Tito 3:7 - La'aqtaqa Ñim Lo'onatac 'Enauacna 2013

⁷ Damaye ỹataqta saishet sa saxaguet, qalaxaye Ñimaye ỹachegoxotchigui da lqouagaxanaqtaic da qomi' ỹaconegueta, qataq qomi' ỹanema da yaqto' saconaxaguet da 'itchiguiñi achaalataxac chochaq tatec maye seuataqta'aguet.

Nuevo Testamento Toba Sur

⁷ Ÿoqo'oyi nagui ñimayi ishit da qaltaq qomi' ÿaÿamaxadeete' souaxat da lqouagaxanaqtaic, qataq qomi' ÿanema da achaalataxac chochi tateec mayi ñaquitaqta'aguet.

Nuevo Testamento Toba Sombrero Negro

⁷ Dios qo'mi yichoĝode'n qama'le qo'mi e'n yataqatelo'te q'ae'n. Chane'eja ya'uo yema da'me dojo' qaedi jaqanatetaq ta'le nach'e ena'am jaconaĝaguet qomle ga'me nevitaĝanatac; qo'che' 'uo da'me qo'mi uetauelo 'me qadajoĝonataĝanaĝac, nach'eda da'me 'noyaĝac 'me ja 'naidena'a.

Tito 3:7 Referans Kwoze

Romanos 8:17

Qaq nagui da mashe qomi' llalqa, nache nataqa'en qomi' taleguete 'enauac nam 'onaxaic maye iqataxaatapigui' Ñimaye da qomi' ỹanema. Qaq 'enauac ỹataqta ñeuanaqte' So Cristo, qaq da huo'otaq huo'o da qanque'eenaxac da shenaqta'am Somaye, nache nataqa'en ỹoqta 'eesa da ñeuanaqaua'a Somaye da llo'oxoyec maye ỹaconeguet qome.

Romanos 3:24

Qalaxaye Ñimaye ỹataqta lta'araic da lauotaxanaqtaic da shenaqta. Qaq ỹoqo'oye ỹapalaxat na qarasouaxashet qataq qaca naqa'en aca lasheue. Nachaqrata da chegoqchigui So Jesús da qomi' isoueeguesopa da qanhuaxanaguec maye qomi' taleguetectaxa souaxat da qaye'etaxaloxo.

Tito 2:11

Cha'aye ỹoqta 'eesa Ñim Lo'onatac 'Enauacna da ỹachaxana na shiỹaxauapi da lqouagaxanaqtaic maye chegaqaigui da nca'alaxa.

1 Corintios 6:11

Qaq huo'o co'ollaxa da qoñiita na 'eeta'am ne'enapi. Qalaxaye Ñim Lo'onatac 'Enauacna mashe qami' ichoxore'n qataq qami' iqui'itaxatte', qataq mashe qami' lalamaqa'ate. Qaq 'enauac de'era chegoqchigui So Qarataxala' Jesucristo qataq So Saqcha'a La'añaxac Ñimaye.

Tito 1:2

qataq ỹaỹateeta da aquitaxac da achaalataxac maye chochaq tatec. Qaq Ñim Lo'onatac 'Enauacna maye sa datenataxan, Ñimaye ỹachaxanapec co'ollaxa de'era achaalataxac co'ollaq saxanaqaca ana 'alhua.

Santiago 2:5

Qami' ñauochaxau' ỹaqaỹa't, ỹataqta aỹem qana'axaỹaxañiỹa: Ñim Lo'onatac 'Enauacna lca'aguishec na shiỹaxauapi choxoraq maye huetalec ana 'alhua, yaqto' namayepi da naquitaxac Ñim Lo'onatac 'Enauacna, nachera da ỹoqta 'eesa lsallaxa. Nataqa'en lca'aguishec na choxoraqpi da yaqto' ỹaconeguet da lo'onataxanaxac Ñim Lo'onatac 'Enauacna maye ỹachaxanapeguem co'ollaxa nam ỹauotec Ñimaye.

Gálatas 2:16

Qalaxaye qomi' ỹataqta saỹaanaqta da Ñim Lo'onatac 'Enauacna ỹaconeguet cam ỹataqta huo'o da lpi'iỹaxac So Jesucristo, qaq qaica ca nca'alec da chegoqchigui da ỹalaxaguet na namaxasoxonaxacpi. Qaq ỹoqo'oye qomi' sa'amaqtenaq So Jesucristo, da yaqto' ishet da qomi' ỹaỹamaxareete' Ñim Lo'onatac 'Enauacna souaxat de'era qarpi'iỹaxac Ñimaye. Cha'aye saishet da huo'o ca ỹaỹamaxareeta Ñim Lo'onatac 'Enauacna souaxat da ỹo'ottac na namaxasoxonaxacpi.

Romanos 11:6

Qalaxaye Ñim Lo'onatac 'Enauacna lca'aua'a cha'aye Ñimaye soxoraic, qaq saishet da chegoqchigui cam ỹo'ot namayepi cam taiguet da yaqto' qalca'aua'a. Qaq damaye ishet da nache 'eetec de'era, cha'aye Ñimaye ỹataqta 'eesa da soxoraic.

Gálatas 3:29

Cha'aye da mashe qana'ayeetaua'a So Cristo, qaq nataqa'en qami' lalamaqa'ate llalqa so Abraham, qaq nataqa'en qauacoñiiguet qome cam ỹachaxanapec co'olloxocheye Ñim Lo'onatac 'Enauacna.

