Oseas 2:2 - La'aqtaqa Ñim Lo'onatac 'Enauacna 2013

² Qaq Ñim Nataxala' 'eeta': ¡Ña qaviraxachiỹo'ot qome aso qarachi'i, cha'aye asomaye saishet da ihua, qataq asomaye saishet da aỹem lhua! ¡Qoñiỹapega da ỹaxaañi da ỹachaxaatac da lquisheguetaxac! ¡Qataq ỹaxaañi da nachaxaatega nam nquisheshaxauapi!

Toba del Oeste

² Dios yitaĝa enaac ca'li: «Da'me ami Israel lec'oqo'tepi, auepoliquilegue jaga'me adach'ii, naqaga ga'me noic Israel: qa'a ena'am ta'le youa joca'li, qalaĝaja male ja naq'aeta; ena'am ta'le nach'aga je'uoneguet joca'li, qalaĝaja ja yitaĝa ta'le joue'tajop jaga'me. Chane'eja 'noota qom auepoliquilegue jaga'me, qaedi yaĝañi da'me yaeñi ga'me quejeguetaĝae leuo, qaedi ja yitaĝa ya'uo da'me lequejeguetaĝa.

Oseas 2:2 Referans Kwoze

Isaías 50:1

Ñim Nataxala', 'eeta': «¡Saishet qome da qaupicheetega da salat na Israel maye 'eeta'am aca qarachi'i, da sheeta'am ca ỹale da ỹalat aca lhua, huo'otaq da qami' seme'n co'ollaxa da yaqto' qami' nlataqa souaxat da huo'o ca hueto'ot aca ỹavigaxaiste! Maye qami' qaime'n co'ollaxa cha'aye huo'o da qarasouaxashichi, na Israel maye 'eeta'am aca qarachi'i qaỹalat co'ollaxa, cha'aye qami' sa qaualaqai.

Ezequiel 23:45

Qalaxaye nam ỹalleppi maye no'on da lataxac, nmi't qome na lasouaxashe't nache ỹanegueta ca nhuaxanaguec maye naigui nam ỹo'o't se'esoua quisheguetaxail qataq laataxanaxail. Qaq cha'aye nachera dam lataxa'c soomaye: quisheguetaxail qataq laataxanaxail.»

Jeremías 3:13

Nacherata da 'auaỹateeta da huo'o da 'arasouaxashet, qataq 'auataỹa'aguet Ñim Nataxala', maye 'Anatamnaxala', qataq 'auaỹateeta da qoueto'ot naxa na lpaqal camachaqaca qo'oipaq maye qalochiguiñi ana lcouepi, da 'ancachetague' nam ỹaqa'a shiỹaxauapi, qaq saishet da Aỹem 'aualaxaguet. Qaq 'era da ỹa'aqtac Aỹem Nataxala'.›»

Ezequiel 16:25

Nache 'enauaque naua loga'te naua nqa'aico da 'aỹa'anaña na 'anatamnaqa'pi, qataq nache huaña da nmeneguet 'anqa'en da 'aryac dam qaiqaiga 'arataxac, souaxat da 'aỹa'anem da 'aro'ocỹaxac 'enauac na 'am nlectot, nache sa vi'iiguet da 'arquisheguetaxac.

Jeremías 3:1

Ñim Nataxala', 'enapec: «Ca 'oonolec ỹale da nalate' aca lhua, qaq acamaye da mashe nalate' camaye, qaq huaroneguet ca lỹa ỹale, nache ca hua'auchiguiñi lhua, saishet da ỹe'eguelaxa acamaye. ¡Cha'aye damaye ỹo'ot da lta'araic nayeloxo cam hueta'a 'alhua! Qalaxaye 'am Israel, qalota na 'ancachetague' shiỹaxauapi, ¡qaq nagui qalaq 'auauotaique da aỹem 'añe'eguelaxa! Qaq 'era da ỹa'aqtac, Aỹem Nataxala'.

Oseas 2:5

Cha'aye quisheguetaxai aso late'e, nache iqataqchet da llo'oxoyec, souaxat da 'enapec: Aỹem, seca'ategue qome na iquisheguetaxauapi maye ỹo'ot na anoq, ỹaquip, qataq aỹem ỹanem na no'oxonecpi, lino, qataq na coraxatpi, qataq nam ỹotta'a't qanỹomiguipi.

Oseas 1:2

Qaq 'ena na chegoqchiguiña da la'aqtac Ñim Nataxala' maye chegoqchigui naqa'en so Oseas, 'eeta': «'Aue qojec, nache 'auaroneguet qome aca 'alo quisheguetaxai, nache huo'oi qome caua 'aỹa'alqa, qaq caamaye nache chegaqaiguilo qome da quisheguetaxac, cha'aye nam netalecpi ne'ena 'alhua Israel ỹataqta nquisheshigui da la'amqaanataxanaxac, nache namayepi ỹataqta ca'ai Ñim Nataxala'.»

