पिलिपितोर 1:7 - माडिया गोंड पवित्र सास्त्रम

⁷ मीट सबेटोरिन इद्रम सीता कीयनद नाक बेस ओप्पिह्‌ता. बह इतेके नना इगा जेलते मनदह्‌पा, मीट सबेटोरिर नावा तोळ आतिर. ओसो किर्स्तुना विरुदतोरिन पोल्‍लो मल्हचि, ओना बेसता कबुर सेतेम मन्ह्‌ता इनजोर करल कीयनद, इद नावा कबळते वने, मीट तोळ आतिर. अदिनेनाह्‌क मीक नना जीवा कीय्ह्‌नन.

पिलिपितोर 1:7 Referans Kwoze

2 कुरिंततोर 7:3

मीट माक इद्रम इतिर इनजोर, नना मीक कसुर वाटोन. नना मुनेन वेहतपु, मीक इचोन जीवा कीय्ह्‌नोम इतेके, हातेकाय पिसतेकाय, माट मीवा ऐंगेन मह्‌नोम.

2 तिमोति 2:9

इदे बेसता कबुरतुन पोकुर कीयनाह्‌क, नना तिपल आयलाह आतन; लाग्वोग़ मन्कन दोहतप लेह्‌कान, नाक दोहचि जेलते वाटटोर. मति देवुळता पोल्‍लोतुन इतेके, बोग़े दोहच तास पग़वोग़.

कुलुसितोर 4:18

इंजेके नना पोलुनन, नावाय कयदे मीक जय येसु इनजोर रासलाह आतन. नना जेलते मह्‌नन इनजोर सीता कीसि, नयेनाह्‌क पार्तना कीम्ह्‌टु. देवुळि मीक देय्वा ईयि.

पिलिपितोर 4:14

तेला मति नाक अळ्सन पुटटस्के, मीट नाक तोळ ईतिर, बेस कीतिर.

इपिसुसतोर 3:1

इव सबे पोल्‍लोन सीता कीसि, नना पोलुनन (मियेनाह्‌क पार्तना कीय्ह्‌नन) ... नना मीट यहुदि आयवोरगा, किर्स्तु येसुना कबळ कीताह्‌के, जेलते मह्‌नन.

बळयिर 20:23

मति इचोने पुतन: ‘मन्कलोर नीक तिपल कीयनुर ओसो जेलते वाटनुर’ इनजोर, नना तिरियनव सबे सहर्कने, देवुळता जीवा नाक मुनेन वेहचोरेन मन्ह्‌ता.

1 योहन 3:14

माट इंजेके हामुरता लावताहि पेसिसि, देवुळता पिसमुळतुन दोर्किह कीतल इनजोर, माक एर्का मन्ह्‌ता. बाराह्‌क इतेके, माट मावा ऐंगेटोर विस्वसिरिन जीवा कीय्ह्‌नल. मति बोर अद्रम जीवा केवोर, ओर हातप लेह्‌काने मन्ह्‌तोर.

2 पत्रु 1:13

नना जीवात मनाह्‌जोम, मीट इव पोल्‍लोन पोस मनदलाह, मीक सीता अर्हचोर उसर कीयनद बेस ओप्पिह्‌ता इनजोर, विचर कीयलाह आतन.

इब्रितोर 3:1

अदिनेनाह्‌क मावोर पवित्र विस्वसिरिर! देवुळि मीक बेद पिसमुळते केयता, अवटे मीट वने कलियतिर. अदिनेनाह्‌क येसुना लोप्पाडा पोल्‍लोतुन बेस-नेह्‌ना विचर कीस ऊळाट! ओग़ देवुळ लोहतोग़ (माक पिसिह केवाल), ओसो मावा पेर्माल इन्जि, माट कबुल आय्ह्‌नल.

2 तिमोति 1:8

अदिनेनाह्‌क मावा सामिना साक्सि ईयलाह, निमा लजा आयमा. अद्रमलेह्‌काने ओना सेवा कीयनाह्‌क, नना जेलते मह्‌नन; इद पोल्‍लोतेनाह्‌क वने निमा लजा आयमा. मति देवुळि नीक ईतद लावते, बेसता कबुरतेनाह्‌क नावा संगे तिपल आम.

1 तिसलुनितोर 5:5

मीट सबेटोर विस्वसिरिर वेह्‌चते मतप लेह्‌कान, पियलते मतप लेह्‌कान, बेस बुदते मनवालोरिर आंदिर. उच्वुर मन्कलोर कीयना लेह्‌कान, माट नग़्का ईकळते मतप लेह्‌का, उंजिस मनवालोर दुनियाता मन्कलोरल आयवल.

कुलुसितोर 4:3

अद्रमे ओसो मयेनाह्‌क वने पार्तना कीम्ह्‌टु. किर्स्तुना लोप्पा मन्कलोर मुने पुनवा मंदुर, अद पोल्‍लोतुन पोकुर कीताह्‌कु, नना जेलते मह्‌नन. अदे पोल्‍लोतुन सबेटोरिह्‌क माट पोकुर कीयलाहि, देवुळि अग़ तेग़यि इनजोर, पार्तना कीम्ह्‌टु.