Romanos 4:16

Qaq ỹoqo'oye dam ỹachaxanapec Ñim Lo'onatac 'Enauacna da yaqto' huo'o da 'enec da talec 'enauac nam llalaqpi so Abraham, nache Ñimaye saishet da iỹaxanaique ca naiguet damaye. Ỹo'ot de'era ỹachaxanapec da talec 'enauac nam huo'o da lpi'iỹaxac Ñimaye. Saishet da nachaqnata nam ỹalaxalec na namaxasoxonaxacpi, maye nataqa'en 'enauac nam huo'o da lpi'iỹaxac maye 'eeta'am so Abraham. Ỹoqo'oye so Abraham nacheso so 'enauac da qarta'a.

1 Pedro 3:7

Qaq nache 'eetec nataqa'en qami' ỹalleppi maye mashe qauaroñi, ñi 'oonolec ỹataqta naỹateete' qataq ichoxoren aca lhua, qataq qauaỹachiñiita da saishet da 'eeta'am da qara'añaxaqui acamaye. Cha'aye nataqa'en acamaye Ñim Lo'onatac 'Enauacna ỹachaxanapeguem da nca'alaxa maye chochaq tatec. Qaq qami' da nache qoñiitec de'era, nache Ñim Lo'onatac 'Enauacna hua'axaỹa da qanqouagaxaunaxaqui.

Hebreos 11:9

So Abraham, souaxat da ỹataqta lta'araic da lpi'iỹaxac Ñim Lo'onatac 'Enauacna, nache 'eeta'am ca ỹaqa'a ca chegaqa'ague co'ollaq netalec ye 'alhua maye Ñim Lo'onatac 'Enauacna ỹachaxanapecot co'ollaxa somaye. Qaq somaye netaigui so lpe'l 'eeta'ama da 'eete'c co'ollaxa soua Isaac qataq so Jacob maye nataqa'e'n Ñim Lo'onatac 'Enauacna ỹachaxanapecoto co'ollaxa yi'iye 'alhua.

Hebreos 11:7

So Noé huo'o da lpi'iỹaxac co'ollaxa Ñim Lo'onatac 'Enauacna, qaq ỹoqo'oye Ñimaye da'aqtaxanem co'ollaxa cam saxanaxa da yo'oq, nache somaye ỹalaq qataq ỹa'ara't aso nnotaxaqui late'erai maye quiguingui na 'etaxat, da yaqto' ishet da nca'alec so llalaqpi. Qaq souaxat da so Noé huo'o da lpi'iỹaxac Ñim Lo'onatac 'Enauacna, nache somaye ỹaconeguet da lqouagaxanaqtaic Ñimaye maye ỹami' cam ỹa'amaqten Ñimaye. Nataqa'en chegoqchigui da lpi'iỹaxac Ñim Lo'onatac 'Enauacna so Noé da ỹo'oteguet na shiỹaxauapi maye huetalec ana 'alhua da qaỹauo'o ca nhuaxanaguec.

Hebreos 6:17

Qaq ỹoqo'oye Ñim Lo'onatac 'Enauacna co'ollaq huotaique da ipaqueelec da ỹachaxanapec, nache ỹan da la'aqtac chegoqchigui da maiche la'añaxac da ỹan dam ỹachaxanapec ỹataqta ipagaqchiichigui.

Gálatas 4:7

Qami' mashe saishet da qoñiita'am ca camachaqca nlatac, cha'aye mashe qami' llalqa Ñim Lo'onatac 'Enauacna. Qaq nagui da ỹoqta qami' llalqa, nache nataqa'en qauacoñiiguet qome da lsallaxa.

Romanos 4:4

Cha'aye saloqnaxana aca anom maye qoỹami' ca do'onataxaatac, acamaye ỹataqta lasheue da lo'onataxanaxac saishet da choche qoỹaatem da 'eeta'am ca chochaq nme, cha'aye nache lashiichiỹaxac.

Tito 2:13

Nataqa'en qomi' ỹapaxagueneque da qolaqtot da qarhuataxanaxac da seuataqta'aguet que'eca na'a'q maye qomi' qaỹachaxanapeguema, da ñe'eguelaq da nactaigui da llo'oxoyec So Qarataxala' Jesucristo maye Qarta'a, qataq Qarca'alaxaqui.

Mateo 25:34

Nache Aỹem maye Aỹem Nta'a shenapega nam no'on da lataxac, sheeta': «¡Ñi Ita'a qami' taaleguete da lqouagaxanaqtaic! ¡Qauanaqui, qaualliquiiua'a da lo'onataxanaxac ñi Ita'a maye, nache 'eetai' da iqataxaatapigui' co'ollaq saxanaxa da ỹo'ot ana 'alhua!

Marcos 10:17

Qaq So Jesús co'ollaq queta, nache nvi' so ỹale nqalgoqtalec Somaye. Nache ỹa'aroto naua l-llectel, nache inattac So Jesús, 'eeta': –'Am Napaxaguenataxanaq maye 'am soxoraic, Aỹem 'aua'aqtaxanem ¿negue't ca so'ot da yaqto' Aỹem taỹot ca nca'alaxa maye qaica ca loga't?

2 Ts 2:16

Ñim Lo'onatac 'Enauacna maye Qarta'a, Ñimaye soxoraic; ỹoqo'oye qomi' ỹauoteque, nache qomi' ỹanema da chochaq tatec qaramaicỹaxac qataq da ỹataqta 'eesa da ñeca'alaxauec. Ñimaye qataq So Qarataxala' Jesucristo seỹaxanoto,

Hebreos 1:14

Cha'aye na namaxashecpi piguem le'ecpi, namayepi choche saqcha'a na'añaxacpi maye do'onataxaatacot Ñim Lo'onatac 'Enauacna. Qataq Ñimaye ỹamaxa namayepi da itauan 'enauac nam shiỹaxauapi maye taỹa'a da nca'alaxatec Ñimaye.