1 KARAENG-KARAENG 5:9 - KITTA' MATANGKASA'

⁹ Sikamma ra'yakku langngerangi anjo kayua naung battu ri Libanon mange ri tamparanga. Anjoreng, anjo batang-batang kayua lanasikkoki ke'nanga a'jari raki' nampa lanapalo'loro' ke'nanga ri biring tamparanga sa'genna mange ri tampa' kipattantua. Anjoreng lanibongkaraki anjo raki'-rakika nampa nipassareang mae ri ra'yatta untu' naurusu' pole. Kupalaki battu ri katte nakipasadia apa-apa lanakanrea sikamma tau niaka ri balla' kakaraengangku.”

1 KARAENG-KARAENG 5:9 Referans Kwoze

YEHEZKIEL 27:17

Yehuda siagang Israel napassambei barang-barang danggangannu siagang gandung, je'ne' bani, minynya' zaitun, siagang rampa-rampa.

EZRA 3:7

Anynyumbang tommi doe' ra'yaka untu' anggaji tukang batua siagang tukang kayua. Akkiring tommi ke'nanga kanre, inungang siagang minynya' zaitun mange ri kota-kota Tirus siagang Sidon untu' nipassambe siagang kayu camara Libanon battu ri anjo kota-kotaya. Anjo kayu-kayua nierangi mange ri Yafo ammalo tamparang. Yangasenna anjo nagaukangi ra'yaka situru' ising napassareanga Kores, karaeng Persia.

LAMPA-LAMPANA 12:20

Sanna' larrona Herodes ri tu Tiruska siagang tu Sidonga. Lanri kammana, a'lampami ke'nanga mange andallekang ri ia. Uru-uruna nanyonyo'mi rolong Blastus, iamintu kapalaya ri balla' lompona Herodes, sa'genna sipammentengang Blastus siagang ke'nanga. Le'baki anjo nirurungammi ke'nanga mange andallekang ri Herodes. Appala' damemi ke'nanga ri Herodes, nasaba' apa-apa nikanrea ri pa'rasanganna ke'nanga, sangnging apa-apa battu ri pa'rasanganna Herodes.

2 PATTOTTORANG 2:16

Lanna'bangi ikambe kayu camara battu ri Libanon sangkamma jaina kiparalluanga, nampa nisikko' a'jari raki', siagang nipalo'lorang ri je'ne' battu ri tamparang sa'genna mange ri Yope. Battu anjoreng akkullei kilaling mange ri Yerusalem.”

2 PATTOTTORANG 1:15

Ri wattu pamarentahanna Salomo, anjo bulaenga siagang peraka sanrapanji barang biasa ri Yerusalem, sangkamma batu; siagang kayu camaraya ri Libanon teai sipato' jaina sangkamma kayu ara biasaya.

PAOLE 3:25

Kisarema' pangngellai untu' allimbangi Binanga Yordan, Batara, untu' anciniki pa'rasangang copponga buttana, moncong ga'gaya siagang Monconna Libanon.

1 KARAENG-KARAENG 5:8

Nampa akkirimmo Hiram pappiali mae ri Salomo angkana, “Le'ba'mi kutarima anjo kabara' pappalatta, siagang sadiama' untu' anturukiangki' pappalatta. Lappasadia' kayu camara Libanon, siagang kayu camara biasaya situru' pappalatta.

1 KARAENG-KARAENG 5:10

Jari nisaremi Salomo ri Hiram sikontu kayu camara Libanon siagang camara biasaya ia naparalluanga.

1 KARAENG-KARAENG 9:27

Nakiringi Karaeng Hiram ana'-ana' kappala'na ia niaka pangalamanna untu' assombala' siagang ana'-ana' kappala'na Salomo.

1 KARAENG-KARAENG 3:12

jari laKuturukiang mako pappala'nu. LaKupa'jariko la'bi cara'dekangngang siagang la'bi bajikangngang pangngassengannu na manna inai-nai, baji' ri jammang allaloa, kammayatompa ri jammang labattua.

1 KARAENG-KARAENG 4:20

Ra'ya' Yehuda siagang ra'ya' Israel sanrapangi kassika ri biring tamparang jaina. Anggannaki ke'nanga ri kanre siagang ri inungang kammayatompa sannangi katallassanna ke'nanga.

2 PATTOTTORANG 9:22

La'bi kalumanynyanna siagang cara'de'na Karaeng Salomo na karaeng manna pole battu kemae.

AYUB 32:8

Mingka assarea kacara'dekang mae ri rupataua, RohNa bawang Allata'ala Kaminang Koasaya.

KATO'BA 1:16

Kupikkiriki angkana, “Inakke anne a'jari tau niparalluanga' siagang tau cara'deka'; bella cara'dekku na sikontu tau le'baka ammarenta ri Yerusalem rioloangangku. Appasse'rea' jai pangngassengang siagang kacara'dekang.”