1 तिसलुनितोर 3:2 - माडिया गोंड पवित्र सास्त्रम

^2-3 मावा तोळतोग़ तिमोतिन मियगा लोहतलाह विचर कीतोम. ओग़ किर्स्तुना बेसता कबुर पोकुर कीयनद कबळते, मावा ऐंगेटोग़ देवुळता सेवा केवाल आंदोग़; इंजेके किर्स्तुनेनाह्‌क वायनव तिपल्कनेनाह्‌कु, बोग़े पेग़्के-मुनेह आयमाकेग़ इनजोर, मीवा विस्वसतुन मेग़्किह कीसीयलाह, मीवा जीवातुन सितुर कीसीयलाह, ओन लोहतोम. माट विस्वसिरल किर्स्तुनेनाह्‌क तिपल आयना इन्जि, देवुळता विचर मन्ह्‌ता इनजोर, मीट पुतिरे.

1 तिसलुनितोर 3:2 Referans Kwoze

पिलिपितोर 1:25

इदिन पुन्जि, मीट मीवा विस्वसते बेर्सिसि, पका गिर्दा आसोर दायना इन्जि, नना पिसकने, इद पोल्‍लोतगा नावा पूरा बर्वस मन्ह्‌ता.

2 कुरिंततोर 8:23

तीतुसना लोप्पा बोग़ाय ताल्ह्‌कतेक, इद्रम वेहाट: ओग़ नावा तोळतोग़ आंदोग़; अहे नावा संगे मियगा सेवा कीयलाह आतोग़. ओना संगे वावालोर इर्वुर मन्कलोरा लोप्पा, इद्रम वेहाट: ओर मावा ऐंगेटोर विस्वसिर आंदुर, विस्वसिरा मुडोर आचिस लोहतोरु. ओरा सेवातेनाह्‌क किर्स्तुह्‌कु मान दोर्किह्‌ता.

2 कुरिंततोर 1:19

बह इतेके देवुळता मग़ि येसु किर्स्तुना पोल्‍लोतुन, नना, सीलास, तिमोति, माट मुवोम आस मियगा पोकुर कीतोम. अगा येसु किर्स्तु वने इंगो, आयो इनजोर, इद्रम रेंड विचर्कने वेहोग़. ओग़ अमेसा तोडटा पोल्‍लो पेसतपु, अहे केवाल आंदोग़.

2 कुरिंततोर 1:1

देवुळता विचरते किर्स्तु येसुना बळयि आयलाह, अद निल्पिह कीतोनन पोलुनन. नना कुरिंत सहरते मनवालोर देवुळता मुडोरिर मीकु, ओसो मीवा अकाया पटटोर सबेटोर देवुळता मन्कलोरिह्‌क, इद सीटटुन रासिह्‌नन. मावा तोळतोग़ विस्वसि तिमोति, नावा संगे इगा मन्ह्‌तोग़.

रोम सहरतोर 16:21

नावा संगे किर्स्तुना सेवा केवाल तिमोति, मीक जय येसु इन्ह्‌तोग़. मावा यहुदि विस्वसिर लुकियुस, यासोन, सोसिपत्रुस वने मीक जय येसु इन्ह्‌तोर.

बळयिर 16:5

अदिह्‌क वेल्‍लाटोर विस्वसिरा विस्वस बेर्सिंदु. दिनम उय्तुर विस्वस कीसोर अंदुर, इद्रमलेह्‌का ओरा मुलु बेर्ससोर अता.

बळयिर 16:1

पया पोलु, (सीलास, गलाति पटटा) दिरबे ओसो लुस्त्रा, इव सहर्कने अतोर. लुस्त्रा सहरतगा तिमोति पेदिरतोग़ ओर्वोग़ विस्वसि मतोग़, ओना तपे युनानि जाततोग़ु, मति तलोग़ि यहुदि आंचाळ आंदु, अद विस्वस वने कींदु.

कुलुसितोर 4:12

मियग्डोग़ इपपरास, येसु किर्स्तुना सेवक आंदोग़, इंजेके नावा संगे मन्ह्‌तोग़. ओग़ वने मीक जय येसु इन्ह्‌तोग़. मीट विस्वसते मेग़्किस मनदना, देवुळि मियेनाह्‌क तासिस मतव पोल्‍लोन मीट बेस-नेह्‌ना पुनदना, देवुळताङ विचर्किन पूरा पुन्जि, अद्रमलेह्‌का ताकना इनजोर, अमेसा आरेम आयवा मियेनाह्‌क पार्तना कीस्तोग़.

