रोम सहरतोर 16:25 - माडिया गोंड पवित्र सास्त्रम

²⁵ देवुळतुह्‌क जोहर आयि! नना काग़्हतनद येसु किर्स्तुना बेसता कबुर वेहतपु, देवुळतगा मीवा विस्वसतुन बेस मेग़्किह कीयनद लाव मन्ह्‌ता. इद कबुरता पोल्‍लो वेल्‍लाय जोम आनाह, मकिस मता.

रोम सहरतोर 16:25 Referans Kwoze

1 कुरिंततोर 2:7

मति देवुळताये बुदता पोल्‍लोतुन वेहतह्‌नोम. आक्रिते माट ताना संगेन पिसना इन्जि, अद पोल्‍लोतुन देवुळि बूमतुन पुटिह केवस्केन, विचर कीस तासिस मता. इचानाह पुन्पिह केवा मता. मुनेता कालमते तना पोटातगा तासिस मता.

रोम सहरतोर 2:16

इव सबे पोल्‍लोङ बेस्के आयनुङ इतेके, नना पोकुर कीयनद बेसता कबुरता इसबते, देवुळता अदिकरते येसु किर्स्तु उंद दिया लोकुरा नेयम कीयनोग़ अस्के. ओरा जीवातगा मकतव पोल्‍लोन पुन्जि, ओरा नेयम कीयनोग़.

इपिसुसतोर 1:9

देवुळि मुने मकिह कीस तासिस मतद पोल्‍लोतुन, इंजेके माक पुनाह कीता. इद्रम कीयलाहि ताना गिर्दा मता. मुनेन तना विचर कीस मतपु, किर्स्तुना मेटे इंजेके अद पोल्‍लोतुन पेसिह कीता.

2 तिसलुनितोर 2:14

बेद बेसता कबुरतुन माट मीक पोकुर कीतोम, ताना मेटेने देवुळि मीक केयता. मावा येसुसामि किर्स्तुना डीसाते मीट कलियना इनजोर, मीक केयता.

2 कुरिंततोर 4:3

माट पोकुर कीय्ह्‌नोम अद बेसता कबुरता पोल्‍लो, मिसतप लेह्‌का मतेके, अद सिरप देवुळतग्डाहि सिक्सा दोर्कवालोरिह्‌क अद्रम मन्ह्‌ता.

इपिसुसतोर 3:9

सबेटविन पुटिह कीतद देवुळि, इद पोल्‍लोतुन मुने वेल्‍लाय जोम आनाह, पुन्पिह केवा तासिस मता. मति इंजेके अद पोल्‍लोतुन सबेटोर मन्कलोरिह्‌क तोहतनद कबळतुन वने, नाक देय्वा कीसि ईता.

1 पत्रु 5:10

माक कतम देय्वाङ ईयनद देवुळि, येसु किर्स्तुना संगे, मीकु बेस्केन मायवदु डीसाते कलियलाह केयता. इद रेंड दियाना मनमुळते, मीटु गय्क तिपल आतापया, देवुळ मीकु ओसोवने बेस कीसि तासग़ा. अद मीवा विस्वसतुन मेग़्किह कीसि, मीक लाव ईसि, निल्पिह कीयग़ा.

2 तिमोति 2:8

दाविद राजाना कूळतोग़, येसु किर्स्तुन सीता कीम. हामुरतग्डाहि देवुळि ओन जीवा अर्हता. नना पोकुर कीयनद इदे बेसता कबुर आंदु.

2 तिसलुनितोर 3:3

मति सामि किर्स्तु सेतेमतोग़ आंदोग़. ओग़ मीक मेग़्किह कीयनोग़, ओसो देयह्‌कना मुक्याल मियगा वावाह, मीक राका कीयनोग़.

