1 पत्रु 2:1 - माडिया गोंड पवित्र सास्त्रम

^1-3 इंजेके मीटु देवुळि बेचोन बेस गूनमता मन्ह्‌ता इन्जि पुतिर. इतेके मीटु मीवाङ सबे लाग्वाङ कबस्किन विळ्सिसीम्ह्‌टु: सबे कुळ्सा, सबे सोङु, नाळेह कीयनद बुदि, ओसो जीवा कर्वतप आयनदु, कूदिङ दायनदु, इविन विळ्सिसीम्ह्‌टु. इंजेक पुटटोग़ कस्मुल बाला पेकाल बेद्रम पाल उनडलाह गिर्दा आस्तोग़, अद्रमे मीटु इंका मीवा जीवातुह्‌कु, पाललेह्‌का मनदनदु देवुळता पोल्‍लोतुन पुनदलाह, गिर्दा आम्ह्‌टु. इद्रमता पाल उनजोर मतिर इतेके, मीट देवुळतके दायनद वेला एवनाहि, विस्वसते बेर्ससोर मनदकिर.

1 पत्रु 2:1 Referans Kwoze

इपिसुसतोर 4:31

कोटुल कीयना, ओङ आयना, कुळ्सा आयना, वर्केयना, लजा कीयना, इव सबेटविस्किन लाग्वाङ पोल्‍लोना संगे, मीवा जीवातग्डाह जेक कीम्ह्‌टु.

याकुब 1:21

अदिनेनाह्‌क मीवा जीवातग्डाहि सबे रीतिना माचतुन, ओसो लाग्वाङ कबस्किन, जेक कीम्ह्‌टु. कीसि देवुळ मीवा जीवातगा ओग़्सतद पोल्‍लोतुन, कुलुल बुदते मोन्ह्‌टलाह ईम्ह्‌टु. अद पोल्‍लो मीक पिसिह कीया पग़यह्‌ता.

याकुब 4:11

मावोरिर! ओर्विह्‌क-ओर्विना विरुद वळ्ह्‌कमाटु. बोग़ु तना ऐंगेटोग़ विस्वसिना विरुद वळ्ह्‌किह्‌तोग़, इलवेके ओनगा कसुर वाटिह्‌तोग़, ओग़ देवुळताङ अडोना विरुद वळ्ह्‌किह्‌तोग़. ओसो देवुळताङ अडोन चुकताङ इन्ह्‌तोग़. अद्रम बार मीट देवुळताङ अडोङ चुकताङ इतिर इतेके, अडोङ वेहतप ताकवालोरिर आयविर. मति मीटे नेयम केवालोरा लेह्‌का मन्जि तपिह्‌निर.

1 पत्रु 3:10

पवित्र सास्त्रम वेहतपु, नीकु गिर्दाता मनमुळ गावले इतेके, बेसताङ दियाङ ऊळना इतेके नीवा पोटाताहि लाग्वाङ पोल्‍लोङ नीवा तोडटाहि जोल पोल्‍लोङ पेसनायो.

1 पत्रु 4:4

इंजेक मीवा पाळ्ना गोततोर, इद्रमताङ लाग्वाङ कबस्कने, मीट ओरिह्‌क संग आयवाह्‌कु, बयल आस्तोर. अदिह्‌के ओरु बह इतेक अह वळ्ह्‌कना, कूदिङ दायना कीस्तोर.

1 पत्रु 4:2

अहे मीट पिसनाङ दियाङ एवनाहि, मीटु लाग्वाङ विचर्कने ताकलाह गिर्दा आयवा, देवुळता विचरते तिरियसोरे मनदकिर.

याकुब 5:9

मावोरिर, ओर्विह्‌क-ओर्वोग़ मुयोग़ आसोर मनमाटु. अद्रम आतिर इतेके, मीवा पोग़ोन कसुर उदग़ा. ऊळाट! नेयम केवाल येसुसामि अग़दगान एवयलाह आतोग़.

