15 मीट बुद पुतोर मन्कलोरिर इनजोर पुन्जि, नना वेहतलाह आतन. नना वेहतनव पोल्लोन, मीटे बेस-नेह्ना विचर कीस ऊळाट.
मति सबे पोल्लोङ (देवुळतग्डाह मन्ह्ताङा, इलेङ इनजोर,) सेतेम पर्ह्किस ऊळाट. बेव सेतेम पोल्लोङ मन्ह्ताङ, अविस्किन पोस मन्ह्टु.
इंजेके पेन-बोमानेनाह्क वाटटव अविना लोप्पा ताल्ह्किस मतिर. इद पोल्लोता लोप्पा माट बेस-नेह्ना पुतोम इन्जि, उच्वुरिर इह्निर. अद निटमे मति, माट पका पुतोरोम इनवालोर, माट बेरोरोम इन्जि पोग़यसोर तिरियिह्तोर. जीवा केवालोर बारा, दुस्रोरा पाय्दातुन ऊळिह्तोर.
मावोर विस्वसिरिर! मीट इद तेल्वता लोप्पा, उड्लोर पिलाङ-पेकोरा लेह्का विचर केमाट. लाग्वाङ पोल्लोना लोप्पा, पिलाङ-पेकोरा लेह्कान पुनवप मन्ह्टु. मति मीवा तेल्वते, मीट बेरोरा लेह्कान मन्ह्टु.
आंचाळि देवुळतुन पार्तना कीयह्पा, तला मुस्क वाटवा मनदनद ओप्पिह्ताया? मीटे विचर कीस ऊळाट.
मीक लजा वायि इनजोर, इद्रम वेहतलाह आतन! विस्वसिरा कट्लातुन बेस-नेह्ना नेयम कीसीयलाह, बुदतोग़ मन्कल मीवा मुडगा बोग़े इलेग़?
किर्स्तुना सेवा कीयनाह्कु, वेल्लाटोर माक बुदलेवोर इनजोर इन्ह्तोर. मीट बार पका बुदतोर किर्स्तुनोरोम इनजोर इह्निर! मीवा पका अदिकर ताकिह्ता, लोकुर मीक मान ईस्तोर. माट बारा उड्लोर मन्कलोरा लेह्कान आतोम, माक बातय मान दोर्को!
गोततोरिर! अदिनेनाह्क नना वेहतह्नन, (मावाङ तादोर-बाबोरा लेह्कान आयवा,) पेन-बोमान मोळ्कनग्डाहि जेक मन्ह्टु.
सामिना कुळ्पि तिनदह्पा, माट उंदिय बट्किताहि अंगुर जोमा उह्नल. तानेनाह्क सामिन जोहर कीय्ह्नल. माट उंदिय बट्किताहि उनडह्पा, किर्स्तुना नेतुरता मेटे, माट ओना संगे जोळेम आतल इनजोर तोहतह्नल. अहे माट उंदिय आरताङ किळ्केन तिनदह्पा, किर्स्तुना मेंदुलता मेटे, माट ओना संगे जोळेम आतल इनजोर तोहतह्नल.