इपिसुसतोर 6:19

मन्कलोर मुने पुनवालेवा मंदुर, अद पोल्‍लोतुन बेसता कबुरते, देवुळि इंजेके पुन्पिह कीता. तान पोकुर कीयलाहि, किर्स्तु नाक लोहतोग़. अदिनेनाह्‌क कोनि इंजेके नना जेलतगा मह्‌नन. नना तान पोकुर कीयनाये, अद नावा कबळ आंदु. अद इसबते देवुळि नावा तोडटगा पोल्‍लोङ ईयि, नना रेयवालेवा वेहतलाहि, नयेनाह्‌क वने पार्तना कीम्ह्‌टु.

गलातितोर 2:2

अगा देवुळिये नाक ओसीताह्‌कु नना अतन. अन्जि अग्डोर विस्वसिरगा, बोर मोदुल मन्कलोर मन्ह्‌तोर, ओरगा अतन. दुस्राङ जातिनोरगा नना काग़्हतद बेसता कबुरतुन, ओरिन ओर्के एग़िह कीस वेहतन. निमा काग़्हतद कबुर देवुळतग्डाहे वाता इनजोर, ओर पेदल्क नाक इनदनुर बहे; अस्के नावा पूरा कह्‌टेम उगसे अनो आयग़ा इन्जि, नावा आसा मता.

2 कुरिंततोर 4:5

अदिह्‌क येसु किर्स्तुये सामि आंदोग़ इनजोर, माट पोकुर कीय्ह्‌नोम, मावाय लोप्पाडा पोल्‍लोतुन केवोम. माट इतेके ओना पोल्‍लो केंजताह्‌कु, मीवाङ सेवकिरोम आंदोम.

1 कुरिंततोर 1:23

माट कोनि हव्कनागुटातगा डोलतोग़ येसुना पोल्‍लोतुन पोकुर कीय्ह्‌नोम. अद पोल्‍लो यहुदिरिन विस्वस कीया पग़वप लेह्‌का कीता.(बाराह्‌क इतेके देवुळ लोहवाल पिसिह केवाल, अद्रम लजा वानाह डोलवाल आयोग़ इनजोर, ओर विचर कीतोर.)यहुदि आयवोरिह्‌क बारा, मावा कबुर बुदलेवद पोल्‍लो दिसिह्‌ता.

बळयिर 20:32

“इंजेके नना मीकु देवुळता कयदे विळ्सिस ईय्ह्‌नन. ताना दयाता पोल्‍लोतुन सीता कीसोर मन्ह्‌टु. अद्रम सीता कीतेके, अद मीवा विस्वसतुन बेर्सिह कीसोर दायग़ा. ओसो बेद बर्कत देवुळि तना पवित्र लोकुरेनाह्‌क तासतद मन्ह्‌ता, अद बर्कत मीक दोर्कग़ा.

बळयिर 9:20

अगा मनेके, सोलु यहुदिरा पार्तनाताङ लोह्‌कनगा अन्जि, येसुये देवुळता मग़ि इन्जि, पोकुर कीया बोटटोग़.

मत्याल 13:35

इदिनलोप्पा देवुळ तना कबुरतोना संगे मुने वेहच मता, अद पोल्‍लो इंजेके करल आता, अद इह मन्ह्‌ता: नना नावा तोडटे पुन्पिह कीयनाङ पीटोङ वेहतकन. बूम पुटटग्डाहि मकिस मतव पोल्‍लोनु, नना वळ्ह्‌किस तोहतकन.

मत्याल 13:17

इह केंजाट, नना सेतेम वेहतह्‌नन, नेंड मीट बेव ऊळिह्‌निर, केंजिह्‌निर, अविनु मुनेतोर देवुळता कबुरतोर ओसो सेतेमतोरु, इद्रम वेल्‍लाटोरे ऊळलाह, केंजलाह पप्ळेम आंदुर. मति ओरिह्‌कु ऊळ दोर्को, केंज दोर्को.