इब्रितोर 12:1

अदिनेनाह्‌क (माट बह कीयनद इनजोर, तेळियिह कीसीकन:) विस्वसिरा इचोटा बेरा मुडा साक्सि, मावा सर्ने निच (मतप लेह्‌कान, माक दीरा ईसोरेन) मन्ह्‌ता. देवुळि मयेनाह्‌क बेद अग़ तयर कीता, (अद अग़दे वितिङ. बेस वितना इन्जि,) रोमिह कीयनव पुहतव गेंदेना लेह्‌काडाङ सबे पोल्‍लोन तेंडकल, माक ऊर्सतद पापमतुन लेहतकल. ओसो आरेम आयवा, मावा मुनेह मनदनद अग़ पोसि सीदा वितकल.

1 तिमोति 3:11

अद्रमलेह्‌का सेवा कीयनवु, नाटेनोर कदर ईयनव मनदना, कूदिङ अनववु, बेस बुदते तिरियनवु, सबे पोल्‍लोने सेतेमते मनदना गावले.

1 पत्रु 2:22

ओग़ु बातय कसुर केवोग़, ओना तोडटाहि बेस्केने नाळेह कीयनद पोल्‍लो पेसो.

तीतुस 2:3

अद्रमे सेळो आस्किन वने इद्रम काग़्हा: अमेसा देवुळतुन रेयसोर ताकिङ, बोनाङे कूदिङ अनमाकिङ, कल लोटि आयमाकिङ, बेसताङ पोल्‍लोङ काग़्हतनव आयिङ.

1 कुरिंततोर 14:20

मावोर विस्वसिरिर! मीट इद तेल्वता लोप्पा, उड्लोर पिलाङ-पेकोरा लेह्‌का विचर केमाट. लाग्वाङ पोल्‍लोना लोप्पा, पिलाङ-पेकोरा लेह्‌कान पुनवप मन्ह्‌टु. मति मीवा तेल्वते, मीट बेरोरा लेह्‌कान मन्ह्‌टु.

रोम सहरतोर 1:29

अदिनेनाह्‌क ओरु अमेसा सबे लाग्वाङ कबस्क कीस्तोर, कोटुल कीस्तोर, दुस्रोरिन कोंडा कीस्तोर, हव्किह्‌तोर, कूदिङ दास्तोर, नाळेह कीस्तोर, जग्ळाङ पुटिह कीस्तोर, देवुळता अडम मन्ह्‌तोर, पका पोग़यिह्‌तोर, लाग्वाङ आय्डाङ पुटिह कीसोरेन मन्ह्‌तोर, तलोग़-तपेराङ पोल्‍लोङ केंजोर. ओराङ जीवाङ लालुस, मोर्दोप, पोमाडेङ, कुळ्सा, इविस्कने निंदिस मन्ह्‌ताङ.

लूकाल 6:42

आपुना कोंडाता बेरा इळ्पेतुन ऊळवा, नीवा कोंडाता पोडि नाक तेंडलाह ईम इन्जि, निमा नीवा गोतयान बह इनदा पग़यकिन? एय सोङ केवानिन! मुने निमा नीवा कोंडाता इळ्पेतुन तेंडा. ताना पया नीवा गोतयाना कोंडाता पोडि तेंडलाह, बेस ऊळ पग़यकिन.

मत्याल 23:28

अहे मीट वने पलताहि लोकुरिह्‌क पका सेतेमतोरा लेह्‌का दिसिह्‌निर. मति मीवा पोटालोप्पा नाळेह कीयनद बुद, पापम बुदि निंदिस मन्ह्‌ता.

मत्याल 7:5

एय सोङ केवानिन! मुने निमा नीवा कोंडाता इळ्पेतुन तेंडा. ताना पया नीवा गोतयाना कोंडाता पोडि तेंडलाह, बेस तोवया पग़यकिन.

2 कुरिंततोर 12:20

बाराह्‌क इतेके, नना मियगा वातस्के, मीक विचर वावदिन नना कीयनाह आयो बहा; नाक विचर वावदिन मीट कीकिर बहा इनजोर रेयतन. इतेके जग्ळम, कुळ्सा, ओङु, कुदता पाय्दा ऊळना, कूदिङ, गुरागुरा वळ्ह्‌कसोर तिरियना, मोर्दोप, रोदा पोयतना, इव पोल्‍लोङ मियगा दिसनुङ बहे इनजोर रेयतन.

तोहचीतव पोल्‍लोङ 14:5

ओराङ तोडिनाहि बेस्केन जोल पोल्‍लो पेसो. ओर बाताले कसुरलेवोर मतोर.