कुलुसितोर 4:9

ओना संगे मियग्डोग़ उनेसिमुसिन वने, मियगा लोहतलाह आतन. ओग़ नावा संगे मन्जि, इंजेके बेस बर्वसलायकतोग़ विस्वसि आतोग़, नावा गोततोग़ वने आतोग़. ओग़ तुकिकुस बार मियगा वासि, इग्डाङ सबे पोल्‍लोन मीक वेहतनुर.

कुलुसितोर 1:1

नना पोलुनन, देवुळता विचर मतपु, येसु किर्स्तुना बळयिनन आंदन. कुलुसि सहरते मनवालोर देवुळता मन्कलोरिर मीक इद सीटि रासलाह आतन. मावा तोळतोग़ विस्वसि तिमोति वने, इगा नावा संगे मीक जय येसु वेहतह्‌तोग़. मीट किर्स्तुन विळ्सवा विस्वस कीय्ह्‌निर इनजोर माट पुतोम. मावा देवुळबाबानाहि मीक सुकमि, देय्वा दोर्कि.

2 कुरिंततोर 2:13

नावा ऐंगेटोग़ विस्वसि तीतुस वने अगा वासि, मियकेडा कबुर ततनोग़ इनजोर, अग़ ऊळसोर मतन. मति ओग़ अगा वावोग़; वावाह्‌कु नावा जीवा चुहेम आयो. जीवा चुहेम आयवाह्‌कु, नना तरोवस सहरतोरिन दाय्ह्‌नन इनजोर वेहचि, मकिदुनिया पटटे वातन.

1 कुरिंततोर 4:17

इदे पोल्‍लोतेनाह्‌क नना तिमोतिन मियगा लोहतन. ओग़ नावा जीवा कीतोग़ मग़ना लेह्‌कान आतोग़. ओग़ किर्स्तुना सेवाते, मुर्तिय नाळेह केवोग़. किर्स्तुना अग़दे नना बेद्रम ताकलाह आतन इनजोर, ओग़ मीक सीता अर्हचीयनोग़. नना सबे जागाने, सबेटोर विस्वसिरा मुडोरगा वने, अवे पोल्‍लोन काग़्हतह्‌नन.

बळयिर 18:5

पया सीलासि, तिमोति, मकिदुनिया पटटाहि कुरिंत सहरते वातोर. ओर वातापया, पोलु (तना टमिना कबळतुन विळ्सिस,) देवुळता पोल्‍लोतुन दिनमे पोकुर कींदोग़. सास्त्रम वेहतपु, देवुळि बोग़ पिसिह केवान लोहतना मता, ओग़ येसुये आंदोग़ इनजोर, यहुदिरगा साक्सि वेहन्दोग़.

1 कुरिंततोर 3:10

देवुळि नाक तना देय्वाते ईतद बुदता इसबते, बेस तेल्वतोग़ बेल्दर जोता दोहतना लेह्‌कान, नना मुने मीक किर्स्तुना पोल्‍लो वेहतन. दुस्रोर मन्कलोर बार ताना पोग़ोन तेहचोर दायना लेह्‌का, मीक काग़्हतह्‌तोर. मति ताना पोग़ोन तेहचोर अनवाल मन्कल, तना बेद रीतते दोहतह्‌तोग़ इनजोर, उसरते सीता कीयना गावले.

2 कुरिंततोर 2:12

मीक अद सीटटुन रासतापया, नना किर्स्तुना बेसता कबुरतुन पोकुर कीयलाह, तरोवस सहरते अन्ज मतन. अगा सामिना कबळ कीयलाहि, ओना मेटे नाक अग़ दोर्किस मता.

1 तिसलुनितोर 3:5

अदिनेनाह्‌क मीट विस्वसते मह्‌निरो, इलविरो इनजोर, नावा जीवा गाबर आताह्‌कु, तान पुनदलाहि, तिमोतिन मियगा लोहतन. लोकुरगा पापमता विचर पुटिह कीयनद देयह्‌कना मुक्याल, मीक वने विस्वस विळ्सनाह कीता बहे, माट पका कह्‌टेम कीस, मीक देवुळता पोल्‍लो काग़्हतद कबळ उगसिन आता बहे इनजोर, रेयिस मतन.

2 तिसलुनितोर 2:17

वेरु मीवा जीवातुन सितुर कीयिर, मीट अमेसा बेसताङ कबस्क कीयलाहि, बेसताङ पोल्‍लोङ वळ्ह्‌कलाहि मीक मेग़्किह कीयिर.