1 पत्रु 1:20

इदे कबळतुह्‌क इन्जि, देवुळि येसुनु इदु बूमि पुटनामुनेने, आचिस मता; मति इंजेके इव आक्रिताङ दियानेन, येसु मियेनाह्‌कु इन्जि, इद बूमते वासि, दुनियातोरिह्‌क दिसतोग़.

इब्रितोर 7:25

ओसो माट येसुना मेटे, देवुळता एरे अनवालोरेनाह्‌क, ओग़ अमेसाये देवुळतुन अर्ज कीसोर मन्ह्‌तोग़. इद्रमलेह्‌का ओग़ माक पूरा कतम पिसिह कीयलाह पग़यह्‌तोग़.

2 तिमोति 1:9

देवुळि माक पिसिह कीसि, तनाय पवित्र लोकुर आयलाह माक आचता. माट बेसताङ कबस्क कीताह्‌कु आयो, मति तना मुनेन विचर कीस मतद पोल्‍लोता इसबते, माक आचता. किर्स्तु येसुना मेटे, माक ताना दया दोर्कना इन्जि, अद सुरुमुनेताहि विचर कीस मता.

इपिसुसतोर 3:11

सुरुमुनेताहि देवुळि इद्रम कीयलाहि, विचर कीस मता. इंजेके मावा सामि किर्स्तु येसुना कयदे तान पूरा कीता.

1 कुरिंततोर 4:1

अदिनेनाह्‌क माट सेवकिरा लोप्पा, मीट विचर कीयह्‌पा, वेर किर्स्तुना सेवा केवालोर आंदुर, देवुळि तनाङ मकिह कीस तासिस मतव पोल्‍लोन वेहतनद कबळतुन, वेरिह्‌क ईता इनजोर, सीता कीम्ह्‌टु.

रोम सहरतोर 14:4

दुस्रोना सेवा-साकुर केवानगा, कसुर ओपनद कबळ मीवा आयो. ओग़ कसुर कीतद, केवद, ओनाय माल्काल वेहतनोग़. अद्रमलेह्‌काने बोग़ाय विस्वसि, कसुर कीतद, केवद, ओना माल्काल देवुळिये वेहतग़ा. देवुळिये ओना तोळ आताह्‌कु, ओग़ तना विस्वसताहि अरवालेवा, देवुळता मुनेह बेस नितनोग़. अदिह्‌क अद्रमतोन कसुर ओपनदायो.

रोम सहरतोर 11:25

मावोर विस्वसिरिर! माटे पका तेल्वतोरोम इन्जि, मीट पोग़यनदायो इनजोर, देवुळि इंजेके इस्रयेलतोरा लोप्पा पुन्पिह कीतद, इद पोल्‍लोतुन मीक वेहतलाह आतन: यहुदि आयवोर बेच्वुर किर्स्तुन विस्वस कीयनुर इनजोर, देवुळि विचर कीता, अच्वुर कतमतोर देवुळतेके वानाह्‌जोम, उच्वुर इस्रयेल मन्कलोरा बुदि, देवुळताङ केंजवाह कैंगम मनदग़ा.

कुलुसितोर 4:3

अद्रमे ओसो मयेनाह्‌क वने पार्तना कीम्ह्‌टु. किर्स्तुना लोप्पा मन्कलोर मुने पुनवा मंदुर, अद पोल्‍लोतुन पोकुर कीताह्‌कु, नना जेलते मह्‌नन. अदे पोल्‍लोतुन सबेटोरिह्‌क माट पोकुर कीयलाहि, देवुळि अग़ तेग़यि इनजोर, पार्तना कीम्ह्‌टु.

मत्याल 20:7

‘माक बोग़े बूततुह्‌क केयोग़, अदिह्‌के माट नितोम, दादा!’ इनजोर इतोर. पया ओग़ इतोग़, ‘अह इतेक, मीट वने नावा अंगुर वाळुमते अन्ह्‌ट.’ इतस्के ओर अतोर.