इपिसुसतोर 4:1

इव सबे पोल्‍लोनेनाह्‌कु, देवुळि मीक तना मन्कलोर आयना इन्जि केयता, तेन सीता कीसि, तान्क विचर वातपु ताकाटु. मीट इद्रम ताकना इन्जि, नना सामिनेनाह्‌क जेलते मनवानन, मीवाङ काल्काय अरयह्‌नन.

गलातितोर 5:6

इतेके किर्स्तु येसुन नमतेके, डायना रिवज कीयनदु बार आयो, केवद वन बार आयो; येसुनगा विस्वस तासिसि, दुस्रोरिन जीवा कीयना, इदे मोदुल पोल्‍लो आंदु.

2 कुरिंततोर 3:2

मावा मेटे मीट विस्वस कीताह्‌कु, माट सेतेम मन्कलोरोम इनजोर तोहतनद, सीटटा लेह्‌काडोरिर मीटे, पुनविरा? मीट मावा जीवातगा रासतद सीटटा लेह्‌कान आतिर. माट मीक बेचोन जीवा कीय्ह्‌नोम, मीवा बेचोन पर्वा कीय्ह्‌नोम इन्जि, माट बेक अतेकाय, सबेटोर ऊळिसि पुन्ह्‌तोर.

1 कुरिंततोर 13:7

बेदे आतेकाय, बेस्केन आरेम आयोग़, सबे पोल्‍लोन नमसोर मन्ह्‌तोग़, आसा कीसोर मन्ह्‌तोग़, सबे तिपल्किन आपसोर मन्ह्‌तोग़.

1 कुरिंततोर 9:23

बेसता कबुर मतपु नावा ताकमुळ आयि इनजोर, बेसता कबुरतासाटि सबे कीय्ह्‌नन.

बळयिर 21:33

पया मुक्याल वासि पोलुन पोयतोग़. पोसि ओन रेंड गोल्स्कने दोहता वेहतोग़. दोहचि वेग़ बोग़ु, बाताल कीतोग़ इनजोर, लोकुरिन ताल्ह्‌क बोटटोग़.

1 पत्रु 5:1

इंजेके येसुना मुडगा मनवालोर, मीक मुक्यालोरिह्‌क उंद पोल्‍लो. नना इंका मुक्यानन, येसु किर्स्तुना तिपलतुनु कोंडामेंड ऊळतोनन, ओसो ओग़ु मल्स वायह्‌पा, ओना कदरते, डीसाते कलियवानन आंदन.

पिलिपितोर 1:12

मावोर विस्वसिरिर! नना जेलते मह्‌नन निटमे, मति इद पोल्‍लोतुन पुन्ह्‌टु: नना जेलते मह्‌नन तेला मति, नाक इद्रम आताह्‌कु, किर्स्तुना बेसता कबुर इंका नेका पोकुर आयलाह आता.

पिलिपितोर 1:13

बह आता इतेके, नना किर्स्तुना सेवातेनाह्‌के जेलते मह्‌नन इनजोर, बेरोग़ राजानाङ सबेटोर पह्‌रातोर, ओसो इग्डोर सबेटोर लोकुर पुतोर.

पिलिपितोर 1:14

अद्रमे नना जेलते मनाह्‌कु, वेल्‍लाटोर विस्वसिर सामिनेनाह्‌क दीरा कीतोर. कीसि मुर्तिय रेयवालेवा दीराते देवुळता पोल्‍लोतुन बेस पोकुर कीस्तोर.

पिलिपितोर 2:22

मति तिमोति अद्रमतोग़ आयोग़. ओग़ सेतेम बुदतोग़ आंदोग़, इदिन मीट इतेके पुतिरे. मग़ि तपेना सेवा कीतप लेह्‌का, किर्स्तुना बेसता कबुरतुन पोकुर कीयलाह, नावा संगे कबळ कीतोग़.

पिलिपितोर 4:3

नावा सेतेमतोग़ तोळतोनिन! अव रेंड आसि आस्कु उंदिय एकाते मनदलाहि, अविस्किह्‌क तोळ आमु. बाराह्‌क इतेके किलेमेन्‍सना ओसो नावा ऐंगे कबळ केवालोरा संगे कलियिसि, अव रेंड आसि आस्कु, बेसता कबुरतुन पोकुर कीयलाहि कह्‌टेम कीताङ. ओर सबेटोराङ पेदिर्क, देवुळतगा मनदनद अमेसातुह्‌क पिसवालोरा पुस्तकतगा रासतव मन्ह्‌ताङ, इदिन सीता कीम्ह्‌टु.

पिलिपितोर 4:15

ए मावोर पिलिपितोरिर! नना मुने बेसता कबुर मियगा पोकुर कीसोर मतन, अस्के नना मीवाय मकिदुनिया पटटाहि पेसिस मतन. पेसतस्के मीवाय मुलु नाक कोताङ ईस तोळ ईतोर. दुस्रोर बोरे विस्वसिरा मुलु नाक तोळ एवोर. इद पोल्‍लोतुन मीट इतेके पुतिरे.

पिलेमोन 1:13

नना बेसता कबुरतुन पोकुर कीयनाह्‌क, जेलते मह्‌नन. (इगा नावा संगे निमा मतेके, नाक सेवा-साकुर कीसेवेनिन.) नीवा जागाते ओग़ नाक सेवा-साकुर कीस ईयेग़ इनजोर, ओन इगा नावा संगे तासलाह ऊळतन.