मत्याल 7:15 - माडिया गोंड पवित्र सास्त्रम

¹⁵ “देवुळता कबुर जोलते वेहवालोरग्डाहि उसरते मन्ह्‌टु. ओरु गोरेनलेह्‌का नाळेह केवप दिसिह्‌तोर, मति ओरा पोटालोप्पाडा विचरि, पिळ्हपळ कीयनाङ लोळ्ङानलेह्‌का मन्ह्‌ता.

मत्याल 7:15 Referans Kwoze

1 योहन 4:1

मावोरिर! नयगा देवुळता जीवा मन्ह्‌ता इनवालोर, सबेटोरा पोग़ोन विस्वस तासमाटु. (देवुळता कबुर वेहवालोरोम इनजोर,) जोल कबुरतोर वेल्‍लाटोर, दुनियाते तिरियसोर नाळेह कीस्तोर. अदिनेनाह्‌क ओरगा निटम देवुळता जीवा मन्ह्‌ताया, इले इनजोर, सेतेमतुन पर्ह्‌किस ऊळाटु.

मत्याल 24:11

ओसो वेल्‍लाटोर जोलहालोरु, जोल कबुर वेहचि, लोकुरिन लेसिह कीयनुर.

कुलुसितोर 2:8

इदिन पुन्ज मन्ह्‌टु! मन्कलोर वासि, मन्कना बुदताहि पुटटव पोल्‍लोनु, (देवुळताङ पोल्‍लोङ इनजोर) काग़्हतह्‌तोर. ओर पका बुदतोर दिसतेक तेला, ओराङ पोल्‍लोङ उगसताङ ओसो जोल पोल्‍लोङ आंदुङ. लोकुर वेहतव अव इद दुनियाताङ अङ्ळमताङ पाय्दालेवाङ उतुर्कनाङ पोल्‍लोङ आंदुङ, किर्स्तुनग्डाह वातव आयोङ. अदिनेनाह्‌क अव पोल्‍लोङ काग़्हचि तमा कयदे कीयलाहि, ओरिह्‌क मीट अग़ एमाटु.

तोहचीतव पोल्‍लोङ 19:20

आतस्के, पया पांड्रि कोडातगा उदतोग़ु अद रकसतुन पोयतोग़. जोल कबुर वेहतनद बूमतग्डा रकसतुन वने पोयतोग़. पोसि, रेंड आसि रकस्किनु, मळ्गनद किसबटटगा, जीवा अग़्केन वाटिसीतोग़. (बूमतग्डा रकस इतेके, मुनेता रकसता मुनेह, बामनाङ सीनाङ तोहन्दु; तोहचि मुनेता रकसता सीना रासतोरिनु, ताना बोमातुन मोळ्कतोरिनु, नाळेह कींदु.)

2 पत्रु 3:17

नावा गोततोरिर! मीट इव पोल्‍लोन मुनेन पुतिर, अदिनेनाह्‌क उसरते मन्ह्‌टु. अद्रम मनवेके, मीट मीवा विस्वसताहि पेग़्के अर्सि, देवुळताङ केंजवोरा नाळेमते एग़्किसि, लेसकिर बहा!

लूकाल 6:26

इंजेके सबेटोरा कदर दोर्किह केवालोरिर! मीट देवुळता देय्वालेवोरिर. बोर मीक कदर ईस्तोर, वेराङ तादोर-बाबोर वने मुनेतोर जोल कबुरतोरिह्‌क अद्रमे कदर ईंदुर. (वेर जोल कबुरतोरा लेह्‌का, मीक वने सिक्सा दोर्कग़ा.)

2 तिमोति 3:13

मति लाग्वोर ओसो सोङ केवालोरु, दुस्रोरिन नाळेह कीसोर दास्तोर; ओसो दुस्रोर वने वेरिन नाळेह कीसोर दास्तोर; अद्रम वेर पका लाग्वोर आसोर दास्तोर.

2 तिमोति 4:3

बह इतेके, वायनाङ दियाने सेतेम पोल्‍लोतुन, मन्कलोर केंजोर आयनुर. मति तमाय विचरतेनाह्‌क, तमाङ केव्किह्‌क बेद पोल्‍लो केंज वसिह्‌ता, अद पोल्‍लो काग़्हवालोर वेल्‍लाटोर मन्कलोरिन, तमगा जमा कीयनुर.

पिलिपितोर 3:2

देवुळता मुनेह सेतेमतोर आयलाह, डायना रिवज कीम्ह्‌टु इनजोर, मीक विस्वसिरिन काग़्हवालोर वातोर. उसरते मन्ह्‌टु! ओर पोटागंजिर कतमतोर लाग्वाङ कबस्क केवालोर आंदुर.

इपिसुसतोर 4:14

अदिनेनाह्‌क वायनव दियाने, माटु उड्लोरा लेह्‌का मनवल. बोळ्से मन्कलोर तमा सत्रल बुदते, माक लेसिह कीयनदायो. ओर काग़्हतव दुस्राङ-दुस्राङ पोल्‍लोन केंजिसि, वळ्यु इके-अके तिर्हतनद ओडाता लेह्‌का माट आयनदायो.

