Proverbios 19:11 - La'aqtaqa Ñim Lo'onatac 'Enauacna 2013

¹¹ Da qaica ca qanqalaate' ỹo'ot da qalhueneguet da nalemataic, qataq ỹo'ot da ño'oxoyec da sa qaiqocha'a ca nogoqtaxanaxac.

Proverbios 19:11 Referans Kwoze

Proverbios 16:32

Ỹataqta huo'o da naigui da nhualaxavic qaq saq 'ena'am da na'añaxac, qataq huo'o da naigui da maiche nllapec ñi 'oonolec, qaq saq 'ena'am da noxonec ca huaqta'a't nỹecpi.

Proverbios 14:29

Ca qaỹoqchiguinguit da lalemataic camaye ỹoqta ỹaanataxanaxaic, qaq ca sancherapec qalaq ỹachaxan da ne'enaxac.

Santiago 1:19

Qami' ñauochaxau' ỹaqaỹa't, ỹataqta qana'axaỹaxañiichigui de'era maye qami' sa'aqtaxanema: 'enauac da qoñiita iuen da qami' lhuotte' da qana'axaỹañiỹa ca qarỹai, qalaxaye saishet da saq qami' lhuanguita qataq saishet da ỹaguec da qartaxaỹaxaqui.

Proverbios 15:18

Ca sa lhuanguit da lalemataic, camaye ỹo'otteua'a da loquiaxac, qaq ca hualaxauaic, qalaq ỹo'ot da nlagaxayec.

Proverbios 12:16

Ca qaica ca ỹaỹaanapec qalaq saqaỹaloq da ỹachaxan da lalemataic, qaq ca huo'o na ỹaỹaten qalaq saishet da qochetega ca mpa'aguenataguec.

Efesios 4:32

Chaqrato' da qami' soxoraiqa, qataq qami' choxonnataxanaxaiqa, ñi 'oonolec ỹataqta ichoxoren ca lỹa da huo'o ca ỹasouaxat, 'eeta'am Ñim Lo'onatac 'Enauacna da qami' ichoxore'n chegoqchigui naqa'en So Cristo.

Proverbios 20:3

Qataq ỹo'oxoraq ca ỹale da maiche ivita'a ca cotaxac, qaq ca qaica ca ỹaỹaanapec qalaq ishet da ỹo'ot damaye.

Proverbios 25:21

Ca 'am nquiỹatega da ilem na lqouaxa, qalaq 'auquia'axan, qataq da huo'o na laquip qalaq 'anỹomaxan,

Proverbios 17:14

'Eeta'am ca tala ipaxaalec ca cotaxac maye qanayecot da qaỹo'ot, qalaxaye ỹaỹamaqchiguiñi da qanayeca'ai da ñaq saxanaxa da lliỹa't camaye.

2 Reyes 5:12

¿Qaq saisheto' peta'a da ỹactec da lyac na 'etaxat, som talapi ye Damasco, Abaná, qataq ye Farfar, da napacalec 'enauac na talapi maye huaña na Israel? ¿Peta'a saisheto' da aỹem no'oita da seuomñigui yemaye? Qaq ỹataqta dalemata co'ollaxa somaye, nache jec.

Proverbios 11:13

Ca na'aqtaqa lo'o' qaica ca ỹoxottapiguiñi, qaq ca shiỹaxaua maye npe'et qalaq choche ñe'emaxatta.

Proverbios 29:11

Ca qaica ca ỹaỹaanapec saỹaỹaten da nllañi da nnogoxonaxac, qaq ca ỹaanaxanaxaic qalaq ỹaỹaten da nllañi da nnogoxonaxac.

Proverbios 20:22

Saishet qome da 'autaqtega da 'aupalaique ca 'arvi', nacherata da 'aupi'iỹa'a Ñim Nataxala' qaq Ñimaye qome 'am itauan.