1 KARAENG-KARAENG 1:39 - KITTA' MATANGKASA'

³⁹ Nampa angngalle Zadok minynya' zaitun le'baka naerang battu ri KemaNa Batara, nampa naminynyaki na naangka' Salomo a'jari karaeng. Nipasa'rami tarompeka nampa sikontu tau hadereka anjoreng akkio'mi angkana, “Mattallasaki Karaeng Salomo!”

1 KARAENG-KARAENG 1:39 Referans Kwoze

PAMMUJI 89:20

Riolo dudu lalang se're so'na, Kikana mae ri ata tamamminraTa, “Le'baki Kutulung se'rea tubarani, se'rea tule'ba' Kupile battu ri ra'ya', Kupakatinggimi.

1 PATTOTTORANG 29:22

Anjo alloa angnganre angnginummi ke'nanga siagang rannu pa'mai' ri dallekanNa Batara. Nampa untu' makapinruanna nipa'la'bammi nipappiassengang angkanaya Salomo a'jari karaeng. Lalang arenNa Batara, napattantumi ke'nanga angkana Salomo a'jari karaenna ke'nanga siagang Zadok a'jari imang.

1 KARAENG-KARAENG 1:34

Anjoreng musti niangkaki ri Zadok siagang Natan a'jari karaeng Israel. Le'baki anjo musti nupasa'rai tarompeka nampa akkio' rannuko angkana, ‘Mattallasaki Karaeng Salomo!’

1 SAMUEL 10:24

Nampa nakanamo Samuel mae ri ra'yaka, “Iaminne tau nipilea ri Batara, tena sangkammanna ri katte ngaseng.” A'gora lompomi sikontu bansaya angkana, “Mattallasaki karaenga!”

2 PATTOTTORANG 23:13

Naciniki anjo karaeng berua ammenteng ri pakke'bu' antamaya ri Balla'Na Batara, ri tampa'na nilanti' a'jari karaeng, nitammulili ri perwira-perwiraya siagang tau appasa'raya tarompe'. Sikontu ra'yaka akkio' rannu kabusuki nirurungang ri sa'ra tarompe' siagang ri pakarena musi' niaka ri Balla'Na Batara, untu' ampakasuaraki anjo gau' lompoa siagang pakkakasa' musi'na ke'nanga. Lussa'mi Atalya siagang nakae-kaemi pakeanna, nampa ammarrang angkana, “Pasikongkolang! Pasikongkolang!”

2 PATTOTTORANG 23:11

Le'baki anjo nierammi Yoas ri Yoyada assulu', nampa napadongko' songko' kakaraenganga ri ulunna, siagang napassareang Kitta' “HukkunNa Allata'ala” mae ri Yoas. Kammami anjo batena niangka' Yoas a'jari karaeng. Nampa massing appatiri' minynya' Imang Yoyada siagang sikamma ana'na, iamintu minynya' upacara palantikang mae ri Yoas; a'gora lompomi sikamma taua angkana, “La'bui umuru'na karaenga!”

2 KARAENG-KARAENG 11:12

Le'baki anjo nierammi Yoas assulu' ri Yoyada, nampa napataba ri ulunna Yoas songko' kakaraenganga, siagang napassareang mae ri ia kitta' HukkunNa Allata'ala. Nilanti'mi Yoas a'jari karaeng, nampa nipa'la'bang anjo passalaka mae ri sikontu ra'yaka. Attempa lima kabusu'mi ke'nanga siagang akkio' rannu angkana, “La'bui umuru'na karaenga!”

1 KARAENG-KARAENG 1:25

Annemi alloa nale'ba' assare jai koro'bang gimbala', sapi laki, siagang ana' sapi co'mo'-co'moka. Yangaseng ana'-ana' bura'neta naundangi. Kammayatompa sikamma panglima tantarata siagang Imang Abyatar. Kamma-kamma anne sitabangi ke'nanga assua'-suara' siagang akkiok-kio' rannu angkana, ‘Attalasaki Karaeng Adonia!’

1 SAMUEL 16:13

Angngallemi linta' Samuel minynya' zaitun nampa naminynyaki Daud ri dallekanna sikamma daenna ngaseng. Anjo wattua nikoasai memammi Daud ri RohNa Batara. Appakkaramula anjo alloa siagang situlusu'na nirurungammi ri RohNa Batara. Nampa ammotere'mo Samuel mange ri Rama.

1 KARAENG-KARAENG 1:40

Nampa a'lampa ngasemmo ke'nanga anrurungangi ammotere' siagang akkio' a'rannu-rannu, appasa'ra suling, sa'genna sanrapangi tappue buttaya napakamma anjo kasuarranga.

2 KARAENG-KARAENG 9:1

Anjo wattua akkioki Elisa kalase'renna anjo na'bi-na'bi naajaraka nampa nakana ri ia: “Apparuruko untu' a'lampa mange ri Ramot ri pa'rasangang Gilead, siagang erangi anne botolo' niaka minynya' zaitunna.

2 KARAENG-KARAENG 9:13

Akkaro-karomi agang-aganna Yehu ansungkei jubana ke'nanga nampa napaka'rang ri tukaka ri dallekanna Yehu. Nampa appasa'ra ke'nanga tarompe' siagang a'gora angkana, “Yehu a'jari karaeng!”

2 KARAENG-KARAENG 11:14

Nacini'mi anjo karaeng berua ammenteng ri pakke'bu' antamaya ri Balla'Na Batara ri napattampakkia nilanti', nitammulili ri perwira-perwiraya siagang patui' tarompeka. Sikontu ra'yaka akkio' rannu kabusuki nampa nipasa'raya tojeng tarompeka. Lussa'mi nasa'ring nyawana Atalya nanakekke' pakeanna, siagang a'gora angkana, “Pasingkongkolang! Pasikongkolang!”

KALAPPASSANG 30:35

Pake kabusuki anjo untu' appare' campurang kamanynyang sannaka mabau'na. Tambai ce'la sollanna tuli baji'na anjo kamanynyanga nakkulle nipake untu' iNakke.

1 KARAENG-KARAENG 2:15

Appialimi Adonia angkana, “Kiassengi ibu' angkanaya mustina inakkeji a'jari karaeng. Iaminjo naminasai sikontu Israel. Mingka ia kajarianga ta'bale'mi. Andikku a'jari karaeng, lanri kammai anjo Nakaerokia Batara.