8 इद पोल्लोतुन उकुम ईयना लेह्का इनोन, मति दुस्राङ नाह्कनोर विस्वसिर इद कबळते मीक वीळतोर. ओरा अचोन, मीट वने निटम जीवा कीय्ह्निरा बहु इनजोर, पर्ह्किस ऊळलाह वेहतलाह आतन.
अलग आस मनदलाह मीक उकुम एवोन, मति मीक विचर मतेके, गय्क अलग मन्ह्टु इह्नन.
ओर्विह्क-ओर्वोग़ जीवा कीयलाहि, बेसताङ कबस्क कीसीयलाहि, ओर्विह्क-ओर्वोग़ बेद्रम दीरा ईकल इनजोर, विचर कीस ऊळिङ, ओसो अद्रमलेह्काने कीयिङ.
अदिनेनाह्क बोग़े पेग़्के-मुनेह आसोर एमाकेग़, अहे दान ईयनद अडोतुन नोमिय पोयतग़ा इनजोर वने एमाकेग़. बेस गिर्दाते दान ईयनद, देवुळतुह्क विचर वास्ता. अदिह्कु ओर्वोग़-ओर्वोग़ मन्कल, बेचोक ईकन इनजोर विचर कीतोग़, अचोके ईयेग़.
इद्रम मन्जाय मति, माट कसुरलेवा पिससोरे, देवुळता बुदतुन पुनजोरे, बेदे पोल्लोते मुयोग़ आयवा, दुस्रोरिन गूनम तोहचोरे, ओरिन जीवाताहि जीवा कीसोरे,देवुळता जीवा वेहतप ताकसोरे,
येसुना सेतेमता कबुरतुन केंजिस ताकताह्कु, मीटु पापमताहि एडटिर. अदिह्कु मीटु ओर्विह्क-ओर्वोग़ सेतेमते जीवा कीया पग़यह्निर. अद्रमे इंजेके मीवा लेह्का विस्वसिर आतोरिन, मीटु पूरा जीवाताह जीवा कीम्ह्टु.
मावा येसुसामि किर्स्तुन रोमवालेवा जीवा केवालोर सबेटोरा पोग़ोन देवुळि देय्वा ईयि.
अद्रम आयवा, माट ओर्विह्क-ओर्वोग़ जीवा कीसोर, देवुळता सेतेमता पोल्लो वळ्ह्ककल. इद्रमलेह्का माट बेर्सिसि सबे पोल्लोने, मावा तलाता लेह्काडोग़ु किर्स्तुना लेह्का आयकल.
बह इतेके कोताङ ईयलाह, मीट पका विचर आतिर इनजोर, नना पुतन. नीरेताहि अकाया पटटोर विस्वसिर, कोताङ ईयलाह तयर मन्ह्तोर इनजोर, मीवा लोप्पा मकिदुनिया पटटोर विस्वसिरिन वेहतन. मीट गिर्दा आतदिन केंजिसि, अग्डोर वेल्लाटोर मन्कलोर वने, कोताङ ईयलाह तयर आतोर.
अदिह्क मीट ओरिन जीवा कीतिर इनजोर तोहचीम्ह्ट. इदिन ऊळिसि, माट बाराह्कु मीवा लोप्पा पोग़यिह्नोम इन्जि, सबेटोर विस्वसिरा मुडोर पुनदनुर.
अदिनेनाह्क इंजेके नावा विचरतुन, मीक वेहतलाह आतन: मीट कोताङ अर्हतना इनजोर, नीरेताहि विचर कीयलाह आतिर, कोताङ ईयलाह वने सुरु कीतिर. इंजेके अद कबळतुन मारिह कीम्ह्टु. इद मीक बेस आस्ता. कोताङ अर्हतना इनजोर, मीवा विचर मता, अद्रमे बेचोक अर्हता पग़यह्निर, अचोक अर्हाट.
कुव्रा मनवालोरा पोल्लोतुन ताल्ह्किस मतिर, तान रासकन: इद पोल्लोता लोप्पा, नाक सामि ईतद उकुम दोर्को. मति सामि नाक दया कीताह्कु, नना वेहतनद पोल्लो केंजना लायकता आंदु.
इंजेके दुस्रोर विस्वसिरिन वेहतलाह आतन, इव पोल्लोङ सामिनग्डाह वावोङ, ननाय वेहतह्नन: बोग़ाय विस्वसि मन्कना मुते विस्वस केवो, मति तान्क ओना संगे मनदलाह गिर्दा मन्ह्ता इतेके, ओग़ तान विळ्सनद आयो.
दुस्रोर विस्वसिरिन जीवा कीय्ह्नोम इनजोर, मीट सोङ केमाटु, मति जीवाताहि जीवा कीम्ह्टु. लाग्वाङ पोल्लोनग्डाह जेक मन्ह्टु, नेह्नाङ पोल्लोन अमेसा पोस मन्ह्टु.