गलातितोर 2:4

इद पोल्‍लो बह पुटटा इतेके, अगा सोङ केवालोर जोल विस्वसिर वास मतोर.किर्स्तु येसु बेद्रम माकु यहुदिराङ अडोनग्डाहि विळ्सिह कीतोग़, ताना आय्डा गुंजलाहि, ओर कुस्क्ने नेङिस मतोर. माटु ओरा पोल्‍लोतुन केंजिसि, अव अडोने ओसो ताकना, इद्रमताये विचरते वातोर.

लूकाल 12:15

ओसो येसु ओरिन इतोग़, “इद उंद पोल्‍लो मीट बेस केंजाटु, सबे रीतिना लालुसतग्डाह मीटु जेक मन्ह्‌टु, बाराह्‌क इतेके बोनगाय वेल्‍ला मालसोम मतेकेन, ओग़ बेस पिसिह्‌तोग़ इन्जि इनमाटु,” इनजोर इतोग़.

तोहचीतव पोल्‍लोङ 16:13

अचोटेने नना ऊळतन: मासुंडता तोडटाहि, सम्दुरतग्डाह पेसतद रकसता तोडटाहि, जोल कबुर वेहतनद बूमतग्डा रकसता तोडटाहि, मूंड देयह्‌क पेसताङ. अव देयह्‌क पंडेनलेह्‌का दिसताङ.

इपिसुसतोर 5:6

बोग़े कबळतुह्‌क अरवव पोल्‍लोङ काग़्हच, मीक लेसिह कीयलाह एमाटु. देवुळता पोल्‍लो केंजवोर अद्रमताङ कबस्क कीस्तोर, अदिनेनाह्‌क अद ओरिह्‌क निटम पका सिक्सा ईस्ता.

बळयिर 13:40

देवुळता कबुरतोर मुनेन (ताना पोल्‍लोतुन केंजवोरिह्‌क) इद्रम रासतोर इतेके, देवुळ इन्ह्‌ता, ‘इद ऊळाट, नावा पोल्‍लोतुन पास्कवालोरिर, नावा नेयमतस्के मीट बामिस डोलकिर, बाराह्‌क इतेके, मीवा वेलाते नना इद्रमता कबळ कीकन इतेके, बोग़ाय वासि मीकु तेळियिह कीतेके, नना इद्रम कीकन इन्जि, मीट मुर्तिय विस्वस केविर आयकिर,’ इनजोर देवुळि वेहता, इन्जि रासतद मन्ह्‌ता. ओर रासतद सिक्साता लेह्‌का मीक आयमाकि इन्जि, पुन्ज मन्ह्‌टु,” इनजोर वेहचि पोलु रोमतोग़.

योहन 10:12

मति कूलतोग़ इतेके, कोपाल वने आयोग़ ओसो माल्काल वने आयोग़, अदिह्‌कु लोळ्ङाङ वायनदिन ऊळिसि, गोरेन अगान विळ्सिस वितिह्‌तोग़. बाराह्‌क इतेके गोरेङ ओनाङ आयोङ इनजोरे. पया लोळ्ङाङ वासि उचुकिन पोयह्‌पा, गोरेङ कतम बिरोबटो आस्ताङ.

मत्याल 16:11

नना आरिना लोप्पा वळ्ह्‌कोन आंदन, इदिन मीट बह पुनविर? मति नना ओसो वेहतह्‌नन, परुसिर, सदुकिर, वेरा पिंडटा लोप्पा उसरते मन्ह्‌टु,” इन्जि येसु ओरिन इतोग़.

मत्याल 16:6

अस्के येसु ओरिन वेहतोग़, “परुसिर, सदुकिर, वेरा ओयता पिंडटा लोप्पा उसरते मन्ह्‌टु, ताना अग़दुह्‌क आयमाट,” इन्जि इतोग़.

मत्याल 10:17

मति मन्कलोराहि उसरते मन्ह्‌टु. ओर मीकु कोरट-कचिर्कनगा ओसीयनुर, तमाङ पार्तनाताङ लोह्‌कने मीक नल्हतनुर.

तोहचीतव पोल्‍लोङ 17:6

ओसो अद आंचाळ ओचिस मतद ऊळतन. येसुना साक्सि मन्जि डोलतोर देवुळता पवित्र मन्कलोरा नेतुर उन्जि, अद आंचाळ ओचिस मता. नना तान ऊळिस पका बामतन.

बळयिर 13:6

अद्रमे पया कुपरुस देसेमता उंद दुस्रा बाजेतके अन्जि, पापुस इनदनद सहरतगा एवतोर. अगा ओर्वोग़ पूजर-गूनिङ केवाल, बार-येसु पेदिरतोग़ यहुदि मन्कल ओरिह्‌क कलियतोग़. (बार-येसुनु इलिमाल वने इंदुर, युनानि पोल्‍लोते बार-येसुना पेदिर इलिमाल मता.) ओग़ु “नना देवुळता कबुरतोनन” इन्जि, लोकुरिन नाळेह कींदोग़.

तोहचीतव पोल्‍लोङ 20:10

ताना पया ओरिन नाळेह कीसोर मतद देयह्‌कना मुक्यानु, उंद देवतुलि मळ्गनद किसबटटगा वाटिसीयग़ा. अगाने अद रकसतुन, ओसो जोल कबुरतदिन, मुनेन वाटटद मन्ह्‌ता. अवु अगा नग़्का पिळ्‍विळ, पियल-पोळ्‍द, अमेसा-अमेसातुह्‌क किस मंटाते, सिक्सा आसोर मनदनुङ.