1 पत्रु 2:16

(मीटु देवुळता लोकुरिर आताह्‌कु,) इंजेके बोराय कय इळ्न इलविर, निटमे! अदिनेनाह्‌कु मीटु माक विचर वातपु कीकोम इन्जि, लाग्वाङ कबस्कने दल्गमाटु. मति माट देवुळता कय इळ्न मनवालोरोम इन्जि,(ताना पोल्‍लो केंजसोर) बेस मन्ह्‌टु.

याकुब 4:5

देवुळता सास्त्रमतुन बेस सीता कीम्ह्‌टु. मावा लोप्पा तना तासतद जीवाता संगे, देवुळि जोळेम आयलाह ऊळिह्‌ता.

याकुब 3:14

मति मीवा जीवातगा, मियेनाह्‌के कदर पर्ह्‌कनव, ओसो जीवा कर्वनव, विचर्क निंदिस मताङ इतेके, बुदतोरोम इनजोर, पोग़यसोर तिरियमाटु. सेतेमतुन मकिह कीसि, जोल वळ्ह्‌कमाटु.

1 तिसलुनितोर 2:3

मीक विस्वस कीया वेहतोम, अद वेलाते माट लेसिस मतोम इन्जि आयो, अहे लाग्वा विचरते कीतोम इन्जि वने आयो, ओसो मीक नाळेह कीयलाह इन्जि वने, अद्रम वेहोम.

1 कुरिंततोर 5:8

ओयता पिंडटुन आवना पंडुमतस्के पोहतना लेह्‌कान, विस्वस केवस्के मयगा मतद लाग्वा बुदतुन, कोंटे बुदतुन पोहिङ. आवना पंडुमतुन ओयवव आरिन तिन्जि माळतप लेह्‌का, नाळेह केवद बुदि ओसो सेतेम बुदि तासिस ताकिङ.

योहन 1:47

नतन्याल पया येसुनगा वातोग़, ओग़ वातदिन ऊळिसि येसु इतोग़, “वेग़ करल इस्रयेलतोग़, वेना पोटालोप्पा नाळेह कीयनद बुद इले.”

लूकाल 11:44

मीक पका सिक्सा आयग़ा, बाराह्‌क इतेके मीटु सेत्तातुन गुमया केवाय मिसतद जागाता लेह्‌का मह्‌निर. अगा गुमया दिसवाह्‌कु, अगाह्‌क अनवालोर पोग़ोट्क दास्तोर, मति इगा इळ्न सेत्ता मिसिस मन्ह्‌ता इनजोर पुनोर,” इनजोर वेहतोग़.

लूकाल 12:1

अस्के अगा अजर्कनाङ अजर्क लोकुर जमा आतोर. वेल्‍ला गर्दितेनाह्‌क, तमतमाय ओर्विह्‌क-ओर्वोग़ दोबेङ-नूकेङ कीसोर, इके-अके दोबलाह आंदुर. ओरिन ऊळिसि, सबेट्क मुने येसु तनाङ कग़यवालोरिन इतोग़: “परुसिर इतेके ओय्‍पिह कीतद पिंडलेह्‌काडोरु, अदिनेनाह्‌क ओरा सोङतग्डाह उसरते मन्ह्‌टु, (ओरा सोङता बुदि सबेटोरिह्‌क दिसो).

मार्कल 12:15

माट सिद्‌वा दोहतकोमा, दोहोमा?” इनजोर ओर येसुन ताल्ह्‌कतोर. मति येसु ओरा सोङतुन पुन्जि, ओरिन इतोग़, “नाक बाराह्‌क एग़्किह कीयलाह ऊळिह्‌निर? नाक ऊळलाह उंदि रुप्या-बंडि ताट,” इतोग़.

मत्याल 24:51

मेटि इद्रम कीयह्‌पा कलियतेके, तना माल्काल ओन पका सिक्सा कीयनोग़. पया अळयना, केयना, मुडुर-मुडुर पल्क कोग़्कना जागातगा, ओन मेटिन सोङ केवालोरा संगे वाटिसीयनोग़,” इनजोर येसु इतोग़.

मत्याल 15:7

एय सोङ केवालोरिर, देवुळि मुने तना कबुरतोग़ यसयाल इनवाल, वेना संगे सास्त्रमते मीवा लोप्पा बराबर वेहच मता: