मत्याल 4:24 - माडिया गोंड पवित्र सास्त्रम

²⁴ येसुनाङ कीताङ कबस्क पूरा सुरिया पटमेंड आबुर आताङ. अस्के सबे रीतिनाङ रोगह्‌कने ऊटेम आस मतोरु, कुर्मुटटप आतोरु, पटापुटा नोयनद दुकतोरु ओसो देयह्‌क पोयतोरु, कुळ्न्दिल रोगह्‌कनोरु, कय्क-काल्क वाग़तोरु, इद्रम सबे रोगह्‌कनोरिन येसुनके ततोर. ततस्के येसु सबेटोरिन सव्रे कीसीतोग़.

मत्याल 4:24 Referans Kwoze

लूकाल 5:15

निमा बोने वेहमा बहा इनजोर वेहचाय मति, येसुना पोल्‍लो मुनेतदिह्‌काय एक्‍वा पोकुर आसोर अता. अदिनेनाह्‌क येसुना पेग़्के-पेग़्के गोह्‌डिनाङ गोह्‌डिङ, ओनाङ केंजलाह ओसो सबे रीतिना बेमरतग्डाहि बेस आयलाह, ओनगा वांदुर.

लूकाल 2:2

(इद सुरुमुनेता सिरगंचि आंदु, अद तूकने सुरिया पटटा गुमसि किविरिनियुस मतोग़.)

मत्याल 17:18

अस्के वेन पेकानु देयमि पोयता इन्जि येसु पुतोग़, पुन्जि देयमतुन दगा ईतोग़, ईतस्के अद देयम ओनग्डाहि पटादुळ पेसिस वितता. पया अदे वेलाते पेकाल सव्रेम आतोग़.

मत्याल 15:22

पया ऊळाटु, अद पटटा उंद यहुदि आयवदु कनान जातता आंचाळि येसुनगा वासि केयसोर इता, “ए सामि, दाविद राजाना कूळतोनिन पिसिह केवानिन, नयगा जीवा लोपा. नावा मयानु देयम पोसि, तान पट्पट अह्‌चिह्‌ता,” इनजोर ओन कालगडेम अरता.

मत्याल 12:22

अस्के पया देयह्‌क पोयताह्‌कु, मूकाल-गुडि आता मन्कनु, लोकुर येसुनके ततोर. ततस्के येसु ओन सव्रे कीसीतोग़, अस्के ओग़ मन्कल वळ्ह्‌क बोटटोग़, अहे तोवया बोटटोग़.

बळयिर 15:23

वेरा कयदे विस्वसिरिह्‌क सीटि लोहतोर, अद सीटटगा इद्रम रासिस मता. “अंताकिया सहरतगा, सुरिया पटटगा, किलिकिया पटटगा मनवालोर यहुदि आयवोर विस्वसिरिह्‌क: “माट मीवा ऐंगेटोर विस्वसिरोम, इतेके येसुसामिनाङ बळयिरोम, ओसो विस्वसिराङ पेदल्कनोम, सीटि रासलाह आतोम, मयेनाह मीक जोहर.

मार्कल 2:3

अचोटेन नालवुर मन्कलोर, ओर्वोग़ कय्क-काल्क वाग़तोग़ मन्कन कांजिसि, येसुनगा ततोर.

मार्कल 1:32

अदे दिया मुलतस्के, वारमता पोल्वादिया मारता. अस्के लोकुर सबे दुकिनोरिन ओसो देयह्‌क पोयतोरिन येसुनगा ततोर.

मत्याल 4:23

पया ओराङ पार्तनाताङ लोह्‌कनगा देवुळता पोल्‍लो काग़्हचोरे, देवुळि लोकुरगा राजेम कीयनदिना लोप्पा बेसता कबुर पोकुर कीसोरे, अहे लोकुराङ सबे रोगह्‌किन, दुकिनु सव्रे कीसोरे, पूरा गालिलमेंड येसु तनाङ कग़यवालोर बार तिरियतोर.

बळयिर 15:41

पया पोलु, सीलासिना संगे पूरा सुरिया पटटे, किलिकिया पटटे तिरियतोग़. बेद-बेद नाग़ अंदुर, अग्डोर विस्वसिरा मुडा विस्वसतुन मेग़्किह कीसोर अंदुर.