Jeremías 19:3

Nache qoneta': ‹Qami' nta'alpi na Judá, qataq qami' maye qoviita'a na Jerusalén, qana'axaỹaxañiỹa de'era la'aqtac Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'eeta': Aỹem ñamaxa qome ca ỹataqta lta'araic lchec ne'ena nma', qaq 'enauac qome cam hua'axaỹa da qaỹa'axat camaye, nache dauaxanguilo naua ltela lauaco.

2 Corintios 5:16

Qaq ỹoqo'oye qomi' nagui saishet da choche seloqtapigui da lataxac ca shiỹaxaua da shenaqta'am nam huetalec ana 'alhua. Qaq na'aictaxa da sogote co'ollaxa da seloqtapigui da lataxac So Cristo da shenaqta'am nam huetalecna, qalaxaye nagui saishet da nache 'eetec da qarhuennataxac.

Ezequiel 23:43

Qaq huaña nache seuennataxaaleguete se'esoua 'alo maye mashe qaica ca lya'c souaxat da lquisheguetaxa'c, nache sheeta': Nagui namayepi nache queto'ot da iqopitaxaatac da lauañeto se'esoua alo maye quisheguetaxail.

Ezequiel 20:4

Qaq 'am shiỹaxaua, maiche qouapegueto da 'anmi't naamaye, nache 'auaỹaanaxaneque nam ỹataqta qaiqaiga maye ỹo'ot co'ollaxa so lta'alpi.

Ezequiel 16:20

Qataq nataqa'en 'auaconeua'a so ỹalaqpi ỹalleppi, qataq aso ỹalepi 'alpi co'ollaq 'am seco'on, nache 'aỹa'anot se'eso nqolacpi da 'eco' aloq 'anqa'en somayepi. ¿Qaq peta'a qapio'olec 'anqa'en dam naigui dam 'anquisheshaxac,

Jeremías 2:2

«Qojec qome, nache 'aua'aqtaxanem na hueta'a ye Jerusalén, qoneta': Da la'aqtac Ñim Nataxala' 'eeta': ‹Aỹem seuennate 'am, qataq da 'aralaxayec co'ollaq saxanaxa da 'am ỹe, qataq da 'arauotaxanaqtaic maye 'eeta'am aca auonaxaua co'ollaq aỹem 'auca'attague' da qoquetalec ye toolec 'alhua qataq yem 'alhua maye qaica ca ñaxaalec›»,

Isaías 58:1

Ñim Nataxala' aỹem 'enapega, 'eeta': «'Anlamaxaren qome da 'aua'alaq saishet da 'añe'etac, 'ana'axannec da 'arvilỹaxac 'eeta'am 'anqa'en aca nasheere, ỹataqta sa 'auala'ac da qonapega na ỹalamaxat nhuo' le'ecpi souaxat da saỹalaq, nam chegoxoguetpi so Jacob souaxat nam lasouaxashetpi.

Oseas 2:1

Huaña qome nache qoñiỹapega na qarqaỹaipi, qoñeeta': «Nhuo' le'ecpi maye lalamaxat Ñim Lo'onatac 'Enauacna», qataq ana qarqaỹaipi: «Nchoxonnatapi.»

Oseas 4:5

Nache 'am qouañi qome, qouaigui ca na'a'q, qataq ca pe, nache qocañi' ca na'aqtaxanaxanec da qouañi qataq ñelaxaañi aca 'arate'e.

Isaías 11:12

Qataq nauaxaỹaxaasheguem qome aca la'anaxanaqte da yaqto' nam ỹotta'a't shiỹaxauapi ila'a, nache laỹona't na Israel le'ecpi maye qaỹauega co'ollaxa ye ỹaqa'a 'alhuapi, qataq chegoqchiguiña naqa'en 'enauaque naua laỹel ana 'alhua, na Judá le'ecpi maye nlagaxattac co'ollaxa.

Jeremías 3:18

Qaq qom ivita que'eca na'a'q, nache ye Judá huaxaiguet qome ye Israel, qaq nache nnaictega't qome da ñe'eguela'q chegoqchiyiña ye 'alhua maye pa'aigue da sheu', da naỹalo nam 'alhua maye sanem co'ollaxa da yaqto' lalamaxat som hua'au qarta'ailpi.

Miqueas 2:13

Qaq Ñim Lo'onatac 'Enauacna ỹo'otegue qome ca llec, qaq namayepi nache ca'atteueegue qome Ñimaye, nache tachiviigui naqa'en ca lasom ca huaqta'a't nỹecpi. Qaq ñim nta'a maye Nataxala', hua'auta'ague qome da taỹa'ague namayepi.