tungguna; anjo kammaya langngerangi kabajikang mae ri kalenna ke'nanga, siagang mae ri jari-jarina.

YOHANES 17:23

asse'reA' siagang ke'nanga, na iKatte siagang iNakke, sollanna a'jari se're tojeng-tojeng ke'nanga. Jari lanaassemmi linoa angkana iKatte assuroA', siagang Kikamaseangi ke'nanga, sangkamma KikamaseangKu.

1 TESALONIKA 5:13

Pakala'biriki ke'nanga sibaji'-baji'na. Kamaseangi ke'nanga, lanri nuu'ranginna jama-jamang nagaukanga ke'nanga. Tuli assiamakko massing para ikau lalang ri katallassannu.

ROMA 12:1

Sikamma sari'battangku! Sanna' baji'Na Allata'ala mae ri katte. Iaminjo saba'na nakupala' dudu ri kau ngaseng sollanna nupassareang sikontu batangkalennu a'jari koro'bang attallasa', siagang matangkasaka, kammayatompa nikarannuanga ri atinNa Allata'ala. Mustina kammaminjo caranu anynyomba mae ri Allata'ala.

YOHANES 10:19

Lanri akkana kammana Isa, appakkaramulami a'gea'-gea' tu Yahudia.

1 PETRUS 2:11

Sikamma sari'battangku, sannaka kukarimangnginna! Ikau teaiko tuma'buttana anne linoa; ikau tau battu-battu jako. Lanri kammana, kupala' tojeng-tojengi mae ri kau sollanna tena nanuturuki hawa napasu rupataua, tuli ambundukiai nyawaya.

2 TIMOTIUS 4:1

Labattu poleangi Isa Almasi antama' ri anne linoa untu' angngadeli sikontu tau attallasaka siagang tau matea; siagang labattui untu' ammarenta, a'jari Batara. Iami anjo saba'na nakupala' tojeng-tojeng mae ri kau, ri dallekanNa Allata'ala siagang Isa Almasi:

FILIPI 3:16

Mingka anne passalaka parallui nuparhatikang, iamintu: Paralluki' tuli anturuki lalang ri tallasatta anjo paratorang le'baka nipinawang sa'genna kamma-kamma anne.

2 KORINTUS 10:1

Kamma-kamma anne, kalengku Paulus, nia' ero' kupabattuangko. Inakke anne, turu' kananna taua, sanna' tunana kana-kanangku punna sidallekanga' siagang ikau ngaseng. Mingka punna sikabellaiki' sanna' baraniku. Jari, lanri tunaNa siagang kabajikanNa Almasi,

YOHANES 7:43

Kale'bakkanna a'gea-gea'mi ke'nanga passala' Isa.

MARKUS 2:21

Punna nia' tau annampeng baju toa, teai kaeng beru napatampeng. Nasaba' punna akkungkung anjo kaeng beru nipatampenga lata'besoki anjo baju toaya sa'genna kekke' poleang, napila' laluara' kekke'na.

MATIUS 9:16

Tenanniakka tau annampeng baju toamo nakaeng beru ija napatampeng. Nasaba' punna assibeso' anjo baju toaya siagang anjo kaeng beru nipatampenga, tena tapila' a'jari luara'na kekke'na anjo baju toaya.

1 TIMOTIUS 5:21

Ri dallekanNa Allata'ala, Isa Almasi, siagang malaeka'-malaeka' nipileNa, kupala' tojeng-tojengi ri kau sollanna nuturuki anne pappakaingaka; teako ranggaselai manna ri nai, siagang teako assialle-alleangangi.

2 TESALONIKA 2:1

Ri passala'na kabattuanNa Batarata Isa Almasi, siagang lanipasse'reta ngaseng untu' sipammantangang siagang Batara, iaminne kupala' tojeng-tojenga mae ri kau ngaseng:

GALATIA 4:12

Sari'battangku ngaseng! Kupala' dudui mae ri kau sollannu a'jari sangkamma inakke. Nasaba' inakke a'jari sangkamma tomma' ikau. Tena apa-apa kasalang le'ba' nugaukang mae ri nakke.

2 KORINTUS 6:1

Lanri assiaganNa Allata'ala ikambe anggaukangi anjo jama-jamanga, iami anjo nanapala' tojeng-tojemmo ikambe sollanna tena nanubawang-bawangangi anjo kabajikang pa'mai'Na Allata'ala.

ROMA 15:30

Lanri Batarata Isa Almasi, siagang lanri pangngamaseang RohNa Allata'ala, sanna' kupala'na mae ri kau ngaseng sollannu amminawang ngaseng todong attojeng-tojeng siagang inakke appala' doang mae ri Allata'ala.

YOHANES 9:16

Nia'mo siapa are tu Farisi angkana, “Tena olona laTau battu ri Allata'ala anne Tau anggaukangai anne panggaukanga lanri tena Najampangi allo Pammari-marianga.” Mingka nia'mo maraengang angkana, “Tena olona Tau dorakaya lakkulle anggaukangi gau'-gau' appakalannasa' kammaya anne!” Jari tenamo na'julu panggappa ke'nanga.

ROMA 1:13

Sikamma sari'battangku! Eroki kupappiassengang ri kau ngaseng angkanaya, sikontutojenna a'mole-mole sikalima' ero' battu angkunjungi ngasengko, mingka tuli nia' salibanra. Sanna' erokku, sollanna nia' todong wassele' jama-jamangku ri tangnga-tangnganu, sangkamma ri pa'rasangang maraenga ri tangnga-tangngana bansa maraenga.

1 KORINTUS 1:11

Nasaba' nia' tau battu ri balla'na Kloë ampabattui ri nakke angkanaya nia' passigea'-geakkang ri kau ngaseng.

1 KORINTUS 3:3

nasaba' mannuruki ijako ri cara sipa'-sipa' rupataua lalang ri katallassannu. Nasaba' punna massing sikimburu ijako siagang masarro ijako assiba'ji para ikau, sai iami anjo buttina ma'nassanu mannuruki ijako ri cara sipa'-sipa' tau tenaya natappa' ri Allata'ala lalang ri katallassannu?

2 KORINTUS 13:9

Rannu maki', punna ikambe lamma na ikau majarre'. Appala' doangki', sollannu a'jari sukku' baji' ri tallasa'nu.

1 PETRUS 5:10

Mingka punna le'ba' mako sessa sinampe', KalenNa Allata'ala lampa'jari sukkukko. LaNapaentengko, siagang laNasareko kagassingang kammayatompa laNapakajarrekko. Nasaba' Iami Allata'ala sannaka baji'na pa'mai'Na; Iami le'baka angkiokko untu' angkasia' tongi kala'birang mannannunganga tete ri Almasi.

YOSUA 22:15

Nabattumo ke'nanga mange ri tampa'na suku Ruben, suku Gad siagang suku Manasye rayaya ri daera Gilead.

MARKUS 3:24

Punna nia' se're bansa, nata'bage-bage taunna nampa assimusu-musu para ia, antekamma lakkulle attahang ammenteng pamarentana anjo bansaya.