लूकाल 4:14

पया येसु अग्डाहि गालिल पटटे मल्स अतोग़. अस्के देवुळता जीवा ईतद लाव ओनगा मता. गालिल पटटाङ सबे नाह्‌कनोर मन्कलोर, ओनाय पोल्‍लोतुन वळ्ह्‌किंदुर.

मार्कल 1:28

पया येसुना इद पोल्‍लो चट्पिटे गालिल पटटाङ एरे-गूरेताङ नाह्‌कनगा आबुर आता.

मत्याल 14:1

अद तूकने गालिल पटटा राजाल, एरोद अंतिपस इनवाल, येसु कीताङ कबस्किन केंजतोग़.

योहन 10:21

मति उय्तुर इतोर, “इव इद्रमताङ गोटिङ देयम पोयतोनाङ आयोङ, डा! वेग़ गुडिन तोवनाह कीतोग़, देयमतुह्‌क बह अह कीया वास्ताया?” इतोर.

मत्याल 9:35

अस्के पया येसु तनाङ कग़यवालोर बार, अद पटटे सबे नाह्‌कने तिरियिंदुर. बेक अतेकाय ओग़ु ओराङ पार्तनाताङ लोह्‌कनगा काग़्हचोरे, देवुळि मन्कलोरगा राजेम कीयनद बेसता कबुरतुन पोकुर कीसोरे, सबे रोगह्‌किन, दुकह्‌किन सव्रे कीसोर तिरियिंदोग़.

मत्याल 9:26

इद पोल्‍लो अद पूरा एरियामेंड आबुर आता.

मत्याल 8:28

पया सम्दुरता अबरि, गदरे इनदनद एरियातगा ओर एवतोर. अगा हातोरिन पोहतलाह पांजाङ मताङ. ओर एवतस्के, अव पांजानाह इर्वुर देयह्‌क पोयतोरु पेसिस वानेके ओन्क कलियतोर. वेर इर्वुर इचोन आकाङ-दोकानोर मंदुर इतेके, वेर मनदनद अग़दुह्‌कु बोग़े बह दाया पग़वोग़ आंदोग़.

मत्याल 8:33

पदिङ मेहवालोर पया, इद उबता-उबिय आता पोल्‍लोतुन, तमा नाटे वेहतलाह विततोर. देयह्‌क पोयतोरा लोप्पा बह बह आता, इदिन पूरा नाटेनोरिह्‌क वेहतोर.

मार्कल 2:4

मति लोकुर अग़दुह्‌क तिळ्ह्‌प अरनाह निंदिस मतोर, वेरिह्‌क येसुनगा एवयलाह अग़ दोर्को. पया वेर लोता वेसळतगा तग़्ङिसि, येसु मतद अरातगाह्‌क कटुल पोदनाह, बेरा बूका कीतोर. बूका आतस्के, अद बूकाताहि ओग़ तेद पग़वोग़ मन्कन, कटुल अग़्के येसुना मुनेह रेहतोर.

मार्कल 2:9

वेग़ कय्क-काल्क वाग़तोन ‘नीवाङ कसुर्कना मापि आता,’ इह इतेके अल्कोया? बार वेनु ‘तेदिस नीवा कटुल पोस अन,’ इनदनद अल्कोया?

लूकाल 4:38

पया येसु तनाङ कग़यवालोर बार, पार्तनाता लोताहि पेसिस, सिमोन पत्रु इनवाना लोन अतोग़. सिमोन पत्रुना आतोह्‌क पका दंड पोस मता. अदिनेनाह्‌क “तान सव्रे कीसीम” इनजोर येसुन अर्जि कीतोर.

लूकाल 5:24

इंजेके नना माने-मन्कना नडुम पुटटोनन मन्जि, देवुळतेनाह नयगा इद बूमते पापमतुन मापि कीयनद अदिकर इंका मन्ह्‌ता इन्जि, मीक तोहतकन,” इतोग़. इन्जि कय्क-काल्क वाग़तोग़ मन्कनु, “नना नीक वेहतलाह आतन, अले! तेदा! नीवा कटुल पोस लोन अन,” इतोग़.

लूकाल 7:17

पया येसुना इद पोल्‍लो पूरा यहुदिरा बूमते, ओसो ताना सर्ने मनदनव नाह्‌कने, आबुर आता.

बळयिर 28:9

इद्रम आतस्के, अद तोग़दोर बोर बोर बेमरतोर मतोर, ओर वने पोलुनगा वातोर. पया पोलु पार्तना कीतस्के, ओर वने सव्रेम आतोर.